قازاقستان ەلەكتر ەنەرگياسىن مەملەكەتارالىق بەرۋدى رەتتەمەكشى
پارلامەنت ءماجىلىسىنىڭ دەپۋتاتتارى 2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتقا ارمەنيا رەسپۋبليكاسى مەن قىرعىز رەسپۋبليكاسىنىڭ قوسىلۋىنا بايلانىستى وزگەرىستەر ەنگىزۋ تۋرالى حاتتامالاردى راتيفيكاسيالاۋ تۋرالى ەكى زاڭ جوباسىن قارادى. حاتتامالار مۇشە مەملەكەتتەر اراسىندا ەلەكتر ەنەرگياسىن (قۋاتىن) مەملەكەتارالىق بەرۋدى جۇزەگە اسىرۋدىڭ ءادىسناماسىن ايقىندايدى، دەپ حابارلايدى Almaty-akshamy.kz. ق ر ەم باسپا ءسوز قىزمەتىنىڭ حابارىنا سىلتەمە جاساپ.
ەنەرگەتيكا ءمينيسترى نۇرلان نوعايەۆ اتاپ وتكەندەي، حاتتامالاردى راتيفيكاسيالاۋ ارمەنيا مەن قىرعىزستاننىڭ قوسىلۋىن ەسكەرە وتىرىپ، وداققا مۇشە مەملەكەتتەردىڭ ەنەرگيا جۇيەلەرىنىڭ ءتيىمدى جۇمىس ىستەۋ مۇمكىندىگىن قامتاماسىز ەتەدى.
باعا بەلگىلەۋ جانە تاريفتىك ساياسات نەگىزدەرىن قوسا العاندا، ەلەكتر ەنەرگەتيكاسى سالاسىنداعى تابيعي مونوپوليالار سۋبەكتىلەرىنىڭ كورسەتىلەتىن قىزمەتتەرىنە قول جەتكىزۋدى قامتاماسىز ەتۋ تۋرالى حاتتاماعا ارمەنيا مەن قىرعىز رەسپۋبليكالارىنىڭ قوسىلۋىن ەسكەرە وتىرىپ، ەاەو-عا مۇشە مەملەكەتتەر اراسىندا ەلەكتر ەنەرگياسىن (قۋاتىن) مەملەكەتارالىق بەرۋدى جۇزەگە اسىرۋ حالىقارالىق شارتتىڭ رەتتەۋ نىساناسى بولىپ تابىلادى.
بۇگىنگى تاڭدا حاتتامالاردى ارمەنيا، بەلارۋس، قىرعىز رەسپۋبليكالارى جانە رەسەي راتيفيكاسيالادى.
ارمەنيا 2014 جىلعى 10 قازاندا قول قويىلعان ارمەنيا رەسپۋبليكاسىنىڭ قوسىلۋى تۋرالى شارت شەڭبەرىندە بارلىق مۇشە مەملەكەتتەر راتيفيكاسيالاعان ەۋرازيالىق ەكونوميكالىق وداق تۋرالى شارتقا قوسىلدى. 2015 جىلعى 2 قاڭتاردا ارمەنيا وداقتىڭ تەڭ قۇقىلى مۇشەسى بولدى.
قىرعىز رەسپۋبليكاسى 2014 جىلعى 23 جەلتوقساندا قول قويىلعان قىرعىز رەسپۋبليكاسىنىڭ قوسىلۋى تۋرالى شارت شەڭبەرىندە بارلىق مۇشە مەملەكەتتەر راتيفيكاسيالاعان ەۋرازيالىق ەكونوميكالىق وداق تۋرالى شارتقا قوسىلدى. 2015 جىلعى 12 تامىزدا قىرعىز رەسپۋبليكاسى وداقتىڭ تەڭ قۇقىلى مۇشەسى بولدى.
ءماجىلىس دەپۋتاتتارى زاڭ جوبالارىن ماقۇلدادى.