22 مامىردا اباي اتىنداعى قازاق ۇلتتىق وپەرا جانە بالەت تەاترى ەۆگەنيي برۋسيلوۆسكييدىڭ «قىز جىبەك» وپەراسىن ۇسىنادى.
بۇل قويىلىم قازاق كلاسسيكالىق ونەرىنىڭ نەگىزىن قالاعان ءۇش تۇلعانىڭ – ەۆگەنيي برۋسيلوۆسكيي، قانابەك بايسەيىتوۆ جانە قۇرمانبەك جانداربەكوۆتىڭ 120 جىلدىق مەرەيتويلارىنا ارنالادى. قازاق وپەرا ونەرىنىڭ التىن قورىنا ەنگەن «قىز جىبەك» وپەراسىنىڭ پرەمەراسى 1934 جىلعى 7 قاراشادا ءوتتى.
باس پارتيالاردى ورىنداعان كۇلاش بايسەيىتوۆا، قۇرمانبەك جانداربەكوۆ پەن قانابەك بايسەيىتوۆ تۋىندىنىڭ مۋزىكالىق ماتەريالىن تاڭداۋدا، سونداي-اق كومپوزيتورعا قازاق مۋزىكاسىن مەڭگەرۋگە كومەكتەستى. وپەرانىڭ مۋزىكاسى حالىق فولكلورىنا نەگىزدەلگەن، 50-دەن استام كۇي مەن ءان ەنگەن.
العاشقى رەجيسسەرلەر – قانابەك بايسەيىتوۆ پەن جۇمات شانين، ليبرەتتو اۆتورى – عابيت مۇسىرەپوۆ.
«قانداي مۋزىكا جازسام دا – قازاقشا شىعاتىن» دەگەن ەۆگەنيي برۋسيلوۆسكييدىڭ شىعارماشىلىعى قازاق ۇلتتىق وپەراسى مەن كاسىبي مۋزىكالىق مادەنيەتىنىڭ دامۋىنا زور ۇلەس قوستى. ول – قازاق كومپوزيتورلىق مەكتەبىنىڭ نەگىزىن قالاۋشىلاردىڭ ءبىرى، تۇڭعىش وپەرالار مەن سيمفونيالاردىڭ اۆتورى. ونىڭ قالامىنان توعىز وپەرا، ءتورت بالەت، توعىز سيمفونيا جانە بەس جۇزدەن استام ءان مەن رومانس تۋعان.
سونىمەن قاتار، ول 1945–1992 جانە 1992–2006 جىلدار ارالىعىنداعى قازاقستان رەسپۋبليكاسىنىڭ مەملەكەتتىك ءانۇرانى اۆتورلارىنىڭ ءبىرى.
قانابەك بايسەيىتوۆ – قازاق كسر-ىنىڭ حالىق ءارتيسى، مەملەكەتتىك سىيلىقتىڭ لاۋرەاتى، قازاق مۋزىكالىق تەاترى مەن ۇلتتىق وپەرا ونەرىنىڭ نەگىزىن قالاۋشىلاردىڭ ءبىرى. رەجيسسەر، وپەرا ءانشىسى، دراماتۋرگ، تەاتر جانە كينو اكتەرى. 20-دان استام وپەرانى ساحنالاپ، 17 كوركەم فيلمگە تۇسكەن. «اباي» وپەراسىنداعى اباي ءرولى – شىعارماشىلىعىنىڭ شىڭى.
قۇرمانبەك جانداربەكوۆ – قازاق كسر-ىنىڭ حالىق ءارتيسى، اكتەر، رەجيسسەر، ۇستاز. قازاقتىڭ كاسىبي دراما جانە مۋزىكالىق تەاترىنىڭ نەگىزىن قالاۋشى. اباي اتىنداعى تەاتردىڭ قۇرىلۋىنا قاتىسقان. جۇبايى شارا جيەنقۇلوۆامەن بىرگە قازاق بي ونەرىن قايتا جانداندىرىپ، ۇلتتىق بالەتتەردى ساحنالادى. ول 10 وپەرا مەن 3 بالەتتى قويعان، ولاردىڭ قاتارىندا قازاق بالەت ونەرىندەگى العاشقى تۋىندى – «قالقامان مەن مامىر» بار.