قازىرگى تاڭدا حالىقارالىق ءسان ساحناسىندا ەلىمىزدىڭ اتىن شىعارىپ جۇرگەن جاستار از ەمەس. سولاردىڭ ءبىرى – جەڭىسبەك لاشين. قىزىلوردادا تۋىپ-وسكەن ول ءسان يندۋسترياسىنا اياق استىنان كەلگەنىمەن، بۇگىندە الەمگە تانىمال برەندتەرمەن جۇمىس ىستەپ، ايگىلى ءسان جۋرنالدارىنىڭ بەتتەرىنەن Zhengisbek دەگەن ەسىممەن كورىنىپ ءجۇر. مودەلدىك جولدىڭ وڭاي بولماعانىن ايتا وتىرىپ، جەڭىسبەك بىزبەن ءوزىنىڭ كاسىبي جولى، شابىت كوزى جانە سانگە دەگەن كوزقاراسى تۋرالى ءبولىستى.
– جەڭىسبەك مىرزا، ءوزىڭىز جايلى تانىستىرىپ وتسەڭىز.
مەنىڭ ەسىمىم – جەڭىسبەك لاشين. 1999 جىلى 8 مامىردا قىزىلوردا قالاسىندا دۇنيەگە كەلدىم. قازىرگى تاڭدا حالىقارالىق دەڭگەيدە جۇمىس ىستەيتىن كاسىبي مودەلمىن. بۇل سالاعا ەرتە كەلگەن جوقپىن، ءبىراق ءبىر كۇنى جاقىندارىم “مودەلدىك اگەنتتىككە بارىپ كورسەڭشى” دەگەننەن كەيىن، قىزىعۋشىلىقپەن باردىم. سول ءبىر شەشىم بۇكىل ءومىرىمدى وزگەرتتى.
– ءسان سالاسىنا قالاي كەلدىڭىز؟
بۇل سالاعا جولىم كەزدەيسوق اشىلدى. مودەل بولامىن دەپ شەشكەن كۇنىم – بۇرىنعى باعىتتارىمنان مۇلدە وزگەشە تاڭداۋ بولدى. ءقازىر سول شەشىمىمە ەش وكىنبەيمىن، كەرىسىنشە الەمنىڭ بىرنەشە ەلىندە پوديۋمدا ءجۇرمىن.
– جالپى ماماندىعىڭىز كىم؟
مەن ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىندە «تۋريزم» ماماندىعى بويىنشا ءبىلىم الدىم. ءقازىر ءوزىمدى تەك مودەل رەتىندە ەمەس، كرەاتيۆتى تۇلعا رەتىندە دە قالىپتاستىرىپ كەلەمىن. ۆيزۋالدى كوممۋنيكاسيا، ءسان تۇسىرىلىمدەرىن قويۋ، كونسەپسيالارمەن جۇمىس جاساۋ – ءبارى مەنى قىزىقتىرادى.
– شەتەلدە قانداي ءسان كورسەتىلىمدەرىنە قاتىستىڭىز؟
سوڭعى كەلىسىمشارتتارىمنىڭ ءبىرى – وڭتۇستىك افريكاداعى كەيپتاۋن قالاسىندا بولدى. وندا John Frieda برەندىمەن جۇمىس ىستەدىم. بۇعان دەيىن Louis Vuitton، Michael Cinco، Arturo Obegero، Maison Du Mec، Lazoschmidl، Jordan Luca سىندى برەندتەردىڭ كورسەتىلىمدەرىنە قاتىستىم.
– ءسان دەگەن ءسىز ءۇشىن نە؟
ءسان – بۇل مەن ءۇشىن ەركىندىك. بۇل – ءوز-وزىڭدى تانىتۋدىڭ ءتاسىلى. كيىم – جاي عانا ماتا ەمەس، ول يدەيانى، كوڭىل-كۇيدى، بولمىستى جەتكىزەتىن قۇرال. ءار پوديۋمعا شىققاندا مەن ستيلمەن قاتار ماعىنا مەن ەموسيانى جەتكىزگىم كەلەدى.
– ءومىر سالتىڭىزعا سىن ايتاتىندار بولا ما؟
ءيا، كەيدە ءومىر ءسۇرۋ سالتىما، ستيلىمە قاتىستى سىن ەستيتىن كەزدەر بولادى. ءبىراق مەن ءۇشىن ەڭ باستىسى – ءوز باعىتىمنان تايماۋ. ۋاقىت وتە كەلە سول سىن ايتقانداردىڭ ءوزى قولداۋ ءبىلدىرىپ جاتادى.
– كۇندەلىكتى ومىردە دە سانگە ءمان بەرەسىز بە؟
ارينە. پوديۋمداعىداي تىم اشىق بولماسا دا، كۇندەلىكتى كيىم ۇلگىسىمدە ءوزىمنىڭ ەرەكشەلىگىمدى، ەستەتيكامدى ساقتاۋعا تىرىسامىن. ستيل – بۇل مەن ءۇشىن ۆيزۋالدى ءتىل.
– قانداي ءسان جۋرنالدارىندا كورىندىڭىز؟
Mob Journal، Marie Claire Turkey، GQ Middle East، Vogue Arabia سياقتى حالىقارالىق باسىلىمداردا مەنىڭ فوتوسەسسيالارىم جاريالاندى. بۇل – مەن ءۇشىن ۇلكەن مارتەبە.
– قازاقستاندا قانداي جوبالارعا قاتىستىز؟
KFC، Samsung، Kazakhstan Fashion Week، Visa Fashion Week سياقتى برەندتەرمەن جۇمىس ىستەدىم. سونداي-اق، بىرنەشە اكتەرلىك جوبالارعا دا قاتىسقانىم بار.
– قازاقستان ءسان يندۋسترياسىنىڭ مۇمكىندىكتەرى قانداي؟
قازاقستاندا الەۋەت بار، الايدا حالىقارالىق ستاندارتپەن سالىستىرعاندا، جۇيەلى دامۋ ءالى جول باسىندا. تالانتتى جاستار كوپ، تەك ولاردى قولدايتىن ورتا، كاسىبي الاڭدار كوبەيسە، ۇلكەن ناتيجەگە قول جەتكىزۋگە بولادى.
جەڭىسبەك لاشين – ءسان الەمىندەگى تابىسقا ەڭبەكپەن جەتكەن جاس قازاقستاندىق. ونىڭ جولى – بىرەگەيلىك پەن باتىل شەشىمنىڭ جەمىسى. ول ءساندى كيىم ەمەس، وي مەن بولمىس رەتىندە كورەدى. مودەل رەتىندە عانا ەمەس، كرەاتيۆتى تۇلعا رەتىندە دە دامىپ كەلە جاتقان جەڭىسبەكتىڭ وقيعاسى – جاستارعا شابىت، ال ءسان يندۋسترياسى ءۇشىن – جاڭا ءداۋىردىڭ بەلگىسى.