ءىىم مالىمەتىنشە، جاڭا نورمالاردىڭ باستى ماقساتى – قوعامدىق قاۋىپسىزدىكتى ارتتىرۋ جانە بەينەباقىلاۋ كامەرالارى ارقىلى تۇلعانى تانۋ مۇمكىندىگىن قامتاماسىز ەتۋ، دەپ حابارلايدى aqshamnews.kz
قازاقستاندا بەت-جۇزدى تولىق جاباتىن كيىم كيۋگە تىيىم سالۋ تۋرالى زاڭ نورمالارىنا ەنگىزىلگەن تۇزەتۋلەر 12 شىلدەدەن باستاپ كۇشىنە ەندى.
تىيىم بالاكلاۆاعا، مەديسينالىق ماقساتتان تىس ماسكاعا، نيكابقا جانە ادامنىڭ بەت-الپەتىن انىق كورۋگە كەدەرگى كەلتىرەتىن وزگە دە كيىم ۇلگىلەرىنە قاتىستى.
دەگەنمەن زاڭدا ءبىرقاتار ەرەكشەلىكتەر قاراستىرىلعان. بەت-جۇزدى جابۋعا مەديسينالىق كورسەتكىشتەر بويىنشا، اۋا رايىنا بايلانىستى، قىزمەتتىك جانە ەڭبەك مىندەتتەرىن ورىنداۋ كەزىندە، ازاماتتىق قورعانىس شارالارىندا، سونداي-اق سپورتتىق، مادەني جانە بۇقارالىق شارالار بارىسىندا رۇقسات ەتىلەدى.
ءىىم اتاپ وتكەندەي، تىيىم ادامنىڭ ءجۇزىن جاپپايتىن ءدىني كيىمدەرگە (حيدجاب، شەيلا، حيمار، ال-اميرا) قاتىستى ەمەس. پوليسيا وكىلدەرى جاڭا ەرەجەلەر تەك قانا قوعامدىق ءتارتىپ پەن قاۋىپسىزدىكتى قامتاماسىز ەتۋگە باعىتتالعانىن، ال ازاماتتاردىڭ قۇقىقتارى مەن بوستاندىقتارى، سونىڭ ىشىندە ءدىني سەنىم بوستاندىعى، بۇزىلمايتىنىن ەرەكشە اتاپ ءوتتى.