قامشىبەك العاشقى جەڭىسىنەن كەيىن پىكىر ءبىلدىردى

وتانداسىمىزدىڭ جەڭىستەن كەيىنگى پىكىرى

توكيو وليمپياداسىندا بوكستان اسا اۋىر سالماقتا سىنعا تۇسەتىن قامشىبەك قوڭقابايەۆ بۇگىن وتكەن العاشقى جەكپە-جەگىنەن سوڭ ءوز ويىن ورتاعا سالدى،  دەپ حابارلايدى Almaty-akshamy.kz Olympic.kz-كە سىلتەمە جاساپ. 

«جەكپە-جەكتە ويىمداعى ادىستەرىمدى 100 پايىز ورىنداي المادىم. قانشا دەگەنمەن، ءبىرىنشى كەزدەسۋ، سوندىقتان، قوبالجۋ دا جوق ەمەس. بار كۇش-جىگەرىمدى سالدىم جەڭىس ءۇشىن. قارسىلاسىم دا وسال ەمەس، دەنەلى، مىقتى ءارى بويشاڭ.

كەيبىر ادىستەرىم جاقسى شىقسا، ەندى ءبىرى وتپەي قالدى. سول ءۇشىن ءار كەزدەسۋگە دايىن بولۋ كەرەك.

كەلەسى قارسىلاسىم دا وسال ەمەس. رەسەيلىك بوكسشىمەن سپاررينگتىك كەزدەسۋلەر وتكىزدىم، ءبىراق جارىس كەزىندە ءبارى دە باسقاشا بولاتىنى انىق. كوپشىلىگى مەنى وزبەكستان نامىسىن قورعايتىن باحادور جالولوۆپەن كەزدەستىرۋگە اسىق. ءبىراق مەن ءۇشىن ءاربىر قارسىلاس مىقتى. سەبەبى، بۇل وليمپيادا.

كەشە ءبىراز جىگىتتىڭ جارىستى اياقتاعانى دا جانىمىزعا باتىپ، كوڭىل-كۇيىمدى ءتۇسىردى. دەسە دە، ەلىمىزدى قۋانتۋعا دايىنبىز، بار كۇشىمىزدى سالامىز»، - دەدى قامشىبەك.