1 شىلدەدەن باستاپ قازاقستاندا بالالاردى وتباسىنا ورنالاستىرۋدىڭ جاڭا ءتۇرى – كاسىبي قابىلداۋشى وتباسى ەنگىزىلدى.
بۇل – اتا-اناسىنىڭ قامقورلىعىنسىز قالعان بالالار ءۇشىن ءقاۋىپسىز ءارى جايلى ءۇي جاعدايىن قامتاماسىز ەتۋگە باعىتتالعان ۋاقىتشا، ءبىراق ماڭىزدى قادام، دەپ حابارلادى وقۋ-اعارتۋ مينيسترلىگى.
كاسىبي قابىلداۋشى وتباسىلار ءبىر ۋاقىتتا ءتورت بالاعا دەيىن تاربيەلەۋگە مۇمكىندىك الادى.
"مۇنداي وتباسىعا بالا قابىلداماس بۇرىن ۇمىتكەرلەر مىندەتتى تۇردە ارنايى دايىندىقتان ءوتۋى ءتيىس. وقىتۋ جەتىم بالالارعا ارنالعان مەملەكەتتىك مەكەمەلەردە جانە بالالاردى وتباسىنا قابىلداعىسى كەلەتىن ادامداردى وقىتۋعا قۇقىعى بار اككرەديتتەلگەن ۇيىمداردا ۇيىمداستىرىلادى"، - دەپ جازىلعان حابارلامادا.
كانديداتتاردى بەكىتۋ تۋرالى تۇپكىلىكتى شەشىمدى قامقورشىلىق جانە قورعانشىلىق ورگاندارى قابىلدايدى. بۇل شەشىم زاڭ تالاپتارىنا سايكەس قابىلدانادى.
"قازىرگى ۋاقىتتا قامقورشىلىق ورگاندارى كاسىبي قابىلداۋشى اتا-انالاردى ىرىكتەۋ جانە دايارلاۋ جۇمىستارىن بەلسەندى تۇردە جۇرگىزىپ جاتىر. جاڭا فورماتتىڭ نەگىزگى ارتىقشىلىعى – بالالار ينتەرنات مەكەمەلەرىنە ەمەس، بىردەن وتباسىلارعا ورنالاستىرىلادى. بۇل — بالانىڭ پسيحولوگيالىق كۇيزەلىسكە ءتۇسۋ ءقاۋپىن ازايتىپ، العاشقى كۇندەردەن-اق ونى مەيىرىم مەن جىلىلىققا تولى تۇراقتى وتباسىلىق ورتاعا بەيىمدەۋگە مۇمكىندىك بەرەدى"، – دەپ اتاپ ءوتتى ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا.
ءاربىر كاسىبي قابىلداۋشى تاربيەشىگە بالاعا جۇمسالاتىن اي سايىنعى جاردەماقى، سونداي-اق تاربيەلەۋ قىزمەتى ءۇشىن ەڭبەكاقى تولەنەتىن بولادى.
ەلىمىزدە بالالاردى وتباسىنا ورنالاستىرۋدىڭ ءتورت ءتۇرى بار: اسىراپ الۋ، قامقورشىلىق، پاترونات، قابىلداۋشى وتباسى.