قالا تۇرعىندارى كۇتىمسىز اعاش كوشەتتەرىنىڭ سولىپ جاتقانىنا الاڭداۋلى
ءدال قازىرگى ۋاقىت - شاھارداعى ماۋسىمدىق ماسەلەلەرگە كوڭىل بولەتىن كەز. سەبەبى، كۇن جىلىنا باستاعاننان-اق الماتىدا كوگالداندىرۋ جۇمىستارى قارقىن الادى. قالانىڭ بارلىق اۋماعىندا اعاشتار جىل سايىن وتىرعىزىلادى. ءتيىستى ماماندار اعاش كوشەتتەرىن وتىرعىزعانمەن، سولاردىڭ سوڭىنان جاڭا وسكىندەردى كۇتىپ-باپتاپ جۇرگەندەردى كورۋ مۇڭ. ءبىزدىڭ بۇگىنگى ايتپاعىمىز - الماتىلىقتاردى الاڭداتقان قورشاعان ورتانىڭ قازىرگى احۋالى. قىرۋار اقشاعا ساتىپ الىنعانىمەن، كۇتىمى كەم بولىپ، قۋراپ جاتقان اعاشتاردىڭ جاعدايى، دەپ حابارلادى Almaty-akshamy.kz.
بوستاندىق اۋدانى
سۋ جەتپەي قۋراپ جاتىر
رەداكسيامىزعا حات جولداعان الماتىلىق گۇلنار تيميريازيەۆ، بايتۇرسىنوۆ كوشەلەرى مەن سەيفۋللين داڭعىلى ارالىعىنداعى قۋراپ قالعان تۋيا اعاشتارىنىڭ سۋرەتىن سالىپتى.
– بۇل اعاشتاردى 2020 جىلى وتىرعىزعان. ءبىراق ەشقايسىسى دۇرىس كۇتىم بولماعان سوڭ، كوكتەپ، كوگەرە المادى. تامىرىنا سۋ جەتپەگەن سوڭ، ولار دا تىرشىلىك يەسى عوي، قۋراماعاندا ءقايتسىن، – دەگەن گۇلنار:
– جاسىل بەلدەۋ قالىپتاستىرۋدا ىسكە اسپاي قالعان جۇمىستار بۇل عانا ەمەس، قۋراعان اعاشتار الماتىنىڭ بارلىق ايماعىندا كەزدەسەدى. بيۋدجەتتەن بولىنگەن قانشاما قاراجات وسىلاي جەلگە ۇشىپ جاتىر، – دەپ بازىناسىن ايتتى.
تۋيا اعاشتارىنىڭ نەگە قۋراپ كەتكەنىن بىلمەك ماقساتپەن ءبىز بوستاندىق اۋدانى اكىمدىگىنە حابارلاسقانىمىزدا، ولاردان مىناداي اقىلعا قونىمسىزداۋ، ءبىرتۇرلى جاۋاپ كەلدى: «الماتى قالاسى بوستاندىق اۋدانى اكىمىنىڭ اپپاراتى تيميريازيەۆ كوشەسى مەن بايتۇرسىنوۆ كوشەسى قيىلىسىندا ورنالاسقان جاسىل جەلەكتەردى سۋارۋ ماسەلەسى جونىندەگى ءوتىنىشتى قاراپ، FORUM Almaty ويىن-ساۋىق ورتالىعىنىڭ اكىمشىلىگىمەن ءتۇسىندىرۋ جۇمىستارىن قولعا الدى. ناتيجەسىندە ورتالىق باسشىلىعىنىڭ كۇشىمەن جاسىل جەلەكتەردى سۋارۋ جۇمىستارىنىڭ جۇرگىزىلگەنىن حابارلايدى». اقپاراتپەن بىرگە جۇمىسشىلاردىڭ قۋراعان اعاشتاردى سۋارىپ جۇرگەن سۋرەتىن قوسا جولداعان. «بولارى بولىپ، بوياۋى سىڭگەننەن كەيىن، قۋراعان اعاشتارعا مۇنداي «قامقورلىقتىڭ» قاجەتى شامالى عوي. دەسەك تە، اكىمدىك تاراپىنان بەرىلگەن جاۋاپ «ءىس ءبىتتى، قۋ كەتتىنىڭ» كەبىن كيىپ تۇرعانداي.
المالى اۋدانى
گۇلدەردىڭ سولماعانىن قالايمىن
قالا تۇرعىنى گۇلىم باعدات قىزى گاندي ساياباعىنداعى راۋشان گۇلدەرى ەگىلگەن باقتىڭ رەتكە كەلتىرىلۋىن سۇرايدى.
– ساياباقتاعى كۇتىمسىز، ءسانى كەتىپ تۇرعان گۇلدەرگە كوڭىل بولەتىن ۋاقىت كەلدى. ارامشوپتەردەن تازارتىپ، ۋاقىتىلى كۇتىپ-باپتاۋ كەرەك، – دەيدى گۇلىم. – جالپى، بۇل گۇلزارلاردى سۋارۋ، ولارعا سانيتارلىق كۇتىم جاساپ، كەسۋ/وڭدەۋ جۇمىستارىن جۇرگىزەتىن ارنايى كەستە بار ما؟ بۇعان كىم جاۋاپتى؟ جاقسى كۇتىم بولسا، راۋشاندار جاز بويى گۇلدەيدى جانە قار جاۋعانعا دەيىن ءبىزدى ءوزىنىڭ سۇلۋلىعىمەن ءھام حوش يىسىمەن قۋانتادى. مەن ساياباقتاعى راۋشان گۇلدەرىنىڭ ساقتالىپ، جاقسارعانىن قالايمىن.
المالى اۋدانىنىڭ اكىمدىگى «اۋدان اۋماعىنداعى جاسىل ايماقتاردى كۇتۋمەن «لەۋ فيرماسى» ج ش س مەردىگەرلىك ۇيىمى اينالىسادى. سۋارۋ جانە كۇتۋ جۇمىستارى جۇمىس كەستەسىنە سايكەس جۇرگىزىلۋدە جانە تۇراقتى باقىلاۋدا» دەپ جاۋاپ بەرىپ وتىر.
ازىرگە اتالمىش مەكەمە قالاداعى ەڭ مىقتى گۇل وسىرۋشىلەردىڭ ءبىرى رەتىندە تانىلىپ ءجۇر. ەندى ولار جاسىل جەلەكتەردى باپتاۋداعى شەبەرلىكتەرىن گاندي ساياباعىندا دا كورسەتەدى دەپ ۇمىتتەنەمىز.
تۇركسىب اۋدانى
جاز ءوتىپ، كۇز كەلگەندەي…
قايران، اعاشتار-اي! بۋرەننىي كوشەسىمەن بايكالسكايا كوشەلەرىنىڭ قيىلىسىنداعى اعاشتارعا قاراساڭ، قۇددى ءبىر جاز ءوتىپ، كۇز كەلگەندەي… ۋاقىتىندا دۇرىس كۇتىم كورمەي، دارىلەنبەگەن اعاش وسىنداي كۇي كەشپەگەندە ءقايتسىن!
ادەتتە ءبىز اعاشتاردى تابيعاتتا اۋا تازالاۋشى رەتىندە جاقسى بىلەمىز. جاسىل جەلەكتىڭ ودان بولەك، ادام پسيحيكاسى مەن كوڭىل كۇيىن كوتەرۋگە دە اسەرى زور. اعاشتاردى دەرەۋ ەمدەۋ كەرەك