قاي ءوڭىردىڭ ەكپە سالدىرۋ كورسەتكىشى تومەن؟

بۇل سۇراققا ق ر دەنساۋلىق ساقتاۋ ءمينيسترى الەكسەي سوي جاۋاپ بەردى.

ۇكىمەت وتىرىسىندا ق ر دەنساۋلىق ساقتاۋ ءمينيسترى الەكسەي سوي ۆاكسيناسيالاۋ قارقىنى تومەن وڭىرلەردى اتادى، دەپ حابارلايدى Almaty-akshamy.kz.

«بۇگىندە شامامەن 4 ملن ۆاكسينا دوزاسى قولدانىلدى. ونىڭ ىشىندە 1-كومپونەنتپەن 2 547 363 ادام ەكپە الدى. بۇل ەكپە الۋعا جاتاتىن حالىقتىڭ 25،7 پايىزىن قۇرايدى. ال ەكىنشى كومپونەنتپەن 1 435 334 ادام قامتىلدى»، - دەدى الەكسەي سوي.

ونىڭ دەرەگىنشە، بۇگىندە ەكپە پۋنكتتەرىندە ۆاكسينانىڭ جەتكىزىلىكتى دوزاسى، اتاپ ايتقاندا، 1-كومپونەنتتىڭ شامامەن 1،2 ملن، 2-كومپونەنتتىڭ 914 مىڭ دوزاسى بار.

«1-كومپونەنتپەن ۆاكسيناسيالاۋمەن قامتۋداعى ەڭ تومەنگى كورسەتكىش ماڭعىستاۋ وبلىسىندا 13،2، قوستاناي وبلىسىندا 19،5 پايىزدى، ال 2-كومپونەنتپەن ەڭ تومەنگى قامتۋ ماڭعىستاۋ وبلىسىندا 7،3 پايىزدى قۇرايدى. وبلىستاردىڭ، قالالاردىڭ اكىمدەرى حالىقتى كۆي-گە قارسى ۆاكسيناسيالاۋمەن قامتۋدى جەكە باقىلاۋعا الىپ، حالىقتى قوسىمشا ىنتالاندىرۋ جەتىكتەرىن ارتتىرۋى جانە ءاقپاراتتىق-تۇسىندىرۋ جۇمىستارىن كۇشەيتۋى قاجەت»، - دەدى مينيستر.