2025 جىلعى 1 ماۋسىمنان باستاپ پرەزيدەنتتىك جاستار كادر رەزەرۆىنە كەزەكتى ىرىكتەۋ باستالدى. بۇل – دارىندى، باستاماشىل جانە جاڭاشا ويلايتىن جاستاردى مەملەكەتتىك باسقارۋ ىسىنە تارتۋعا باعىتتالعان ستراتەگيالىق باستاما. جوبا مەملەكەت باسشىسىنىڭ باستاماسىمەن جۇزەگە اسىرىلىپ، بۇگىنگى كۇنى ەلىمىزدىڭ كادر ساياساتىنىڭ ماڭىزدى ەلەمەنتىنە اينالدى.
بيىلعى ىرىكتەۋدىڭ ەرەكشەلىگى قانداي؟
ءتورتىنشى ىرىكتەۋدىڭ باستى جاڭالىعى – سالالىق پروپورسيونالدى ءتاسىلدىڭ ەنگىزىلۋى. ءاربىر سالالىق باعىت بويىنشا ناقتى كۆوتالار بەلگىلەنىپ، ۇمىتكەرلەر تەك ءوز سالاسىندا عانا باسەكەگە تۇسەدى. بۇل ءتاسىل رەزەرۆتىڭ مەملەكەتتىك قاجەتتىلىكتەرگە ساي تەڭگەرىمدى قالىپتاسۋىن قامتاماسىز ەتەدى.
قاتىسۋ تالاپتارى قانداي؟
ۇمىتكەرلەرگە قويىلاتىن تالاپتار وزگەرىسسىز قالدى:
• جاسى – 35-تەن اسپاۋى ءتيىس؛
• جوعارى ءبىلىمى بولۋى كەرەك؛
• كەمىندە 5 جىل جۇمىس تاجىريبەسى بولۋى قاجەت؛
• قازاق ءتىلىن B1 دەڭگەيىنەن تومەن ەمەس دەڭگەيدە مەڭگەرۋى ءتيىس.
قاتىسۋعا جىبەرىلمەيدى:
• پرەزيدەنت تاعايىنداعان تۇلعالار؛
• ساياسي مەملەكەتتىك قىزمەتشىلەر؛
• «ا» كورپۋسىنىڭ اكىمشىلىك مەملەكەتتىك قىزمەتشىلەرى؛
• پرەزيدەنتتىك جاستار كادر رەزەرۆىنىڭ قازىرگى مۇشەلەرى.
ىرىكتەۋ قالاي وتەدى؟
2019 جىلعى 27 تامىزداعى №141 پرەزيدەنت جارلىعىنا سايكەس، ىرىكتەۋ التى كەزەڭنەن تۇرادى جانە 2025 جىلدىڭ قازانىنا دەيىن جالعاسادى.
I كەزەڭ (1–30 ماۋسىم)
قۇجاتتاردى قابىلداۋ ارنايى اقپاراتتىق جۇيە ارقىلى ونلاين رەجيمدە جۇزەگە اسىرىلادى.
II كەزەڭ (2–3، 9–10 تامىز)
ماتىندىك جانە ساندىق اقپاراتپەن جۇمىس ىستەۋ قابىلەتىن باعالاۋ.
بارلىق تالاپقا ساي ۇمىتكەرلەر ماتىنمەن جۇمىس ىستەۋ تەستىنەن وتەدى. جوعارى ۇپاي جيناعان ۇمىتكەرلەردىڭ 50%-ى عانا ساندىق اقپارات بويىنشا تەستكە جىبەرىلەدى.
ناتيجەسىندە – ءار باعىت بويىنشا 100-دەن اسپايتىن، جالپى 600 ۇزدىك ۇمىتكەر كەلەسى كەزەڭگە وتەدى.
III كەزەڭ (16–17 تامىز)
سالالىق باعىتقا بايلانىستى ناقتى جاعدايلاردى شەشۋگە ارنالعان ەسسە جازۋ. بۇل كەزەڭ ونلاين فورماتتا وتەدى.
قورىتىندى بويىنشا 300 ۇمىتكەر كەلەسى كەزەڭگە جولداما الادى.
IV كەزەڭ
ەكى بلوكتان تۇرادى:
• اسسەسسمەنت-ورتالىق (22–28 تامىز) — مەملەكەتتىك باسقارۋ اكادەمياسى بازاسىندا وففلاين وتەدى. ۇمىتكەرلەردىڭ كوشباسشىلىق، اناليتيكالىق ويلاۋ، پرواكتيۆتىلىك جانە باسقا دا باسقارۋشىلىق قابىلەتتەرى باعالانادى.
• قۇزىرەتتەر بويىنشا سۇحبات (23–28 قىركۇيەك) — كاسىبي HR-ماماندارمەن وتكىزىلەدى. ۇمىتكەردىڭ ىشكى موتيۆاسياسى مەن قۇندىلىقتىق باعدارلارى انىقتالادى.
بۇل كەزەڭنىڭ قورىتىندىسى بويىنشا 150 قاتىسۋشى تاڭدالىپ الىنادى.
V كەزەڭ (8–15 قازان)
ساراپتامالىق كوميسسيامەن سۇحبات. ناتيجەسىندە 100-دەن اسپايتىن ۇمىتكەردەن تۇراتىن ءتىزىم ۇلتتىق كوميسسيانىڭ قاراۋىنا ۇسىنىلادى.
VI كەزەڭ (25 قازانعا دەيىن)
ۇلتتىق كوميسسيانىڭ وتىرىسى ءوتىپ، ەڭ ۇزدىك 50 ۇمىتكەر پرەزيدەنتتىك جاستار كادر رەزەرۆىنە قابىلدانادى.
جاستارعا ۇندەۋ
بۇگىنگى تاڭدا ەلىمىز ۇلكەن وزگەرىستەر مەن جاڭا سىن-قاتەرلەر الدىندا تۇر. مۇنداي كەزەڭدە كاسىبي، پروگرەسسيۆتى جانە ناتيجەگە باعىتتالعان مەملەكەتتىك قىزمەتشىلەردىڭ جاڭا بۋىنىن قالىپتاستىرۋ ەرەكشە ماڭىزدى. مەملەكەتتىك اپپاراتقا – ءبىلىمدى، ادال ءارى ەڭبەكقور جاستار قاجەت. ولار ەلگە قىزمەت ەتۋدى ءوز بورىشى سانايدى.
پرەزيدەنتتىك جاستار كادر رەزەرۆى – بۇل جاي عانا مانساپ مۇمكىندىگى ەمەس. بۇل – ەل تاعدىرىنا اسەر ەتۋ، ۇلكەن وزگەرىستەردىڭ ءبىر بولشەگى بولۋ، حالىق يگىلىگى ءۇشىن ەڭبەك ەتۋ مۇمكىندىگى.
قۇرمەتتى جاس ازاماتتار!
ەگەر سىزدە كۇش-جىگەر، ەلگە دەگەن جاناشىرلىق جانە وزگەرىستەرگە ۇمتىلىس بولسا – وسى مۇمكىندىكتى جىبەرىپ الماڭىز! ىرىكتەۋگە قاتىسىڭىز، ەلىمىزدىڭ بولاشاعىن بىرگە قالىپتاستىرايىق!
قازاقستان بولاشاعى – سىزدەردىڭ قولدارىڭىزدا!