ەلىمىزدىڭ كينوتۋىندىسى شەتەلدى ءتانتى ەتۋدە
«قازاقفيلم» كينوستۋدياسىنىڭ مالىمەتىنشە، ەليا گيلمانننىڭ رەجيسسەرلىعىمەن «كۇنباعىس» ءفيلمى 16 بىردەي حالىقارالىق فەستيۆالگە قاتىسىپ، 25-تەن استام جۇلدەگە يە بولدى، دەپ حابارلايدى Almaty-akshamy.kz.
وتاندىق كينوتۋىندى جاقىندا عانا فرانسيادا وتكەن Red Movie Awards فەستيۆالىندە «ۇزدىك دراما» جۇلدەسىن، حالىقارالىق Tokyo International Monthly Film Festival فەستيۆالىندە «ۇزدىك رەجيسسەر» جانە Cannes Film Awards كينوفەستيۆالىندە «ازيانىڭ ۇزدىك اكتەرى» (اكتەر ەركەبۇلان دايىروۆ) جۇلدەلەرىن، سونىمەن قاتار Paris Film Festival فەستيۆالىندە ارنايى جۇلدەنى قانجىعاسىنا بايلادى.
«وسىنداي حالىقارالىق دەڭگەيدەگى جەتىستىكتەرىمىزبەن ءفيلمنىڭ ءتۇسىرىلىم توبىن، اكتەرلەرىمىزدى جانە «قازاقفيلم» كينوستۋدياسىن قۇتتىقتايمىن. بۇل - ءبىزدىڭ ورتاق جەڭىسىمىز. بۇگىنگى تاڭدا «كۇنباعىس» ءفيلمى لوس-اندجەلەس پەن بايا كاليفورنيا شتاتىندا وتەتىن تاعى دا ەكى فەستيۆالدىڭ بايقاۋىنا ىلىكتى. سونداي-اق جۇڭگو، تايلاند، فيليپپين، فينليانديا، ارمەنيا جانە كانادادا وتەتىن فەستيۆالدەردەن جاڭالىق كۇتىپ وتىرمىز. بۇكىل الەم كورەرمەندەرىنىڭ ءىقىلاس-ىلتيپاتىنا بولەنىپ، دۇنيەجۇزىنىڭ كينو ونەرى شەبەرلەرىنىڭ جوعارى باعاسىن العان وسى ءبىر كينوتۋىندىنى تۇسىرگەنىمىزگە قۋانىشتىمىن»،- دەدى رەجيسسەر ەليا گيلمان.