تىنىشتىق. جايلىلىق. ەرەكشە اتموسفەرا. كىتاپ وقۋعا ارنالعان ەڭ قولايلى جاعداي ءدال وسىنداي. ۇيدە نەمەسە كەز كەلگەن ورتادا مۇنداي جاعداي جاساۋ مۇمكىن شىعار، ءبىراق ول ەرەكشە الەمگە جەتەلەيتىن، سورەلەرى ءتۇرلى كىتاپتارعا تولى كىتاپحاناعا جەتپەيدى.
سۋرەت: yandex.kz
كىتاپسۇيەر ىزدەنىمپاز جاندار ءۇشىن كىتاپحانا - ناعىز رۋحاني دەمالىس ورنى. مۇندا ءبارى تەگىن: ءبىلىم دە، شابىت تا. ال وسى الەمگە جان ءبىتىرىپ تۇرعان تۇلعالار - كىتاپحاناشىلار. بۇل تاقىرىپتى قوزعاۋىمىز تەگىن ەمەس. سەبەبى بۇگىن - كىتاپحاناشىلار كۇنى. وسى كاسىبىن ومىرلىك ميسسياسىنا اينالدىرعان جانداردىڭ ءبىرى - قۋانىش رازاق قىزى يسابەكوۆا. كىتاپحانا سالاسىندا 40 جىلدان استام ۋاقىت جەمىستى ەڭبەك ەتىپ كەلە جاتقان جاندى Aqshamnews.kz ءتىلشىسى اڭگىمەگە تارتىپ كوردى.
قۋانىش رازاق قىزى ەڭبەك جولىن 1988 جىلى مادەنيەت ۇيىندەگى اۋىل كىتاپحاناشىسى بولىپ باستاعان. كەيىن كىتاپحانا مەڭگەرۋشىسى قىزمەتىن اتقارىپ، 1992 جىلى الماتىعا قونىس اۋدارعان سوڭ، قالالىق ورتالىقتاندىرىلعان كىتاپحانالار جۇيەسىنىڭ №36 جاسوسپىرىمدەر كىتاپحاناسىندا ەڭبەك ەتكەن. سەگىز جىلدان بەرى الماتى قالاسىنداعى №33 بالالار كىتاپحاناسىن مەڭگەرۋشىسى قىزمەتىندەگى ول بۇعان دەيىن №29 بالالار كىتاپحاناسىن 10 جىل باسقارعان.
ءوز ىسىنە ادال ماماننىڭ ەڭبەگى دە ەسكەرۋسىز ەمەس، 2022 جىلى ول "مادەنيەت سالاسىنىڭ ۇزدىگى" اتانسا، وتكەن جىلى "قۇرمەت" وردەنىمەن ماراپاتتالدى.
وسى كۇنى قۋانىش حانىم جەتەكشىلىك ەتىپ وتىرعان كىتاپحاناعا كۇندەلىكتى 60-70 وقىرمان كەلەدى. نەگىزىنەن مەكتەپ وقۋشىلارى مەن ستۋدەنتتەر ءجيى باس سۇعادى ەكەن. كىتاپ قورى جىل سايىن 1500-2000 جاڭا كىتاپپەن تولىقتىرىلادى، ءقازىر مۇنداعى كىتاپ سانى 19 مىڭعا جۋىقتاپ قالعان.
كىتاپحانا وقىرمانعا كىتاپ تاۋىپ بەرۋمەن عانا شەكتەلمەيدى. مۇندا بالالارعا ارنالعان ءتۇرلى مادەني-تانىمدىق شارالار، كىتاپحانا ساياحاتتارى، ادەبي كەزدەسۋلەر تۇراقتى تۇردە ۇيىمداستىرىلادى.
"بالالاردىڭ كىتاپقا دەگەن قىزىعۋشىلىعىن ارتتىرۋ - ءبىزدىڭ باستى مىندەتىمىز. مەكتەپتەرمەن ىنتىماقتاستىق ورناتىپ، وقۋشىلاردى كىتاپ الەمىمەن تانىستىرامىز. قازىرگى بالالاردى زاماناۋي اۆتورلار دا قىزىقتىرادى، سوندىقتان سۇرانىسقا ساي جاڭا كىتاپتاردى ىزدەپ، ەلەكترون نۇسقالارىن دا ۇسىنۋعا تىرىسامىز"، - دەيدى قۋانىش يسابەكوۆا.
كىتاپحاناشى ەڭبەگى - مادەني ميسسيا
كوپشىلىك كىتاپحاناشى تەك قاجەتتى كىتاپتى وقىرمانعا تاۋىپ بەرىپ، ونى فورمۋليارعا جازىپ، ۋاقىتى كەلگەندە قايتارىپ الىپ قانا وتىراتىن ادام دەپ ويلايدى. ءبىراق ءىس جۇزىندە بۇل - ۇلكەن مادەني-اعارتۋشىلىق جۇمىس.
قۋانىش يسابەكوۆانىڭ ايتۋىنشا، كىتاپحاناشىلار الەمدىك وندىق جىكتەۋ جۇيەسى بويىنشا كىتاپتاردى رەتتەپ، ەسكىرگەن باسىلىمداردى ەسەپتەن شىعارۋ، وقىرمان سۇرانىسىن زەرتتەۋ، ەلەكترون كاتالوگتارمەن جانە انىقتامالىق بازالارمەن جۇمىس ىستەۋ سياقتى كوپ قىرلى مىندەتتەردى اتقارادى.
ءبىر كەزدەرى ماردىمسىز جالاقىعا دا جۇمىس ىستەپ كەلگەن كىتاپحاناشىلاردىڭ ەڭبەگى كەيىنگى جىلدارى لايىقتى باعالانا باستاعانى ايتىلىپ ءجۇر. مۇنى وزدەرى دە راستاپ وتىر:
"جالاقىمىز كوتەرىلىپ، جاقسارىپ كەلەدى، مەملەكەت قولداۋ كورسەتىپ وتىر. جاستاردىڭ دا كىتاپحانا سالاسىنا قىزىعۋشىلىعى ارتىپ كەلەدى. جاس بۋىننىڭ بۇل سالاعا بەت بۇرۋى - قۋانتاتىن جاعداي"، - دەيدى ول.
قۋانىش رازاق قىزى جەتەكشىلىك ەتىپ وتىرعان №33 كىتاپحانا ناعىز رۋحاني مەكەن دەۋگە بولار. مۇندا كىتاپ تا، ينتەرنەت تە تەگىن. تەك وقۋعا نيەت بولسا، بولعانى.
قۋانىش يسابەكوۆا سياقتى جانكەشتى مامانداردىڭ ەڭبەگى ارقاسىندا بۇل ورىن تەك كىتاپ سورەلەرى ەمەس، ءبىلىم مەن مادەنيەتتىڭ، ۇلت رۋحانياتىنىڭ جۇرەگىنە اينالىپ وتىر.
ءقازىر الماتى كىتاپحانالارى جاڭا داۋىرگە ءبىرشاما بەيىمدەلگەن. ەلەكترون جۇيەلەر - "Library Almaty"، "مegaPro" باعدارلامالارى ارقىلى جۇمىس ىستەيدى.
الماتى كىتاپحانالارى باسپا ءسوز قىزمەتىنىڭ بەرگەن اقپاراتىنا ساي، قالادا 24 اۆتونوم كىتاپ بەرۋ اپپاراتى ورناتىلعان، ولار اي سايىن 300 جاڭا وقىرماندى تىركەيدى جانە 420 كىتاپقا دەيىن بەرەدى.
الماتى كىتاپحانالارى 28 زاماناۋي كىتاپحانا-بولىمشەسىن بىرىكتىرىپ وتىر، ولاردىڭ 97%-ى جاڭعىرتىلعان. جالپى كىتاپ قورى 1،5 ميلليوننان اسادى. ال ارنايى قاجەتتىلىكتەرى بار جاندار ءۇشىن 7 بولىمشەدە برايل قارپىمەن جانە دىبىستىق ينتەرفەيسپەن جابدىقتالعان بولىمدەر جۇمىس ىستەيدى.
قوزعالىسى شەكتەۋلى ازاماتتارعا ارنالعان ۇيگە تەگىن كىتاپ جەتكىزۋ قىزمەتى دە بار.
الماتى كىتاپحانالارىندا وسى كۇنى 471 مامان ەڭبەك ەتەدى. ولاردىڭ 30-دان استامى گەرمانيا، شۆەيساريا، فينليانديا، كورەيا، ەستونيا، شۆەسيا ەلدەرىندە كاسىبي بىلىكتىلىگىن ارتتىرعان.
قۋانىش يسابەكوۆا سياقتى تاجىريبەلى مامانداردىڭ ەڭبەگى ارقاسىندا كىتاپحانا جاي عانا سورەلەر ەمەس، رۋحانيات پەن مادەنيەتتىڭ ورداسىنا اينالعان. تىنىشتىق پەن تاۋسىلماس قازىنا - ءبىلىم ورداسىنىڭ كورىنبەيتىن كەيىپكەرلەرى - كىتاپحاناشىلار كۇنى قۇتتى بولسىن!