مادەنيەت جانە اقپارات مينيسترلىگىنىڭ باستاماسىمەن قازاقستاندا وتباسىن قولداۋ ورتالىقتارىنىڭ قىزمەتكەرلەرىن، سونداي-اق قيىن ومىرلىك جاعدايداعى وتباسىلاردى ەرتە انىقتاۋ بويىنشا موبيلدىك توپتار مۇشەلەرىن وقىتۋ باستالدى. العاشقى سەمينار-ترەنينگ الماتى وبلىسىندا ۇيىمداستىرىلدى، دەپ حابارلايدى aqshamnews.kz.
ترەنينگتەردىڭ ماقساتى – قىزمەتكەرلەردىڭ كاسىبي قۇزىرەتتىلىگىن، قيىن ومىرلىك جاعدايداعى وتباسىلارعا ساپالى كومەك كورسەتۋ ءۇشىن ۆەدومستۆوارالىق ۇيلەستىرۋدىڭ ساپاسىن ارتتىرۋ.
ترەنينگتەردە تەوريالىق جانە پراكتيكالىق ساباقتار وقىتىلادى. ءىس-شارا وتباسىن قولداۋ ورتالىقتارى قىزمەتكەرلەرىنىڭ وتباسىلارمەن جەكە جۇمىس جوسپارلارىن قۇرۋ بويىنشا پراكتيكالىق داعدىلارىن قالىپتاستىرۋعا، دياگنوستيكا، جوسپارلاۋ جانە كومەك كورسەتۋ مونيتورينگىن جاقسارتۋعا باعىتتالعان.
سەمينار-ترەنينگتەر بارلىق وڭىرلەردە 15 قازان مەن 15 جەلتوقسان ارالىعىندا وتەدى.
ايتا كەتەيىك، بۇگىندە ەلىمىزدە 43 وتباسىن قولداۋ ورتالىعى بار. ولاردىڭ نەگىزگى فۋنكسياسى - مەملەكەتتىڭ وتباسىلىق ساياسات شارالارىن ىسكە اسىرۋ، ومىرلىك قيىن جاعدايعا تاپ بولعان ادامداردى (وتباسىلاردى) قولداۋ بويىنشا جۇمىستى ۇيلەستىرۋ، تۇرمىستىق زورلىق-زومبىلىق بەلگىلەرى بار ادامدارعا قولداۋ كورسەتۋ جانە ءموبيلدى توپتاردىڭ جۇمىسىن ۇيىمداستىرۋ.