بيزنەسپەن سىندارلى ديالوگ – ينۆەستيسيالىق ساياساتتىڭ باسىم باعىتتارىنىڭ ءبىرى
پرەمەر-مينيستر ولجاس بەكتەنوۆ جاھاندىق ينۆەستيسيالار بويىنشا VII قازاقستاندىق دوڭگەلەك ۇستەلگە قاتىستى، دەپ حابارلايدى aqshamnews.kz
الاڭدا اۋىل شارۋاشىلىعى، تاماق ونەركاسىبى، ەنەرگەتيكا جانە تاۋ-كەن ءوندىرۋ سالالارى، قارجى سەكتورى سالالارىنداعى جەتەكشى حالىقارالىق جانە قازاقستاندىق كومپانيالار باسشىلارىمەن بىرگە 500-دەن استام بيزنەس وكىلى، سونداي-اق وتاندىق كاسىپكەرلىك سالا وكىلدەرى، ينۆەستورلار جينالدى.
پلەنارلىق سەسسيا «جاھاندىق ينۆەستيسيالىق ۇردىستەر: بولاشاققا كوزقاراس» تاقىرىبىنا ارنالدى.
KGIR جۇمىسىن اشا وتىرىپ، ولجاس بەكتەنوۆ دوڭگەلەك ۇستەل مەملەكەت باسشىسىنىڭ توراعالىعىمەن وتكەن شەتەلدىك ينۆەستورلار كەڭەسى وتىرىسىنىڭ قيسىندى جالعاسى سانالاتىنىن جانە بيزنەس-قوعامداستىقپەن تىعىز ديالوگ قۇرۋعا باعىتتالعانىن اتاپ ءوتتى.
قازاقستان ۇكىمەتى مەملەكەت باسشىسىنىڭ تاپسىرماسىن ورىنداۋ ءۇشىن قولايلى ينۆەستيسيالىق احۋالدى قالىپتاستىرۋ بويىنشا جۇيەلى جۇمىس جۇرگىزۋدە. بۇگىندە ەلىمىزدە 14 ارنايى ەكونوميكالىق ايماق جۇمىس ىستەيدى، وندا ينۆەستورلار ءۇشىن سالىقتىق جانە كەدەندىك پرەفەرەنسيالار كوزدەلگەن، شەتەلدىك جۇمىس كۇشىن جالداۋ ءراسىمى جەڭىلدەتىلگەن، بيزنەس ءۇشىن اكىمشىلىك كەدەرگىلەر ازايتىلعان. كاسىپكەرلەردىڭ ماسەلەلەرىن جەدەل شەشۋ ءۇشىن ۇكىمەت جانىنداعى ينۆەستيسيالىق شتاب تۇراقتى نەگىزدە جۇمىس ىستەيدى. باسىم ينۆەستيسيالىق جوبالار ءۇشىن رۇقسات بەرۋ راسىمدەرىنەن ءوتۋدى جەدەلدەتەتىن «جاسىل ءدالىز» نەمەسە Fast-track تەتىگى ىسكە قوسىلادى. وتاندىق جانە شەتەلدىك ينۆەستورلاردىڭ قۇقىقتارى مەن مۇددەلەرىن بارىنشا قورعاۋدى قامتاماسىز ەتۋ ءۇشىن جاعدايلار جاسالعان. ماسەلەن، شەتەلدىك بيزنەسكە احقو-دا اعىلشىن قۇقىعى مەن ۇلتتىق قۇقىقتىق جۇيە اراسىندا تاڭداۋ مۇمكىندىگى بەرىلدى.
KGIRr قاتىسۋشىلارى ەلىمىزدە جوبالاردى ىسكە اسىرۋ تاجىريبەسىن ءبولىسىپ، ىنتىماقتاستىقتىڭ ودان ءارى كەلەشەگىن اتاپ ءوتتى. China Energy Investment Corporation باس ديرەكتورىنىڭ ورىنباسارى يان گوچۋان ەنەرگەتيكا سالاسىنداعى ىنتىماقتاستىقتىڭ ماڭىزىن اتاپ ءوتىپ بىرلەسكەن جوبالاردىڭ الەۋەتىنە سەنىم ءبىلدىردى:
«ءبىز ەنەرگەتيكا سالاسىندا كومىردى ازىرلەۋ جانە ەكولوگيالىق تازا پايدالانۋ، جاڭا ەنەرگەتيكا، ينفراقۇرىلىمدى قولداۋ جونىندەگى قازاقستاندىق جوبالارعا بەلسەندى قاتىسۋ ءۇشىن وزىق تەحنولوگيالارىمىزدى، كاسىبي الەۋەتىمىزدى جانە تاماشا باسقارۋ كومانداسىن تولىق كولەمدە پايدالاناتىن بولامىز. ءبىز ءۇشىن جۇڭگو مەن قازاقستان اراسىنداعى دوستىق ىنتىماقتاستىققا ءوز ۇلەسىمىزدى قوسۋ ماڭىزدى».
AstraZeneca-نىڭ حالىقارالىق بيوفارماسيەۆتيكا ءوڭىرى بويىنشا ۆيسە-پرەزيدەنتى نيتين كاپۋر ءوز سوزىندە قازاقستاننىڭ ورتالىق ازيا فارماسيەۆتيكالىق نارىعىنداعى باستى ويىنشى رەتىندەگى ماڭىزى، جەرگىلىكتى ءوندىرىستى جانە يننوۆاسيالىق شەشىمدەردى دامىتۋ جونىندەگى كۇش-جىگەرى اتاپ ءوتىلدى.
«قازاقستان ورتالىق ازياداعى AstraZeneca بيزنەسىنىڭ لوكوموتيۆى سانالادى جانە جاھاندىق بيوفارماسيەۆتيكالىق كومپانيا رەتىندە ءبىز قازاقستان ۇكىمەتىنىڭ وڭىردەگى فارماسيەۆتيكا ونەركاسىبىنىڭ ورتالىعىنا اينالۋعا قاتىستى ءورشىل ماقساتىن قولدايمىز»، — دەدى نيتين كاپۋر.
سونداي-اق پلەنارلىق سەسسيا بارىسىندا Power International Holding پرەزيدەنتى رامەز ءال-حايات، Fufeng Group Limited ديرەكتورلار كەڭەسىنىڭ ءتوراعاسى لي سيۋەچۋن، ACWA Power باس اتقارۋشى ديرەكتورى ماركو ارچەللي، Carlsberg Group ەۋروپا، ءۇندىستان ەلدەرى بويىنشا اتقارۋشى ۆيسە-پرەزيدەنتى لارس لەمانن، Alstom كومپانياسىنىڭ افريكا، تاياۋ شىعىس جانە ورتالىق ازيا وڭىرلەرى بويىنشا پرەزيدەنتى ەندريۋ دەلەوني جانە ەۋروپالىق قايتا قۇرۋ جانە دامۋ بانكىنىڭ (ەقدب) بانك وپەراسيالارى جونىندەگى ۆيسە-پرەزيدەنتى ماتتەو پاترونە ءسوز سويلەدى.