تۇڭعىش پرەزيدەنت نۇرسۇلتان نازاربايەۆ سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى مارات احمەتجانوۆقا الەمدىك تاجىريبەنى زەرتتەۋدى جانە قولدانىسقا ەنگىزۋدى جالعاستىرۋ كەرەكتىگىن ايتتى.
ەلباسى نۇرسۇلتان نازاربايەۆ سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى مارات احمەتجانوۆتى قابىلدادى، دەپ حابارلايدى Almaty-akshamy.kz Elbasy.kz cايتىنا سىلتەمە جاساپ.
نۇرسۇلتان نازاربايەۆ تاۋەلسىزدىك جىلدارىندا قازاقستاندا سىبايلاس جەمقورلىققا قارسى كۇرەس ماسەلەلەرى بويىنشا اۋقىمدى ءىس اتقارىلعانىن ايتتى.
«ءبىز تاۋەلسىزدىكتىڭ العاشقى كۇندەرىنەن باستاپ جەمقورلىققا قارسى كۇرەس سالاسىندا جۇمىس ىستەپ كەلەمىز. دەگەنمەن ءالى دە اتقارىلاتىن شارۋا از ەمەس. بۇل پروسەسكە قوعامدى جۇمىلدىرعان ءجون. وسى باعىتتا الەمدىك تاجىريبە جەتكىلىكتى، سونى زەرتتەۋدى جانە قولدانىسقا ەنگىزۋدى جالعاستىرۋ كەرەك»، – دەدى قازاقستاننىڭ تۇڭعىش پرەزيدەنتى.
كەزدەسۋدە مارات احمەتجانوۆ سىبايلاس جەمقورلىققا قارسى ءىس-قيمىل اگەنتتىگىنىڭ جەمقورلىق قاتەرلەرىن تالداۋ جانە الدىن الۋ، سىبايلاس جەمقورلىق سالاسىنداعى حالىقارالىق ىنتىماقتاستىقتى نىعايتۋ شارالارى تۋرالى ايتتى. سونداي-اق اگەنتتىك قىزمەتىنىڭ تيىمدىلىگىن ودان ءارى ارتتىرۋ جوسپارىن باياندادى. اگەنتتىك ءتوراعاسىنىڭ مالىمەتى بويىنشا، سوڭعى 5 جىلدا قازاقستاننىڭ سىبايلاس جەمقورلىقتى قابىلداۋ يندەكسىندەگى پوزيسياسى جاقسارىپ، 122ء-شى ورىننان 94ء-شى ورىنعا اۋىستى.