رەسپۋبليكالىق ديريجەرلەر كونكۋرسىنا ءوتىنىم قابىلداۋ جالعاسىپ جاتىر، دەپ حابارلايدى aqshamnews.kz ق ر مادەنيەت جانە اقپارات مينيسترلىگىنىڭ باسپا ءسوز قىزمەتىنە سىلتەمە جاساپ.
2025 جىلدىڭ 8-10 قازان ارالىعىندا قازاقستان رەسپۋبليكاسى مادەنيەت جانە اقپارات مينيسترلىگىنىڭ قولداۋىمەن جامبىل اتىنداعى قازاق مەملەكەتتىك اكادەميالىق فيلارمونياسىندا قازاقستاننىڭ حالىق ءارتىسى، مەملەكەتتىك سىيلىقتىڭ لاۋرەاتى، حالىق قاھارمانى، كۇيشى-كومپوزيتور، ديريجەر نۇرعيسا تىلەندييەۆتىڭ 100 جىلدىعىنا ارنالعان رەسپۋبليكالىق كونكۋرس وتەدى.
كونكۋرستىڭ باستى ماقساتى – قازاقستان ديريجەرلىك مەكتەبىنىڭ ءداستۇرىن ساقتاۋ، ونى كەڭىنەن ناسيحاتتاۋ، كاسىبي ماماندارمەن شىعارماشىلىق ىنتىماقتاستىق ورناتۋ، ديريجەرلىك شەبەرلىكتى جەتىلدىرۋ، سونداي-اق دارىندى جاس ديريجەرلەردى قولداۋ.
بايقاۋ ۇلتتىق مادەنيەتتىڭ دەڭگەيىن كوتەرۋ جانە قازاقستاننىڭ مادەني ءيميدجىن ارتتىرۋعا باعىتتالعان. اتالمىش بايقاۋعا قازاقستان رەسپۋبليكاسىنىڭ مۋزىكالىق ونەر سالاسىنداعى 18 بەن 35 جاس ارالىعىنداعى تالانتتى جاستار مەن جوعارى وقۋ ورىندارىنىڭ ستۋدەنتتەرى قاتىسادى.
كونكۋرس 2 كەزەننەن تۇرادى. قاتىسۋشىلار نۇرعيسا تىلەندييەۆ اتىنداعى اكادەميالىق فولكلورلى-ەتنوگرافيالىق «وتىرار سازى» وركەسترىنىڭ سۇيەمەلدەۋىمەن مۋزىكالىق شىعارمالاردى ورىندايدى. جەڭىمپازداردى سالا ماماندارىنان قۇرالعان بىلىكتى قازىلار القاسى انىقتايدى.
2025 جىلدىڭ 10 قازان كۇنى جامبىل اتىنداعى قازاق مەملەكەتتىك اكادەميالىق فيلارمونيانىڭ ۇلكەن زالىندا ءىس-شارا قورىتىندىلانىپ، جەڭىمپازداردى ماراپاتتاۋ ءراسىمى وتەدى.