قازنەتتە جەدەل جاردەم قىزمەتكەرلەرى كوشەدە جاتقان ناۋقاستى تەپكىلەگەن ۆيدەو تارادى. دەنساۋلىق ساقتاۋ مينيسترلىگى بۇل ۆيدەوعا قاتىستى پىكىر ءبىلدىردى، - دەپ حابارلايدى aqshamnews.kz ءتىلشىسى.
بۇعان دەيىن الەۋمەتتىك جەلىلەر مەن باق-تا جەدەل جاردەم قىزمەتكەرلەرى ورىندىقتا ۇيىقتاپ جاتقان ەر ادامدى اياعىمەن تەۋىپ تۇسىرگەن ءساتى بەينەلەنگەن ۆيدەو تاراعان ەدى. ۆيدەو اۆتورلارىنىڭ ايتۋىنشا، كادردا قازاقستاننىڭ جەدەل جاردەم قىزمەتى وكىلدەرى ناۋقاستى ءتيىستى مەديسينالىق كومەك كورسەتپەستەن كوشەدە قالدىرىپ كەتكەن.
قازاقستان دەنساۋلىق ساقتاۋ مينيسترلىگىنىڭ رەسمي مالىمدەمەسى
"جۇرگىزىلگەن تالداۋ ناتيجەسى ۆيدەوعا تۇسىرىلگەندەردىڭ قازاقستاننىڭ جەدەل جاردەم قىزمەتكەرلەرى ەمەس ەكەنىن كورسەتتى: ولاردىڭ فورماسىندا ق ر جەدەل مەديسينالىق جاردەم بريگادالارىنا مىندەتتى مەملەكەتتىك جانە ۆەدومستۆولىق ايىرىم بەلگىلەرى جوق. كيىمنىڭ ءتۇس گامماسى مەن ۇلگىسى دە قازاقستاندا قولدانىستاعى ءبىرىڭعاي ستاندارتقا سايكەس كەلمەيدى"، – دەلىنگەن مينيسترلىك مالىمدەمەسىندە.
سونىمەن قاتار، بۇل وقيعا 2024 جىلعى 11 ناۋرىزدا رەسەيدىڭ ۆولگوگراد قالاسىندا بولعانى جانە سول كەزدە رەسەيلىك باق-تا كەڭىنەن جاريالانعانى انىقتالدى. تەكسەرۋ قورىتىندىسى بويىنشا كىنالىلەر جاۋاپكەرشىلىككە تارتىلعان.
"وسىلايشا، بۇرىننان بەلگىلى ءارى تەكسەرىلگەن وقيعانى قازاقستاننىڭ قىزمەتتەرىمەن بايلانىستىرۋعا تىرىسۋ - ازاماتتاردى ادەيى جاڭىلىستىرۋ"، – دەپ اتاپ ءوتتى دەنساۋلىق ساقتاۋ مينيسترلىگى.
مينيسترلىك پابليك اكىمشىلەرىن جانە اقپاراتتىق رەسۋرستاردىڭ اۆتورلارىن قازاقستاندىقتاردىڭ شىنايى اقپارات الۋ قۇقىعىن قۇرمەتتەۋگە، جاريالاماس بۇرىن دەرەككوزدەردى تەكسەرۋگە جانە مەملەكەتتىك، الەۋمەتتىك جانە مەديسينالىق قىزمەتكەرلەردى ادەيى قارالاۋ ماقساتىنداعى ماتەريالداردى تاراتپاۋعا شاقىردى.