قازاقتىڭ كورنەكتى اقىنى مۇحتار شاحانوۆتىڭ جۇبايى، بەلگىلى عالىم، پەداگوگ روزاليندا ءاشىرباي قىزى شاحانوۆا قايتىس بولدى، دەپ حابارلايدى aqshamnews.kz.
1951 جىلى پاۆلودار قالاسىندا دۇنيەگە كەلگەن روزاليندا شاحانوۆا الماتىداعى قازاق قىزدار پەداگوگيكالىق ۋنيۆەرسيتەتىنىڭ (QyzPU) «ورىس ءتىلى مەن ادەبيەتى» ماماندىعى بويىنشا جوعارى ءبىلىم الىپ، كاسىبي ەڭبەك جولىن مەكتەپ ءمۇعالىمى رەتىندە باستاعان. كەيىن عىلىمعا دەن قويىپ، 1990 جىلى كانديداتتىق ديسسەرتاسياسىن ءساتتى قورعادى.
1993 جىلى «قازاق ءتىلى مەن ادەبيەتى» ماماندىعى بويىنشا ەكىنشى جوعارى ءبىلىم الىپ، سول جىلى دوسەنت عىلىمي اتاعىنا يە بولدى. ونىڭ عىلىمي جانە ادىستەمەلىك ەڭبەكتەرى ەلىمىزدىڭ ءبىلىم بەرۋ جۇيەسىندە كەڭىنەن قولدانىلىپ كەلەدى.
2004 جىلى QyzPU وقۋ ورنىنا وقۋ-ادىستەمەلىك جۇمىس جونىندەگى پرورەكتور قىزمەتىنە شاقىرىلىپ، بۇل لاۋازىمدى 2008 جىلعا دەيىن اتقاردى. ول وزىنە عىلىم جولىن اشقان ۋنيۆەرسيتەتپەن ءومىرىنىڭ سوڭىنا دەيىن تىعىز بايلانىستا بولىپ، جىل سايىن مەملەكەتتىك ەمتيحان كوميسسياسىنىڭ ءتوراعاسى رەتىندە ستۋدەنتتەردىڭ ءبىلىمىن باعالاۋعا اتسالىستى.
روزاليندا شاحانوۆا – كوپتەگەن عىلىمي ماقالالار مەن وقۋ-ادىستەمەلىك قۇرالداردىڭ اۆتورى. ول «ق ر ءبىلىم بەرۋ ءىسىنىڭ ۇزدىگى»، «جوعارى وقۋ ورنىنىڭ ۇزدىك وقىتۋشىسى»، «ى. التىنسارين» مەدالى، «عىلىمنىڭ دامۋىنا قوسقان ۇلەسى ءۇشىن» توسبەلگىسى جانە QyzPU دامۋىنا قوسقان ۇلەسى ءۇشىن بەرىلگەن «قۇرمەت» مەدالى سىندى ماراپاتتارعا يە بولعان.