وڭىرلىك كوممۋنيكاسيالار قىزمەتىنىڭ الاڭىندا قازاقستان رەسپۋبليكاسى كونستيتۋسياسىنىڭ 30 جىلدىعىنا ارنالعان بريفينگ بولىپ ءوتتى. پرەسس-كونفەرەنسيانىڭ سپيكەرى – الماتى قالاسى ازاماتتىق اليانسىنىڭ ءتوراعاسى، قالالىق قوعامدىق كەڭەستىڭ مۇشەسى قايىرجان ابدىحالىكوۆ. ول ازاماتتاردى كونستيتۋسيالىق مىندەتىن ۇمىتپاۋعا شاقىرىپ، ەلدىڭ نەگىزگى زاڭىنىڭ تۇراقتىلىعى مەن وزەكتىلىگىن اتاپ ءوتتى.
"30 جىل ىشىندە ءبىز قازاقستان رەسپۋبليكاسىنىڭ كونستيتۋسياسى – تۇراقتى ءارى ومىرشەڭ قۇجات ەكەنىنە كوز جەتكىزدىك. ول ەلمەن بىرگە دامىپ، ىشكى جانە سىرتقى سىن-قاتەرلەرگە جاۋاپ بەرىپ كەلەدى. كونستيتۋسيا – بۇل جاي عانا ەرەجەنىڭ جيىنتىعى ەمەس. بۇل – بيلىك تارماقتارىنىڭ مارتەبەسىنەن باستاپ، ءار ازاماتتىڭ قۇقىعى مەن مىندەتىنە دەيىنگى ۇلكەن جۇيە. ول ءبىزدىڭ دەموكراتياعا، ادامگەرشىلىك پەن الەۋمەتتىك ادىلدىككە نەگىزدەلگەن مەملەكەت رەتىندەگى بولمىسىمىز. رەفورمالاردىڭ ناتيجەسىندە ازاماتتاردى مەملەكەتتى باسقارۋعا قاتىستىراتىن جاڭا تەتىكتەر ەنگىزىلدى. اشىقتىق، جاريالىلىق، بيلىكتىڭ ەسەپ بەرۋى – بۇل قۇر ۇران ەمەس، بۇگىندە ناقتى جۇمىس ىستەپ تۇرعان قاعيدالار. كونستيتۋسيا بىزگە قۇقىق بەرۋمەن قاتار، مىندەت تە جۇكتەيدى. مەملەكەتتىڭ يگىلىگىن كورىپ، وسى ەلدە ءومىر ءسۇرىپ جاتساق، كونستيتۋسيادا كورسەتىلگەن مىندەتتەرىمىزدى دە ورىنداۋعا ءتيىسپىز"، – دەدى قايىرجان ابدىحالىكوۆ.
سپيكەردىڭ ايتۋىنشا، كونستيتۋسيا – زاڭنامالىق جۇيەنىڭ ىرگەتاسى عانا ەمەس، سونىمەن قاتار ازاماتتار مەن مەملەكەتتىك ينستيتۋتتاردىڭ ءومىر ءسۇرۋ قاعيداتتارىن ايقىندايتىن ماڭىزدى قۇجات. قازىرگى ۋاقىتتا بارلىق مينيسترلەر مەن جەرگىلىكتى اتقارۋشى ورگانداردىڭ باسشىلارى حالىق الدىندا ەسەپ بەرۋگە مىندەتتى. مۇنداي وزگەرىس كونستيتۋسيالىق نورمالاردىڭ ارقاسىندا ىسكە اسىپ وتىر.
بريفينگ بارىسىندا سوڭعى جىلداعى رەفورمالارعا، اسىرەسە 2022 جىلعى ماۋسىمدا وتكەن رەفەرەندۋمنان كەيىن ەنگىزىلگەن وزگەرىستەرگە ايىرىقشا نازار اۋدارىلدى. سونىمەن قاتار، قايىرجان ابدىحالىكوۆ ازاماتتىق قوعامدى دامىتۋدىڭ ماڭىزىنا توقتالىپ، مەملەكەتتىك باعدارلامالار مەن بيۋدجەت شىعىنىن باقىلاۋدا قوعامعا كەڭ مۇمكىندىك بەرەتىن قوعامدىق باقىلاۋ تۋرالى زاڭنىڭ قابىلدانعانىنا العىس ءبىلدىردى. «بۇل – شىن مانىندە ريەۆوليۋسيالىق قادام. ول كونستيتۋسيانىڭ حالىق ءۇشىن جازىلعانىن، ادام مۇددەسىن ءبىرىنشى ورىنعا قوياتىن قاعيدالارعا نەگىزدەلگەنىن كورسەتەدى»، – دەگەن سپيكەر، كونستيتۋسيا رەسمي مەملەكەتتىك ءرامىز بولماسا دا، قوعامدىق سانانىڭ ەرەكشە نىسانى رەتىندە قابىلداناتىنىن، ءارى مەملەكەت پەن قوعامنىڭ دامۋىنداعى باستى باعداردىڭ ءبىرى بولۋى ءتيىس ەكەنىن ەسكە سالدى.