قارجى، بيرجا، ماكروەكونوميكا ساراپشىسى، ەكونوميست ايبار ولجاي Facebook-پاراقشاسىندا الماتىداعى Magnum گيپەرماركەتىنەن وتاندىق مايونەز تابا الماعانىن جازىپ، ەلىمىزدىڭ ءىرى ساۋدا جەلىسىنىڭ شەتەلدىك ونىمگە باسىمدىق بەرۋىن سىنعا الدى. ول مەملەكەتتىك قولداۋعا يە بيزنەس وتاندىق تاۋار وندىرۋشىلەردى ىعىستىرىپ جاتىر دەپ مالىمدەدى، - دەپ حابارلايدى Aqshamnews.kz.
"سەنبىدە الماتىداعى "جەتىسۋ" ىقشاماۋدانىنداعى ىرگەلى Magnum-عا باس سۇقتىم. بۇل - تاريحتاعى ەڭ تۇڭعىش Magnum گيپەرماركەتى. وسى دۇكەن جاقسى تابىس اكەلگەننەن كەيىن، Magnum ساۋدا جەلىسى رەتىندە ودان ءارى دامىعان بولاتىن. سورەلەردى ون اينالىپ، ءوزىمىزدىڭ وتاندىق مايونەزدى تابا المادىم. ىزدەگەنىم الماتىدا وندىرىلەتىن "3 جەلانيە" مايونەزى بولاتىن. گيپەرماركەت قىزمەتكەرى ءقازىر قازاقستاندىق مايونەزدىڭ ساتىلمايتىندىعىن راستادى. Magnum قازاقستاندىق مايونەزدى الىپ تاستاپ، ورنىنا رەسەيدىڭ "ماكەيەۆ" مايونەزىن تولتىرىپ تاستاعان"، – دەيدى ولجاي.
ايبار ولجايدىڭ ايتۋىنشا، بۇل كەزدەيسوق جاعداي ەمەس. بۇعان دەيىن دە ول Magnum سورەلەرىندە رەسەيلىك جارما مەن ماي ونىمدەرىنىڭ كوبىرەك ساتىلۋىنا نازار اۋدارعان.
ەكونوميست بۇل جەكە بيزنەس بولعانىمەن، "Magnum Cash & Carry" مەملەكەتتەن پايىزسىز نەسيە الىپ وتىرعاندىقتان، مۇنداي ارەكەت اقتالمايتىنىن ايتتى. ونىڭ ايتۋىنشا، كومپانيا كەيىنگى بەس جىلدا الماتىدا كەمى 13 ميلليارد تەڭگە، ال جالپى ەل بويىنشا شامامەن 18 ميلليارد تەڭگە مەملەكەتتىك كومەك العان.
"ساۋدا مينيسترلىگى تاراپىنان ۇلكەن لوگيكالىق قاتەلىك بار. ولار Magnum سياقتى ءىرى ساۋدا جەلىلەرىنە پايىزسىز نەسيە تاراتىپ وتىرعاندا تەك بەلگىلى ءبىر الەۋمەتتىك ازىق-تۇلىككە باعانى وسىرمەۋ بويىنشا تالاپ قويادى. ءبىراق "ول تاۋار وتاندىق بولۋى ءتيىس" دەگەن شارت جوق"، – دەيدى ول.
بۇگىندە باسەكەلەستىكتى قورعاۋ جانە دامىتۋ اگەنتتىگى مەن Magnum اراسىنداعى جاعداي دا شيەلەنىسە تۇسكەن. كومپانيا تاۋار وندىرۋشىلەرگە سورەدەن ورىن مەن جارناما ءۇشىن قوسىمشا تولەم جۇكتەپ وتىر، بۇل - وتاندىق كاسىپورىندارعا اۋىر سوققى.
ساراپشى Magnum-نىڭ رەسەيلىك ونىمدەردى وتكىزۋى ەلىمىزدىڭ ماكروەكونوميكاسىنا دا كەرى اسەر ەتەتىنىن ەسكەرتەدى.
"قازاقستاننىڭ رەسەيدەن الاتىن ازىق-تۇلىك يمپورتى 2024 جىلى 10 پايىزعا ءوسىپ كەتتى. ءقازىر رەسەيدەن 1،9 ميلليارد دوللارعا ازىق-تۇلىك الامىز. ەندى وسى 2 ميللياردتىق اقشا كانالى ءرۋبلدىڭ تەڭگەگە ىقپالىن قامتاماسىز ەتەدى دە، ەرتەڭ رەسەيدە مىندەتتى تۇردە بولاتىن ينفلياسيا بىزگە دە اسەر بەرەدى. ال رۋبل قۇلاپ كەتەتىن بولسا، ول تەڭگە باعامىنا قىسىم جاساي باستايدى"، – دەيدى ولجاي.
ونىڭ ايتۋىنشا، Magnum ەلدەگى ازىق-تۇلىك ساۋداسىنىڭ 8 پايىز ۇلەسىن الىپ وتىر. ونىڭ وتاندىق وندىرۋشىلەردى قولداماۋى، ونىمدەرىن سورەدەن الىپ تاستاۋى ءبىزدىڭ وندىرۋشىلەردىڭ ساتۋ كولەمىن ازايتىپ، جاعدايىن ناشارلاتادى. بۇل تيىسىنشە ولاردىڭ قىزمەتكەرلەرىنىڭ ايلىعىنىڭ وسپەۋىنە، جۇمىس ورىندارىنىڭ قىسقارۋىنا الىپ كەلەدى. تۇرمىسى ناشارلاپ قالعان ادامدار Magnum-نان تاماق الۋىن ازايتادى.
شەشىم قانداي؟
ايبار ولجاي بۇل جاعدايدان شىعۋدىڭ ەكى جولىن ۇسىنادى:
-
Magnum مەملەكەتتىك قارجىلاندىرۋدان تولىق ايىرىلۋعا ءتيىس؛
-
مەملەكەتتىك كومەك جالعاساتىن بولسا، وتاندىق ونىمدەرگە سورەدە الىپ تاستاۋعا تىيىم سالىنۋى كەرەك.
ول Eurasian Foods Corporation سياقتى كاسىپورىنداردىڭ مايونەزىن اۋعانستاننان شىعىس ەۋروپاعا دەيىن ەكسپورتتاپ جاتقانىن ەسكە سالا وتىرىپ، ەلىمىزدەگى ەڭ ءىرى ساۋدا جەلىسىنىڭ ولاردى سورەدەن الىپ تاستاۋى ستراتەگيالىق تۇرعىدا ۇلكەن قاتەلىك ەكەنىن اتاپ ءوتتى.
"قازاقستان - ورتالىق ازيانىڭ مايونەز دەرجاۆاسى. ال Magnum ونى رەسەيدىڭ "ماكەيەۆىمەن" الماستىرىپ جاتىر. بۇل - كومپانيا باسشىسى ازامات وسمانوۆقا ۇلكەن سىن"، - دەيدى اۆتور.
ول اپتانىڭ اياعىندا گيپەرماركەتكە قايتا بارىپ، جاعداي وزگەرمەسە، ماسەلەنى ماجىلىسكە دەيىن كوتەرەتىنىن ايتتى.