ليتۆادا قازاقتىڭ ءداستۇرلى ويىنى توعىزقۇمالاقتىڭ تانىمالدىلىعى وسۋدە.
ليتۆانىڭ استاناسىندا بالتىق وڭىرىندەگى العاشقى توعىزقۇمالاق فەدەراسياسى اشىلدى، دەپ حابارلادى Almaty-akshamy.kz Baq.kz-كە سىلتەمە جاساپ.
توعىزقۇمالاق فەدەراسياسىن تىركەگەندەر ليتۆادا قازاقتىڭ ۇلتتىق ويىنىن ناسيحاتتاپ جۇرگەن ەرلى-زايىپتىلار: ايداس جانداريس جانە رامۋتە جانداريەنە.
بىرنەشە جىلدان بەرى قازاقستاننىڭ ليتۆاداعى ەلشىلىگى دۇنيەجۇزىلىك توعىزقۇمالاق فەدەراسياسىمەن جانە ليتۆالىق سەرىكتەستەرمەن ىنتىماقتاسا وتىرىپ، اتالعان ەلدە قازاقتىڭ زياتكەرلىك ويىنىن تانىستىرۋ بويىنشا تىنىمسىز جۇمىس جۇرگىزىپ كەلەدى.
ليتۆالىق وقۋشىلار مەن ستۋدەنتتەرگە توعىزقۇمالاق ويىنىنىڭ قىر-سىرىن ۇيرەتەتىن شەبەرلىك ساباقتارى تۇراقتى تۇردە ءوتىپ تۇرادى.
2019 جىلى ا. جانداريس پەن ر. جانداريەنە قازاقستان ەلشىلىگىمەن جانە دۇنيەجۇزىلىك فەدەراسيامەن بىرلەسىپ، العاش رەت ليتۆا تىلىندە ويناۋعا ارنالعان ادىستەمەلىك قۇرال شىعارىپ، ونى «مەكتەپ» ءىرى ايماقتىق كورمەسىندە پاش ەتكەن.
كونە ويىن ليتۆادا بەلسەندى دامىپ كەلەدى جانە جانكۇيەرلەرىن جاۋلاپ الۋدا. ليتۆادا وسى كۇنگە دەيىن توعىزقۇمالاقتان 2 جارىس ءوتتى.
قىزىعۋشىلىق تانىتقاندار قازاقستاندا جاسالعان تاقتالاردى ءۆيلنيۋستىڭ ەسكى قالاسىنىڭ ءدال ورتالىعىندا، جانداريستاردىڭ كىتاپ دۇكەنىنەن ساتىپ الا الادى.
فەدەراسيا قۇرىلتايشىلارى ونىڭ اشىلۋىن قازاقستان رەسپۋبليكاسى تاۋەلسىزدىگىنىڭ 30 جىلدىعىنا ارناپ، ويىندى ارى قاراي دامىتىپ قانا قويماي، جاقىن ارادا قازاقستانداعى ويىن شەبەرلەرىنە ەلەۋلى باسەكەلەستىك جاساۋدى جوسپارلاپ وتىر.
ايتا كەتسەك، 2020 جىلدىڭ جەلتوقسانىندا قازاقستان، قىرعىزستان مەن تۇركيانىڭ ورتاق ۇسىنىسىنىڭ نەگىزىندە يۋنەسكو توعىزقۇمالاق ويىنىن ادامزاتتىڭ ماتەريالدىق ەمەس مادەني مۇرانىڭ رەپرەزەنتاتيۆتىك تىزىمىنە قوستى.