اۋرۋدى ودان ءارى اسقىندىرماۋ ءۇشىن قانداي شارا قولدانۋىمىز كەرەك؟ باس سانيتار قانداي كەڭەس بەرەدى؟
بۇگىن وڭىرلىك كوممۋنيكاسيالار قىزمەتىندە وتكەن ونلاين باسپا ءسوز كونفەرەنسياسى بارىسىندا الماتى قالاسى سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى جانداربەك بەكشين كۆي اۋرۋىن ازايتۋ مەن ساقتانۋ شارالارى تۋرالى ايتتى، دەپ حابارلايدى Almaty-akshamy.kz.
مەگاپوليستىڭ مەملەكەتتىك باس سانيتارلىق دارىگەرى Ashyq جۇيەسىن ەنگىزۋ ارقىلى اۋرۋدىڭ تومەندەۋىنە شاعىن جانە ورتا بيزنەس نىساندارىن مونيتورينگتىك توپتاردىڭ جۇيەلى باقىلاۋى اسەر ەتكەنىن اتاپ ءوتتى. سونداي-اق قوعامدىق ورىنداردا (كىرەبەرىستەردە، باسپالداق الاڭدارىندا، بالالاردىڭ ويىن الاڭدارىندا) پروفيلاكتيكالىق دەزينفەكسيا جۇرگىزۋ وڭ ناتيجە بەردى.
جانداربەك بەكشين الماتىدا Ashyq جوباسى وسى جىلدىڭ اقپان ايىنان باستاپ جۇزەگە اسىرىلىپ جاتقانىن ەسكە سالدى. ونىڭ مىندەتتەرىنىڭ ءبىرى – جۇقتىرعان تۇرعىندار مەن ولاردىڭ بايلانىس تۇلعالارىن قوعامدىق ورىندارعا بارۋىن شەكتەۋ. سونداي-اق، ەكى اپتالىق ءۇي كارانتينىن ساقتاۋ مىندەتتى.
جانداربەك بەكشيننىڭ مالىمەتىنشە، جوبا باستالعاننان بەرى الماتىدا ءوز مارتەبەسىن سكانەرلەۋ ناتيجەلەرى بويىنشا 1235 تۇرعىننىڭ «قىزىل» مارتەبەسى راستالدى، 298 تۇرعىننىڭ «سارى» مارتەبەسى انىقتالدى.
جوبانىڭ تاعى ءبىر ارتىقشىلىعى – ءموبيلدى قوسىمشانىڭ كومەگىمەن ءۇي كارانتينىن بۇزباي «قاشىقتان» تەكسەرۋ مۇمكىندىگى بار. وسىلايشا، قوسىمشانىڭ ارقاسىندا الماتىدا 649 تۇرعىننىڭ قىزىل مارتەبەسى، 144 تۇرعىننىڭ سارى مارتەبەسى راستالدى.
«جۇرگىزىلگەن شارالاردىڭ، سونداي-اق Ashyq جوباسىنىڭ ناتيجەسىندە كۆي بويىنشا تاۋلىكتىك ءوسىم 6 ەسەگە تومەندەدى. سوڭعى تاۋلىكتە الماتىدا مامىر ايىنىڭ العاشقى كۇندەرىندە 605 – 608 جاعدايعا قارسى كۆي-دىڭ 143 جاعدايى تىركەلدى»، - دەدى الماتى قالاسىنىڭ مەملەكەتتىك باس سانيتارلىق دارىگەرى جانداربەك بەكشين.
ول كاسىپكەرلەردى جوبا تالابىنا ادال بولۋعا، بەلگىلەنگەن شەكتەۋلەردى ساقتاۋعا شاقىردى، ويتكەنى جوبا كارانتيندىك جەڭىلدىكتەرمەن جۇمىس ىستەۋگە مۇمكىندىك بەرەدى.