مەكتەپ مۇعالىمدەرى تۇگەل ۆاكسينا سالدىرۋعا مىندەتتى.
جاڭا وقۋ جىلىندا قازاقستاندىق وقۋشىلار تولىقتاي مەكتەپكە ورالادى. مەملەكەت پرەزيدەنتى قاسىم-جومارت توقايەۆ ۇكىمەتتىڭ كەڭەيتىلگەن وتىرىسىندا وسىنداي تاپسىرما بەردى، دەپ حابارلايدى Almaty-akshamy.kz.
«پاندەميا كەزىندە وقۋشىلار مەن ستۋدەنتتەر قاشىقتان وقۋعا ءماجبۇر بولدى. بۇل جاعداي ءبىلىم ساپاسىنا كەرى اسەرىن تيگىزدى. سوندىقتان، وتكەن وقۋ جىلىندا جىبەرىلگەن كەمشىلىكتەردىڭ ورنىن تولتىرىپ، جاڭا وقۋ جىلىندا كوشتەن قالىپ قويماۋىمىز كەرەك. مۇنىڭ بىردەن ءبىر جولى – وقىتۋدىڭ بۇرىنعى فورماتىنا كوشۋ ەكەنى انىق. ۇكىمەتكە جاڭا وقۋ جىلىندا وقۋشىلار مەن ستۋدەنتتەردىڭ ءداستۇرلى وقۋ جۇيەسىنە ورالۋىن قامتاماسىز ەتۋدى تاپسىرامىن. كوروناۆيرۋستىڭ جاڭا شتامدارى پايدا بولىپ جاتقان كەزدە بۇل مىندەتتى ورىنداۋ وڭاي ەمەستىگىن تۇسىنەمىن. سول سەبەپتى وقۋشىلار مەن مۇعالىمدەردى بارىنشا قورعايتىن كەشەندى ءتاسىل ازىرلەۋ كەرەك»، - دەدى پرەزيدەنت قاسىم-جومارت توقايەۆ.