مەملەكەتتىك يندۋستريا جانە قۇرىلىس مينيسترلىگى سۋ جابدىقتاۋ مەن سۋ بۇرۋ قىزمەتتەرىنىڭ كولەمىن ەسەپتەۋ ادىستەمەسىن وزگەرتەتىن بۇيرىققا قول قويدى. ۆەدومستۆونىڭ مالىمدەۋىنشە، جاڭا ادىستەمە قازاقستاندىقتارعا ەش قولايسىزدىق تۋدىرمايدى، دەپ حابارلايدى اqshamnews.kz ءتىلشىسى Tengrinews.kz-كە سىلتەمە جاساپ.
جاڭا ەرەجە 1 قاراشادان باستاپ كۇشىنە ەنەدى. مينيسترلىك ازاماتتار اراسىندا تۋىنداعان "كورشىلەر ءۇشىن جالپى ەسەپتەگىش بويىنشا تولەيمىز بە؟" دەگەن كۇماندى سۇراقتارعا تۇسىنىكتەمە بەردى.
"بۇل قاۋىپتەر ورىنسىز. قابىلدانعان ادىستەمە جاڭا تولەم تۇرلەرىن ەنگىزبەيدى جانە تولەم مولشەرىن ۇلعايتپايدى"، — دەلىنگەن ۆەدومستۆو حابارلاماسىندا.
مينيسترلىكتىڭ تۇسىندىرۋىنشە، قۇجاتتىڭ ماقساتى - سۋ ارنالارىمەن بەرىلەتىن جانە بۇرىلاتىن سۋ كولەمىن انىقتاۋدىڭ ءبىرىڭعاي قاعيدالارىن بەكىتۋ. بۇرىنعىداي تولەم تۇتىنۋشى جەلىسى مەن سۋ ارناسى جەلىسىنىڭ جاۋاپكەرشىلىك شەكاراسىندا ورناتىلعان ەسەپتەگىش قۇرالدارىنىڭ كورسەتكىشى بويىنشا ەسەپتەلەدى. ەسەپتەگىش جوق جەردە جەرگىلىكتى اتقارۋشى ورگاندار (اكىمدىكتەر) بەكىتكەن تۇتىنۋ نورمالارى قولدانىلادى.
كوپپاتەرلى ۇيلەر ءۇشىن دە ءتارتىپ وزگەرمەيدى: ەگەر ۇيدە جالپىۇيلىك ەسەپتەگىش بولسا، ال كەيبىر پاتەرلەردە جەكە ەسەپتەگىشتەر ورناتىلماعان جاعدايدا، جالپىۇيلىك جانە جەكە ەسەپتەگىشتەر اراسىنداعى ايىرما كوندومينيۋم قاتىسۋشىلارى اراسىندا پروپورسيونالدى بولىنەدى. مۇنداي ءتارتىپ بۇعان دەيىن دە قولدانىلىپ كەلگەن، ەندى ول تۇسىنبەۋشىلىكتى بولدىرماۋ ءۇشىن جاڭارتىلعان ادىستەمەدە ناقتى بەكىتىلدى.
كوميتەت ءتوراعاسىنىڭ ورىنباسارى نۇرسۇلتان كەرەمكۇلوۆتىڭ ايتۋىنشا، قۇجاتتىڭ باستى ماقساتى - جۇيەنى ايقىن ەتۋ:
"ادىستەمە تولەم قاعيداسىن وزگەرتپەيدى. ەسەپتەگىش بار جەردە ادام تەك ءوز تۇتىنعان سۋى ءۇشىن تولەيدى، ەسەپتەگىش جوق جەردە بەكىتىلگەن نورما بويىنشا. جالپىۇيلىك پەن جەكە ەسەپتەگىش اراسىنداعى ايىرما بۇل ءۇيدىڭ ورتاق قاجەتتىلىكتەرى، بىرەۋدىڭ قاتەلىگى نە ايىپپ ۇلى ەمەس. ەشقانداي جاسىرىن ەسەپتەۋلەر بولمايدى. مۇنداي ايىرمانى ءبولۋ ءتارتىبى بۇرىننان بار"، - دەدى ول.
وسىلايشا، ادىستەمە پاتەر يەلەرى ءۇشىن ەشتەڭەنى وزگەرتپەيدى: تەك قولدانىستاعى تاجىريبەنى زاڭدىق تۇرعىدا ناقتىلاپ، ەلدىڭ بارلىق ءوڭىرى ءۇشىن ءبىرىڭعاي ءارى تۇسىنىكتى ەتەدى. ۆەدومستۆو سۋعا تولەم وسپەيتىنىن تاعى دا راستادى.