الماتىداعى Alatau Creative Hub شىعارماشىلىق ورتالىعىندا كىتاپحاناشى كۇنى ايرىقشا اتالىپ ءوتتى. بۇل مەرەكە – ۇلتتىڭ رۋحاني قازىناسىن ساقتاپ، ءبىلىم مەن مادەنيەتتى ناسيحاتتاپ جۇرگەن كىتاپحاناشىلار ەڭبەگىنە دەگەن قۇرمەتتەن باستاۋ الادى.
سالتاناتتى جيىنعا الماتى قالالىق مادەنيەت باسقارماسىنىڭ باسشىسى دانيار الييەۆ، قازاقستان جازۋشىلار وداعىنىڭ ءتوراعاسى مەرەكە قۇلكەنوۆ، كىتاپحانا سالاسىنىڭ ارداگەرلەرى، قالالىق كىتاپحانالار قىزمەتكەرلەرى جانە شىعارماشىلىق قاۋىم وكىلدەرى قاتىستى.
– كىتاپحاناشى – كىتاپ پەن وقىرمان اراسىنداعى دانەكەر عانا ەمەس، كىتاپقا جاڭا تىنىس بەرەتىن تۇلعا، – دەدى مەرەكە قۇلكەنوۆ، – ونىڭ ەڭبەگىمەن كىتاپ رۋحاني كۇشكە اينالىپ، وقىرمان ءبىلىم مەن ىزدەنىس جولىنا تۇسەدى، – دەدى مەرەكەلىك ءىس-شارادا.
ءىس-شارا بارىسىندا كىتاپحانا سالاسىنىڭ ارداگەرلەرى مەن ۇزدىك قىزمەتكەرلەرى ق ر مادەنيەت جانە اقپارات مينيسترلىگىنىڭ، الماتى قالاسى اكىمدىگىنىڭ جانە مادەنيەت باسقارماسىنىڭ العىس حاتتارىمەن جانە قۇرمەت گراموتالارىمەن ماراپاتتالدى.
كىتاپحانا ءىسىنىڭ مايتالماندارىنا ايتىلعان جىلى لەبىزدەر مەن ريزاشىلىق سوزدەر ولاردىڭ اعارتۋشىلىق جولداعى ەڭبەگىنىڭ قوعام ءۇشىن ماڭىزىن ايقىنداي ءتۇستى.
ايتا كەتەيىك، الماتىدا كىتاپحاناشىلار قاۋىمىنا قۇرمەت كورسەتۋ ءداستۇرى جىل سايىن جالعاسىپ كەلەدى.