بۇعان دەيىن جاس سپورتشىلار اۋىلداعى ەسكى مەشىتىنىڭ ىشىندە جاتتىعىپ كەلگەن
الماتى وبلىسى پانفيلوۆ اۋدانى تۇرپان اۋىلىندا 80 بالاعا ارنالعان سپورت مەكتەبى اشىلدى، دەپ حابارلايدى Almaty-akshamy.kz.
سپورتتىق نىساننىڭ اشىلۋىنا الماتى وبلىسىنىڭ دەنە شىنىقتىرۋ جانە سپورت باسقارماسىنىڭ باسشىسى نۇرباقىت تەڭىزبايەۆ، ارداق نازاروۆ سىندى بەلگىلى سپورتشىلار قاتىستى.
اۋىلدىڭ كاسىپكەر ازاماتتارى سالعان مەكتەپتە كۇرەس تۇرلەرى مەن ەرەجەسىز جەكپە-جەك ءتۇرى بويىنشا جاتتىعۋ جۇرگىزىلەدى. 500 شارشى مەتر اۋماقتى الىپ جاتقان سپورتتىق مەكتەپتە بۇدان بولەك فۋتبول جانە بالالار وينايتىن الاڭدار سالىنعان. سپورتتىق عيماراتپەن قوسا اۋىلدى كوركەيتۋگە ازاماتتار 100 ملن تەڭگەدەن اسا قارجى بولگەن.
بۇعان دەيىن جاس سپورتشىلار اۋىلداعى ەسكى مەشىتىنىڭ ىشىندە جاتتىعىپ كەلگەن بولاتىن.
«وسىنداي جاڭا سپورت زالدى كوپ كۇتتىك. اۋىلىمىزداعى اعالارىمىزعا راحمەت. بارلىق جاعدايىمىزدى جاساپ بەردى. ەندى ءبىز بارىنشا جاتتىعىپ، اۋىلىمىزدىڭ، ەلىمىزدىڭ نامىسىن قورعايمىز»،- دەدى جاس سپورتشى ايىپ ءادىلجان.
سونىمەن قاتار ەل تاۋەلسىزدىگىنىڭ 30 جىلدىعى قارساڭىندا وسى ازاماتتار اۋىل جانىنا 30 مەترلىك ۇلكەن تۋ تۇعىر ورناتتى. يگى ىسكە باستاما بولعان كاسىپكەر جالعاس التىنبەك بۇنىڭ بارلىعى ەل تاۋەلسىزدىگىنىڭ 30 جىلدىق مەرەيتويىنا تارتۋ دەيدى.
«اۋىلىمىزعا سپورت مەكتەبىن سالۋ كوپتەن ويدا ءجۇر ەدى. ويتكەنى ءىنى، باۋىرلارىمىز ەسكى عيماراتتا جاتتىقتى. بۇگىن مىنە مەكتەپتى پايدالانۋعا بەردىك. قولداعان بارشا جىگىت، اۋىل تۇرعىندارىنا العىسىمدى بىلدىرەمىن. بۇعان قوسا تۋ تۇعىر ورناتتىق. ءالى دە اۋىلعا بۇدان ارى قولداۋ كورسەتە بەرەمىز»،- دەدى كاسىپكەر.
قازىرگى ساتتە سپورت مەكتەبىن قۇجاتتاندىرۋ جۇرگىزىلىپ جاتىر. الداعى ۋاقىتتا جاتتىقتىرۋشىلارعا ارنايى شتات بولىنەتىن بولادى. سونداي-اق، اتالعان كۇرەس مەكتەبىنە كورشى اۋىلدىڭ بالالارى دا كەلىپ جاتتىعۋىنا مۇمكىندىك قاراستىرىلعان.