كارىس حالقىنىڭ ءداستۇرلى بەينەلەۋ ونەرىنىڭ كورمەسى ۇلتتىق مۋزەيدە اشىلدى

مادەنيەتتە شەكارا جوق.

ەلىمىزدە تۇڭعىش رەت كارىستەردىڭ ءداستۇرلى بەينەلەۋ ونەرىنەن سىر شەرتەتىن كورمە اشىلدى، دەپ حابارلايدى Almaty-akshamy.kz.

ۇلتتىق مۇراجايدا ورىن تەپكەن «سۋمۋكحۆا مونولوگى» اتتى ەكسپوزيسيادا كورەيلىك قىلقالام شەبەرلەرىنىڭ ۇلتتىق ماتەريالدارعا سيامەن سالىنعان كەسكىندەمەلىك تۋىندىلارى قويىلعان. بارلىعى 28 ەڭبەك – اتالمىش ەلدىڭ ءار وڭىرىنەن جينالعان ۇزدىك جۇمىستار.تابيعاتتىڭ اسەم كورىنىستەرى كورىنىس تاپقان تۋىندىلاردا جاھان جاراتىلىسىنىڭ فيلوسوفياسى سەكىلدى بارشا ادامزاتقا ورتاق تاقىرىپتار قوزعالادى.

مۇندا ءداستۇرلى شىعىس ازيا ۇلگىسىنىڭ زاماناۋي مانەرمەن ۇندەسكەن كەسكىندەمەلەردى تاماشالاۋعا بولادى.

«بۇل باستاپقىدا «سۋمۋكحۆا» ءستيلى بىرەگەي كورەي ماتەريالداردا باسقا تۇستەردى قوسپاي-اق، قارا سيا مەن قىلقالام ارقىلى سالىنعان ەدى. ول قاعاز بەتىندەگى سىزىقتار مەن بوس كەڭىستىكتەرگە نازار اۋدارتادى. ىشكى رۋحاني الەم جارىق رەڭكتەرى مەن قارا سيا ارقىلى كورىنەدى. كەيىن بۇل مانەر جەتىلدىرىلىپ، ۇشكە ءبولىندى. ەكىنشى ءتۇرى «تامچەحۆا» قارا سيامەن سالىنعانىمەن، باسقا تۇستەرمەن ءسال بويالعان جانە «چەسەكحۆا» اشىق تۇستەرمەن سالىنىپ، كونتۋرلارى قارا تۇسپەن بويالعان. ياعني تۇستىك شەكتەۋلەر بار»، دەدى كورەي مادەني ورتالىعىنىڭ ديرەكتورى، لي حەران.