بۇل جايىندا ۇكىمەت وتىرىسىندا ايتىلدى.
2023 جىلدان باستاپ جۇمىسسىز قالعان ازامات 6 اي بويى بۇرىنعى تابىسىنىڭ 45 پايىزىن الىپ وتىرادى. بۇل تۋرالى بۇگىن ۇكىمەت وتىرىسىندا ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«الەۋمەتتىك كودەكستىڭ ءتورتىنشى جاڭالىعى الەۋمەتتىك ساقتاندىرۋ جانە زەينەتاقى جۇيەلەرىنە قاتىستى. قازىرگى جۇيە الەۋمەتتىك تاۋەكەلدەردىڭ 5 ءتۇرىن ساقتاندىرادى. بۇل – حالىقارالىق ستاندارتتارعا جانە ناقتى ەكونوميكالىق جاعدايلارعا ساي كەلەتىن جۇيە. سوندىقتان، ول ساقتالادى. دەگەنمەن، ماقساتى وزگەرەدى. جۇيە الەۋمەتتىك تولەم تولەۋگە عانا باقىتتالماي، ەڭ الدىمەن فورمالدى فورماتتا جۇمىس ىستەۋگە ىنتالاندىرۋدى كوزدەيتىن بولادى»، - دەدى تامارا دۇيسەنوۆا.
مينيستر بۇل ماقساتتى ورىنداۋ ءۇشىن، ەڭ الدىمەن شاعىن بيزنەستەگى جالدامالى قىزمەتكەرلەر، پلاتفورمانىڭ كومەگىمەن جۇمىس ىستەپ جۇرگەن ازاماتتارعا قاتىستى سالىقتىق جۇكتەمەلەردى تومەندەتۋ قاراستىرىلاتىنىن ايتتى. ەكىنشىدەن، الەۋمەتتىك جارنالارىن ۋاقتىلى اۋدارىپ وتىرعان جۇمىسكەرلەرگە ساقتاندىرۋ قورلارىنان الەۋمەتتىك تولەمدەر مولشەرى كەزەڭ-كەزەڭىمەن ۇلعايتىلادى.
«كەلەر جىلدان باستاپ جۇمىسسىز قالعان ازاماتتارعا جارنالارىن تولەگەن ۋاقىتىنا سايكەس، 6 ايعا دەيىن بۇرىنعى تابىسىنىڭ 45 پايىزىن تولەۋ قاراستىرىلىپ وتىر»، - دەدى ول.