كەيىنگى ۋاقىتتا الەۋمەتتىك جەلىدە تاراعان جاڭا ايىپپۇل تۇرلەرى كولىك جۇرگىزۋشىلەرىنىڭ نازارىن اۋداردى. جول قوزعالىسى قاۋىپسىزدىگىن كۇشەيتۋ ماقساتىندا اكىمشىلىك قۇقىقبۇزۋشىلىقتار كودەكسىنە ەنگىزىلگەن وزگەرىستەر ەلدىڭ تالقىسىنا ءتۇستى. ولاردىڭ اراسىندا جالعانى دا، تاڭعالدىرعانى دا بار. سونىمەن، جۇرگىزۋشىلەر كەيىنگى ايتىلعان ەرەجەلەردەن نەنى ءبىلۋى كەرەك؟ اqshamnews.kz ءتىلشىسى زەرتتەپ كوردى.
كولىك تەرەزەسىنەن قولىن شىعارعاندارعا ايىپپۇل سالىناتىنى راس پا؟
2025 جىلدان باستاپ جولاۋشىلاردىڭ كولىك تەرەزەسى نە ليۋگىنەن دەنە مۇشەلەرىن شىعارۋى، قوزعالىس كەزىندە ەسىك اشقانى ءۇشىن جۇرگىزۋشىگە 10 اەك (39 320 تەڭگە) كولەمىندە ايىپپۇل سالىنادى. بۇل نورما بۇرىن دا بولعان، ءبىراق ايىپپۇل قاراستىرىلماعان ەدى.
مۇنداي شارا جاستاردىڭ ۇيلەنۋ تويى مەن مەكتەپ ءبىتىرۋ كەشتەرىندە قاۋىپسىزدىكتى ەلەمەي، كولىك تەرەزەسىنەن شىعىپ كەتۋ جاعدايلارىنان كەيىن قابىلدانعان. ءىىم اكىمشىلىك پوليسيا كوميتەتىنىڭ باسشىسى قايسار سۇلتانبايەۆتىڭ ايتۋىنشا، بۇل ەرەجە ازاماتتاردىڭ ءومىرى مەن دەنساۋلىعىن قورعاۋعا باعىتتالعان.
ماسەلەن، ەگەر كولىك قوزعالىپ تۇرعان كەزدە جولاۋشىنىڭ قولى، باسى كولىك شەكاراسىنان شىعىپ، ءقاۋىپ توندىرسە – بۇل زاڭبۇزۋشىلىققا جاتادى. مۇنداي جاعدايدا جاۋاپكەرشىلىك جۇرگىزۋشىگە دە، جولاۋشىعا دا جۇكتەلەدى. ءىىم تۇسىندىرۋىنشە، تەمەكى شەگۋ ءۇشىن تەرەزە اشىپ، قولدى ءسال شىعارعانى ءۇشىن بىردەن ايىپپۇل سالىنبايدى.
جىلدامدىقتى 60 كم/ساع-تان اسىرعاندارعا — 157 مىڭ تەڭگە ايىپپۇل
2025 جىلدان باستاپ جىلدامدىقتى ساعاتىنا 60 كم/ساع جانە ودان دا كوپ مولشەردە اسىرعان جۇرگىزۋشىلەرگە 40 اەك كولەمىندە ايىپپۇل سالىنادى. بۇل — 157 280 تەڭگە.
ءىىم اكىمشىلىك پوليسيا كوميتەتىنىڭ ءتوراعاسى قايسار سۇلتانبايەۆتىڭ ايتۋىنشا، قالا ماڭىنداعى تراسسالاردا ورناتىلعان ورتاشا جىلدامدىقتى باقىلاۋ جۇيەلەرى ارقىلى 15 مىڭنان استام وسىنداي بۇزۋشىلىق انىقتالعان.
قارسى جولاققا شىققاندار 9 ايعا كۋالىكتەن ايىرىلادى
قارسى باعىتقا شىعۋ ەرەجەسى دە كۇشەيتىلدى. ەگەر بۇرىن مۇنداي ارەكەت جول-كولىك وقيعاسىنا اكەلمەسە – جۇرگىزۋشى 6 ايعا جۇرگىزۋشى كۋالىگىنەن ايىرىلاتىن. ال ەندى ەگەر قارسى جولاققا شىعۋ اپاتقا سەبەپ بولسا، جۇرگىزۋشى 9 ايعا كولىك جۇرگىزۋ قۇقىعىنان ايىرىلادى. بۇل وزگەرىس جازا مولشەرىنىڭ قاۋىپكە ساي بولۋىن قامتاماسىز ەتۋ ءۇشىن ەنگىزىلدى.
ايتا كەتەيىك، ناۋرىز ايىندا دا ءبىرقاتار وزگەرىستەر ەسكەرتىلگەن ەدى. ماسەلەن تەمىرجول وتكەلىنەن ءوتۋ ەرەجەسىن بۇزعاندار – 20 اەك كولەمىندە ايىپپۇل تولەيدى (بۇرىن 10 ەدى)، ال ەگەر اپاتقا سەبەپ بولسا – 9 ايعا كۋالىگىنەن ايىرىلادى. سونداي-اق، جەدەل جاردەم مەن پوليسيا كولىگىنە جول بەرمەگەندەرگە – 20 اەك ايىپپۇل سالىنادى (بۇرىن 7)، قايتالانسا – 40 اەك جانە 20 ساعات قوعامدىق جۇمىس (2025 جىلدىڭ 1 قىركۇيەگىنەن باستاپ).