ءبىلىم نىساندارىنداعى بالالار قاۋىپسىزدىگى – باستى نازاردا.
الماتى وبلىسىندا بالالاردىڭ قاۋىپسىزدىگىن قامتاماسىز ەتۋ ماقساتىندا بارلىق مەكتەپتەر، ياعني 760 مەكتەپ، 186 بالاباقشا جانە 43 كوللەدج تولىعىمەن بەينەباقىلاۋ كامەرالارىمەن قامتىلعان، دەپ حابارلايدى Almaty-akshamy.kz وبلىس اكىمىنىڭ باسپا ءسوز قىزمەتىنە سىلتەمە جاساپ.
ءقازىر وسى كامەرالاردى جەدەل باسقارۋ ورتالىعىنا بايلانىستىرۋ جۇمىستارى ءجۇرىپ جاتىر. بۇل تۋرالى بۇگىن پرەمەر-مينيستر اسقار ءماميننىڭ توراعالىعىمەن سەلەكتورلىق رەجيمدە وتكەن ۇكىمەت وتىرىسىندا ءبىلىم بەرۋ وبەكتىلەرىنىڭ قاۋىپسىزدىگىن قامتاماسىز ەتۋ تۋرالى وبلىس اكىمى اماندىق باتالوۆتىڭ بايانداماسىندا ايتىلدى.
جالپى، الماتى وبلىسىندا 760 جالپى ءبىلىم بەرەتىن مەملەكەتتىك مەكتەپتە 428 مىڭ وقۋشى ءبىلىم الۋدا. وبلىس اكىمى بالالاردىڭ قاۋىپسىزدىگىن قامتاماسىز ەتۋ ءۇشىن بارلىق مەكتەپتەر مەن بالاباقشالاردا جانە كوللەدجدەردە جالپى سانى 989 كامەرا ورناتىلعانىن ايتتى. الايدا، بۇل كامەرالار جەدەل باسقارۋ ورتالىعىنا شىعارىلماعان. وسىعان بايلانىستى وڭىردە مەكتەپتەردەگى قاۋىپسىزدىك جۇيەسىن ستاندارتقا سايكەس جاڭعىرتۋ جۇمىستارى باستالدى.
«بيىلعى جىلى وبلىستىق ماڭىزى بار تالدىقورعان، تەكەلى جانە قاپشاعاي قالالارىنىڭ 47 مەكتەبىنىڭ بەينەباقىلاۋ جۇيەسى جاڭارتىلىپ، پوليسيا دەپارتامەنتىنىڭ جەدەل باسقارۋ ورتالىعىنا شىعارىلادى. بۇل ماقساتقا وبلىستىق بيۋدجەتتەن 250 ملن. تەڭگە ءبولىندى. سونداي-اق وسى مەكتەپتەردە 187 ملن. تەڭگەگە باقىلاۋ جۇيەسى بار تۋرنيكەتتەر ورناتىلادى جانە مەكتەپتەردى مامانداندىرىلعان كۇزەت كومپانيالارى كۇزەتەتىن بولادى»، - دەدى اماندىق باتالوۆ.
بايانداماشىنىڭ سوزىنە سۇيەنسەك، بيىل وبلىس مەكتەپتەرىن 100 پايىز «دابىل تۇيمەلەرىمەن» قامتاماسىز ەتۋ ءۇشىن بيۋدجەتتەن 106،4 ملن. تەڭگە قارالعان. ال 2022 جىلدىڭ سوڭىنا دەيىن 713 مەكتەپتە قاۋىپسىزدىك جۇيەلەرى جاڭارتىلاتىن بولادى.
وڭىردە 743 جالپى ءبىلىم بەرەتىن مەكتەپ جىلى دارەتحانالارمەن قامتاماسىز ەتىلگەن، قالعان 17 دارەتحانا بيىلعى جىلدىڭ سوڭىنا دەيىن جوندەلەدى.
اماندىق باتالوۆ وقۋشىلاردىڭ اراسىندا بۋللينگتەن قورعانۋ جونىندە الدىن الۋ جۇمىستارىن جۇرگىزۋ ءۇشىن جەرگىلىكتى بيۋدجەتتەن 30 ملن. تەڭگە بولىنگەنىن اتاپ ءوتتى. سول سياقتى كامەلەتكە تولماعاندارعا شۇعىل ەكسپەريمەنتتىك-پسيحولوگيالىق كەڭەس بەرۋ ءۇشىن 21 جۇمىس توبى قۇرىلعان. وسى جەردە ايتا كەتسەك، «رەسۋرس» بالالاردىڭ پسيحيكالىق جاعدايىن دياگنوستيكالاۋدىڭ اۆتوماتتاندىرىلعان جۇيەسى ارقىلى 7-11 سىنىپتاردىڭ 99 مىڭعا جۋىق وقۋشىسى كومپيۋتەرلىك تەستىلەۋدەن وتكەن، سونداي-اق 1084 پەداگوگ-پسيحولوگ قايتا دايارلاۋ كۋرستارىندا وقىتىلدى.
سونىمەن بىرگە بالالاردىڭ قاۋىپسىزدىگىن قامتاماسىز ەتۋ ءۇشىن وبلىستا سوڭعى ەكى جىلدا 940 ملن. تەڭگەدەن استام سوماعا وقۋشىلار تاسىمالدايتىن 71 جاڭا زاماناۋي ۇلگىدە جابدىقتالعان اۆتوبۋستار ساتىپ الىنىپ بەرىلگەن.