جەتىسۋ اۋدانىندا ازاماتتارعا ءتيىمدى دە تۇراقتى الەۋمەتتىك قولداۋ كورسەتۋ بويىنشا جۇيەلى جۇمىس ىستەلىپ جاتىر. بۇل باعىتتاعى نەگىزگى شارۋا – وتباسىلىق ينستيتۋتتى نىعايتۋ، ءومىر ساپاسىن ارتتىرىپ، حالىقتىڭ الەۋمەتتىك وسال توپتارىن قولداۋ بولىپ قالىپ وتىر.
جۇمىستىڭ باستى كەڭسەسى – جانسۇگىروۆ كوشەسى، 65 مەكەنجايىندا ورنالاسقان «باقىتتى وتباسى» وتباسىن قولداۋ ورتالىعى. اۋدان اكىمى ءلاززات جىلقىبايەۆا وڭىرلىك كوممۋنيكاسيالار قىزمەتىمەن بىرلەسىپ ۇيىمداستىرىلعان پرەسس-تۋر بارىسىندا ورتالىقتىڭ جۇمىسى تۋرالى ايتتى.
2025 جىلدىڭ قاڭتارىندا ورتالىقتا كۇردەلى جوندەۋ جۇمىسى اياقتالىپ، جاڭا قۇرال-جابدىقتارمەن قامتاماسىز ەتىلگەن، تۇرعىندارعا قاجەتتى قىزمەتتى كورسەتۋ ءۇشىن بارلىق جاعداي جاسالىپتى.
«ورتالىق جۇزدەگەن وتباسى ءۇشىن سەنىمدى تىرەككە اينالدى. مۇندا ومىردەگى ماڭىزدى ماسەلەلەر بويىنشا كەشەندى كومەك كورسەتۋ – كەڭەستەن باستاپ قيىن جاعدايدا سۇيەمەلدەۋ جاعى دا ەسكەرىلگەن. ءقازىر ورتالىقتا 475 ادام تىركەلگەن، ولارعا 4370-تەن استام الەۋمەتتىك، پسيحولوگيالىق، قۇقىقتىق قىزمەت كورسەتىلدى»، – دەيدى ءلاززات جىلقىبايەۆا.
«باقىتتى وتباسى» ورتالىعىنىڭ نەگىزگى باعىتى:
• وتباسىلىق قاتىناستار مەن بالا تاربيەسى بويىنشا كەڭەس بەرۋ؛
• داعدارىستا پسيحولوگيالىق قولداۋ كورسەتۋ؛
• جۇمىسپەن قامتىپ، الەۋمەتتىك بەيىمدەلۋگە جاردەمدەسۋ؛
• قۇقىقتىق كومەك پەن اعارتۋ جۇمىسى؛
• كوپبالالى جانە از قامتىلعان وتباسىلارعا قولداۋ كورسەتۋ.
ورتالىقتا ترەنينگتەر، وتباسىلىق كلۋبتار، دارىستەر مەن جەكە كەڭەستەر ۇيىمداستىرىلىپ، ءار ادامنىڭ ءوزىن سەنىمدى، ءقاۋىپسىز سەزىنۋىنە كومەكتەسەدى. «باقىتتى وتباسى» – بۇل جاي عانا مەكەمە ەمەس، بۇل – سەنىم مەن قولداۋ.
زەينەتكەرلەرگە كەڭ اۋقىمدى قىزمەت كورسەتەتىن بەلسەندى ۇزاق ءومىر ءسۇرۋ ورتالىقتارىنىڭ جۇمىسىنا دا ەرەكشە نازار اۋدارىلعان.
«بىزدە جۇمىس قىزىپ جاتىر. كۇنىنە جوسپار بويىنشا 100 ادامدى قابىلدايمىز، ءبىراق كەيدە ودان دا كوپ ادام كەلەدى. ورتالىقتىڭ باعىتتارى ءارتۇرلى، اسىرەسە سكانديناۆيالىق ءجۇرىس، پسيحولوگيالىق قولداۋ مەن ەموسيالىق ينتەللەكتى دامىتۋعا ارنالعان ساباقتار تانىمال. قارتتارعا جايلى جاعدايدىڭ بولعانى اسا ماڭىزدى. ادامدار ساباققا قۋانا قاتىسىپ، كۇن سايىن العىس ايتادى، بۇل بىزگە شابىت بەرەدى. وسىنداي جوبالار قالانىڭ ءار اۋدانىندا ىسكە اسىرىلۋى قاجەت دەپ ويلايمىن»، – دەپ اتاپ ءوتتى اينابۇلاق شاعىن اۋدانىنداعى بەلسەندى ۇزاق ءومىر ءسۇرۋ ورتالىعىنىڭ جەتەكشىسى بوتاگوز قۇدىشيەۆا.
جەتىسۋ اۋدانىندا تابىستى جۇمىس ىستەپ جاتقان باسقا دا ورتالىقتار:
• «Ten Qogam» ورتالىعى – مۇمكىندىگى شەكتەۋلى ازاماتتارعا مامانداردىڭ كومەگىن، كۋرستار مەن كاسىبي باعدار بەرۋ قىزمەتىن ۇسىنادى. بۇگىنگە دەيىن 130 ادامعا 304 ءتۇرلى قىزمەت كورسەتكەن.
• «شىڭعا ورلەۋ» كلۋبى – 137 بالاعا ءتىل، ماتەماتيكا، IT سالالارى بويىنشا ءبىلىم بەرىپ، شىعارماشىلىق ۇيىرمەلەر ۇسىنادى.
• اينابۇلاق پەن كەمەلدەگى بەلسەندى ۇزاق ءومىر ءسۇرۋ ورتالىقتارى –
• 318 زەينەتكەرگە 4800-دەن استام قىزمەت كورسەتىپ، يوگا، ايكۋنە، قولونەر، حورەوگرافيا، كومپيۋتەرلىك ساۋاتتىلىق، ءتىل ۇيرەتۋ سەكىلدى باعىتتاردى قامتىعان.
جەتىسۋ اۋدانىنىڭ اكىمدىگى وتباسىلارعا، بالالارعا، قارتتار مەن ەرەكشە قاجەتتىلىگى بار ازاماتتارعا قولجەتىمدى قىزمەتتەردى دامىتىپ، الەۋمەتتىك قورعاۋ جۇيەسىن نىعايتۋ جۇمىستارىن ودان ارى جالعاستىرا تۇسپەك.