الماتىدا 28 گۆارديالىق-پانفيلوۆشىلار اتىنداعى ساياباقتا اسكەري وركەستردىڭ سۇيەمەلدەۋىمەن جاس بۋىندى اسكەرگە سالتاناتتى تۇردە شىعارىپ سالدى.
ءىس-شاراعا الماتى گارنيزونىنىڭ اسكەري قىزمەتشىلەرى، اسكەري-تەحنيكالىق مەكتەپتىڭ، «جاس سارباز» اسكەري-پاتريوتتىق قوزعالىسىنىڭ تاربيەلەنۋشىلەرى، قارۋلى كۇشتەردىڭ ارداگەرلەرى، اسكەرگە شاقىرىلۋشىلاردىڭ تۋعان-تۋىستارى قاتىستى.
– قازىرگى ۋاقىتتا ءبىز شەكارا قىزمەتىنىڭ بولىمشەلەرىن جاساقتادىق. ەندى قارۋلى كۇشتەردى جاساقتاۋ باستالدى. بۇل قورعانىس ۆەدومستۆوسىنىڭ اسكەري بولىمدەرىنە جونەلتىلەتىن العاشقى لەك، – دەدى الماتى قالاسى قورعانىس ىستەرى جونىندەگى دەپارتامەنتىنىڭ باستىعى پولكوۆنيك تالعات وزەحان.
اسكەرگە شاقىرىلۋشىلار دەسانتتىق-شابۋىلداۋ اسكەرلەرىنە بورىشىن وتەۋگە اتتانادى. اسكەر قاتارىنا الىنعاندارعا قارۋلى كۇشتەردىڭ ارداگەرلەرى مەن اتا-انالارى ءوز تىلەكتەرىن ءبىلدىردى.
– ۇلىما سەنەمىن. جاۋاپكەرشىلىگى مول. وزىنە بالا كەزىنەن اسكەري ماماندىق ۇنايتىن، سوندىقتان ونىڭ كوڭىل-كۇيى دە جاقسى، – دەدى اسكەرگە شاقىرىلۋشىنىڭ اناسى گۇلشات مەلكوۆا.
ەستەرىڭىزگە سالا كەتسەك، كۇزگى ناۋقان بارىسىندا الماتىدان مىڭنان استام ازامات اسكەرگە شاقىرىلادى. جاستار قارۋلى كۇشتەردىڭ اسكەري بولىمدەرىندە، ۇقك شەكارا قىزمەتىندە، مەملەكەتتىك كۇزەت قىزمەتىندە جانە ۇلتتىق ۇلاندا قىزمەت وتكەرەتىن بولادى.