بۇل - بىرەگەي سپورتشىنىڭ بيىلعى 70 جىلدىعىنا ارنالعان ايتۋلى شارانىڭ باسى.
بۇگىن داڭقتى سپورتشى، ماسكەۋ وليمپياداسىنىڭ جۇلدەگەرى، قازاقستاننىڭ ەڭبەك ەرى جاقسىلىق ۇشكەمپىروۆتىڭ ءومىر جولى تۋرالى جازىلعان «بىرتۋار-ۋنيكالنىي» كىتابى وقىرمانعا جول تارتتى، دەپ حابارلايدى Almaty-akshamy.kz الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ.
كىتاپ اۆتورى، جازۋشى، قازاقستاننىڭ ەڭبەك سىڭىرگەن قايراتكەرى، «الاش» ادەبي سىيلىعىنىڭ يەگەرى ساۋلە دوسجانوۆا بۇل روماندا جاقسىلىق ۇشكەمپىروۆتىڭ بالالىق شاعىنان اتى اڭىزعا اينالعان داڭقتى كەزەڭىنە دەيىنگى عيبراتتى عۇمىرىن ارقاۋ ەتكەن. كىتاپ الماتى وبلىسى اكىمدىگىنىڭ قولداۋىمەن جارىق كورگەن.
كىتاپتىڭ تالدىقورعانداعى سالتانات سارايىندا وتكەن تۇساۋكەسەرىنە وبلىس اكىمى اماندىق باتالوۆ، قوعام جانە مەملەكەت قايراتكەرى، گەنەرال-پولكوۆنيك ءسات توقپاقبايەۆ، كىتاپ اۆتورى، جازۋشى ساۋلە دوسجانوۆا، قازاقستان جازۋشىلار وداعى باسقارما ءتوراعاسىنىڭ ورىنباسارى باۋىرجان جاقىپ، جاقسىلىق ۇشكەمپىروۆتىڭ جارى كۇلپان مۇقاش قىزى مەن ۇلدارى ەلدوس پەن جەڭىس، ءبىرقاتار تانىمال جاتتىقتىرۋشىلار مەن بەلگىلى سپورتشىلار جانە وڭىردەگى زيالى قاۋىم وكىلدەرى قاتىستى.
الدىمەن قوناقتار فويەگە قويىلعان ساۋلە دوسجاننىڭ كىتاپتارىنان جاساقتالعان كورمەمەن تانىستى. مۇنان سوڭ دوڭگەلەك ۇستەل باسىندا سالتاناتتى جيىندى اشقان وبلىس اكىمى اماندىق باتالوۆ ەلجاندى ازامات، داڭقتى سپورتشى جاقسىلىق ۇشكەمپىروۆتىڭ ەل سپورتىن دامىتۋعا، تۋعان جەرىن تۇلەتۋگە، اۋىل شارۋاشىلىعىن وركەندەتۋگە قوسقان ۇلەسى تۋرالى قىسقاشا ايتىپ ءوتتى.
«جاقسىلىق ۇشكەمپىروۆ بارشا قازاقتىڭ جاقسىلىعى ەدى، بولمىسى تازا، بىلەكتى دە جۇرەكتى، باۋىرماشىل، قاراپايىم جان ەدى. جاقسىلىق اعامىزبەن مەن كوپ جىل جاقىن ارالاسىپ، دوس بولدىم. وليمپياداداعى جەڭىستى جولى، ەلباسىنىڭ قولىنان قازاقستاننىڭ ەڭبەك ەرى اتاعىن الۋى، اۋىل شارۋاشىلىعىندا جەمىستى جۇمىس ىستەپ، ءوڭىر حالقىنا مەيىرىم-شاپاعاتىن تيگىزگەنى – وسىنىڭ ءبارىن ءبىز جاستارعا ۇلگى ەتۋىمىز كەرەك. جازۋشى ساۋلە دوسجاننىڭ جاقسىلىق اعامىز تۋرالى جازعان كىتابىنا قولداۋ جاساپ، بۇگىن تۇساۋكەسەرىن وتكىزىپ وتىرمىز. شاراعا ۇشكەمپىروۆتەر وتباسىنان جارى، بالالارى قاتىسىپ وتىر. بۇگىندە ەلدوس اكەسىنىڭ ءىزىن باسىپ، وبلىستىڭ قوعامدىق ومىرىنە بەلسەنە ارالاسىپ كەلەدى. جاقسىلىق ۇشكەمپىروۆتىڭ سپورتتاعى جولىن جالعايتىن ورەندەردى تاربيەلەۋگە دە بار جاعداي جاساپ كەلەمىز. ەلباسىنىڭ تاپسىرماسىمەن وبلىستا 16 سپورت كەشەنىن سالدىق»، - دەپ اتاپ ءوتتى اماندىق باتالوۆ.
سول سياقتى وبلىس اكىمى ءوز سوزىندە ايگىلى سپورتشىنىڭ ەسىمىن وبلىستىق بالالار مەن جاسوسپىرىمدەر مەكتەپ-ينتەرنات كوللەدجىنە بەرۋ جۇمىستارى ءجۇرىپ جاتقانىن دا اتاپ ءوتتى.
مۇنان سوڭ ءسوز العان مەملەكەت جانە قوعام قايراتكەرى، گەنەرال-پولكوۆنيك ءسات توقپاقبايەۆ بيىل ەل تاۋەلسىزدىگىنىڭ 30 جىلدىعى ەكەنىن، سونىڭ اياسىندا دارابوز سپورتشىنىڭ عيبراتتى عۇمىرىن كىتاپ ەتىپ شىعارۋدىڭ ماڭىزى زور ەكەنىن اتاپ ءوتتى.
سول سياقتى جاقسىلىق ۇشكەمپىروۆتىڭ جارى كۇلپان مۇقاش قىزى جازۋشى ساۋلە دوسجانوۆاعا، شىعارماعا قولداۋ تانىتقان وبلىس باسشىلىعىنا ريزاشىلىعىن جەتكىزدى. قازاقستان جازۋشىلار وداعى باسقارما ءتوراعاسىنىڭ ورىنباسارى باۋىرجان جاقىپ بيىلعى بالالار ادەبيەتىن قولداۋ جىلىندا وسىنداي تاعىلىمدى كىتاپ جازعان قالامگەردىڭ، كىتاپتىڭ جارىق كورىنە جاردەمدەسكەن وبلىستىڭ ءىسى وزگەلەرگە ۇلگى بولارلىق ەكەنىن ايتتى. سول سياقتى ج.ۇشكەمپىروۆتىڭ دوسى نۇرماحان قاراتايەۆ سپورتشىنىڭ ادامگەرشىلىك، ىزگىلىك قاسيەتتەرىنە توقتالدى. عالىم، فيلولوگيا عىلىمىنىڭ دوكتورى ايگۇل ءىسماقوۆا جاڭا تۋىندىنىڭ بالالار ادەبيەتىنە قوسىلعان سۇبەلى ۇلەس ەكەنىن جەتكىزدى. كىتاپتىڭ تۇساۋى كەسىلىپ، وقىرماندارعا جول تارتتى.
كىتاپ «بالالار ادەبيەتىن قولداۋ جىلىنا» وراي الماتى وبلىسى اكىمى اماندىق عابباس ۇلىنىڭ قولداۋىمەن باسىلدى. عۇمىرنامالىق كىتاپتا پالۋاننىڭ بالالىق شاعىنان باستاپ ۇلكەن سپورتقا كەلۋىنە، وليمپيادانىڭ جەڭىس تۇعىرىنا كوتەرىلۋىنە دەيىنگى ونەگەلى ءومىرى قامتىلعان.