الەۋمەتتىك، ينجەنەرلىك، جول-كولىك ينفراقۇرىلىمىنىڭ بەلسەندى دامۋىنىڭ ارقاسىندا جاڭا شاعىن اۋداندار بيزنەس-جوبالاردى ىسكە اسىرۋ ءۇشىن تارتىمدى بولا باستادى. بۇل تۋرالى «جاڭا الماتىنى» دامىتۋدىڭ 2020-2024 جىلدارعا ارنالعان كەشەندى جوسپارىن ىسكە اسىرۋ قارقىنىن دوڭگەلەك ۇستەلدە ساراپتامالىق تالقىلاۋ بارىسىندا ايتىلدى دەپ حابارلايدى almaty-akshamy.kz
دوڭگەلەك ۇستەلدە سويلەگەن سوزىندە قالالىق ستراتەگيا جانە بيۋدجەت باسقارماسىنىڭ باسشىسى الماس باتانوۆ شەت ەلدەردە بيزنەستى دامىتۋ «جاڭا الماتىنى» دامىتۋدىڭ كەشەندى جوسپارىنىڭ باعىتتارىنىڭ ءبىرى ەكەنىن اتاپ ءوتتى.
«التى زاۋىت پەن التى ساۋدا ءۇيىنىڭ قۇرىلىسى قاراستىرىلعان. بارلىق نىساندار بويىنشا جاقسى ديناميكا بايقالادى، بۇل نىساندار مەرزىمىندە تاپسىرىلادى. وسىلايشا، التى ونەركاسىپتىك كاسىپورىننىڭ بەسەۋى ىسكە قوسىلدى»، - دەدى الماس باتانوۆ.
«جاڭا الماتى» دكج جۇزەگە اسىرۋ اياسىندا وتكەن جىلى قۇنى 28 ملرد تەڭگە بولاتىن «Hyundai Trans Kazakhstan» ج ش س اۆتوكولىك قۇرالدارىن شىعاراتىن زاۋىت ىسكە قوسىلدى. سونداي-اق مەتالل وڭدەۋ جانە جىلجىمالى قورشاۋ كونسترۋكسيالارىن، اۆتوماتتى قاقپالاردى ءوندىرۋ بويىنشا «دور-حان-الماتى» ج ش س زاۋىتى پايدالانۋعا بەرىلدى.
قاعاز سۇلگىلەر مەن مايلىقتار شىعاراتىن «Papirone» ج ش س جاڭا سەحىنىڭ قۇرىلىسى اياقتالدى.
سونداي-اق، الماس باتانوۆ «سولنەچنىي» ج ش س ءسۇت زاۋىتىن جاڭعىرتۋ اياسىندا ءونىم اسسورتيمەنتىن كەڭەيتۋ جانە تۇزدىقتار، مايونەزدەر مەن كەچۋپتەر ءوندىرۋ، وسىمدىك مايىن قۇيۋ بويىنشا كەشەن سالۋ ءۇشىن قوسىمشا جابدىق ساتىپ الىنعانىن حابارلادى. كاسىپورىننىڭ قۋاتتىلىعى جىلىنا 10 مىڭ توننادان 30 مىڭ تونناعا دەيىن ارتادى.
اعىمداعى جىلدىڭ سوڭىنا دەيىن «كاز-ديا-تەست» ج ش س مەديسينالىق ماقساتتاعى دياگنوستيكالىق تەستىلەردى ءوندىرۋ زاۋىتىن ىسكە قوسۋ جوسپارلانۋدا. قازىرگى كەزدە ىسكە قوسۋ-جوندەۋ جۇمىستارى، ەلەكتر جەتكىزۋ، جابدىقتى ورناتۋ جۇرگىزىلۋدە.
قالانىڭ ونەركاسىپتىك الەۋەتىن دامىتۋ بيزنەسكە ءتيىستى ينجەنەرلىك ينفراقۇرىلىمى بار جەر ۋچاسكەلەرى بەرىلەتىن يندۋستريالىق ايماقتى دامىتۋمەن تىعىز بايلانىستى.