ەرلان تۇرعىمبايەۆ: كوروناۆيرۋستىق پاندەمياعا وراي ينتەرنەت قىلمىستار كوبەيدى

وكىنىشكە قاراي، ينتەرنەت ارقىلى الدانىپ جاتقان ازاماتتار وتە كوپ.

كوروناۆيرۋستىق پاندەمياعا وراي ينتەرنەت سالاسىنداعى قىلمىستار ءوستى، – دەپ حابارلايدى Almaty-akshamy.kz Polisia.kz سايتىنا سىلتەمە جاساپ. 

- ونلاين-قىزمەتتەردىڭ دامۋىنا وراي، ينتەرنەتپەن جاسالاتىن الاياقتىق ەكى ەسە كوبەيدى. وسى قىلمىستاردىڭ ناتيجەسىندە ازاماتتارعا 67 ملن. تەڭگە شىعىن كەلدى. وسىعان بايلانىستى، ىشكى ىستەر مينيسترلىگى كيبەرقىلمىسپەن كۇرەس ورتالىعىنىڭ جۇمىسىن كۇشەيتتى. تەك وسى قىلمىستاردى اشاتىن ارنايى توپتار قۇرىلدى. جاۋاپكەرشىلىككە 450 ادام تارتىلدى.

باسقا مەملەكەتتەرمەن قارىم-قاتىناس جاساپ، الاياقتارمەن كۇرەسۋ ءۇشىن تىعىز جۇمىس ىستەپ جاتىرمىز. ويتكەنى شەتەلدە ءجۇرىپ، ازاماتتاردى الدايتىندار كوبەيدى. وسى جىلدىڭ وزىندە رەسەي، بەلارۋس، ۋكراينا ەلدەرىنەن قازاقستان ازاماتتارىن الداعان ءۇش مىڭعا جۋىق فاكت تىركەلدى.

وكىنىشكە قاراي، ينتەرنەت ارقىلى الدانىپ جاتقان ازاماتتار وتە كوپ. كۇندەلىكتى تەلەارنا مەن گازەتتەردە، الەۋمەتتىك جەلىلەردە ساقتىق شارالارى تۋرالى ماتەريالدار بەرىلۋدە. ونلاين-ساۋدا جاساۋ كەزىندە ازاماتتار اباي بولۋى قاجەت ەكەنىن ەسكەرتەمىز. ءقازىر ۇلتتىق بانكپەن جانە ەكىنشى دەڭگەيلى بانكتەرمەن تىعىز قارىم-قاتىناس ورناتىپ، ازاماتتاردىڭ جەكە مۇلكىن قورعاۋ ءۇشىن قادامدار جاسالۋدا، - دەدى ىشكى ىستەر ءمينيسترى.