قازاقستاندىقتاردىڭ ءار ساپارىن ىشكى ىستەر مينيسترلىگى باقىلايتىن بولدى، دەپ حابارلايدى aqshamnews.kz
ءتيىستى بۇيرىققا قازاقستاننىڭ كولىك ءمينيسترىنىڭ مىندەتىن اتقارۋشى قول قويدى.
قازاقستاندا 31 تامىزدان باستاپ اۋە، تەمىرجول جانە تەڭىز كولىكتەرىمەن جۇرەتىن جولاۋشىلار تۋرالى مالىمەتتەر قۇقىق قورعاۋ جانە ارنايى مەملەكەتتىك ورگاندارعا بەرىلەتىن بولدى. بۇل وزگەرىستەر حالىقارالىق ستاندارتتارعا سايكەستەندىرۋ ءۇشىن ەنگىزىلىپ وتىر.
اۋە كومپانيالارى، ونىڭ ىشىندە شەتەلدىك تاسىمالداۋشىلار دا، جولاۋشىلار مەن ەكيپاج تۋرالى دەرەكتەردى ەكى مارتە – رەيسكە 48 ساعات قالعاندا جانە تىركەۋ اياقتالعان سوڭ جولدايدى. مالىمەتتەر ىشىندە ءاتى-جونى، تۋعان كۇنى، جىنىسى، ازاماتتىعى، قۇجات دەرەكتەرى، رەيس ءنومىرى، ۇشىپ شىعۋ جانە كەلۋ ۋاقىتى مەن باعىتى، ورىن ءنومىرى، باگاج اقپاراتى جانە (جولاۋشى كەلىسسە) بايلانىس دەرەكتەرى بولادى.
پويىز بيلەتتەرى تۋرالى اقپارات تاۋلىگىنە 5 رەتكە دەيىن، ال تەڭىز كولىگى بويىنشا تاۋلىگىنە 4 رەتكە دەيىن جولدانادى. جينالاتىن دەرەكتەردىڭ ىشىندە جولاۋشىنىڭ ءاتى-جونى، قۇجات دەرەكتەرى، ساپار باعىتى جانە كەلىسىم بولسا، بايلانىس ءنومىرى بار.
بارلىق مالىمەت استانا ۋاقىتى بويىنشا تىركەلەدى جانە 5 جىل بويى ساقتالادى.
سونىمەن قاتار ەتنيكالىق شىعۋ تەگى، ساياسي كوزقاراس، ءدىني نەمەسە فيلوسوفيالىق سەنىم، كاسىپوداققا قاتىستىلىق پەن جىنىستىق باعدار سياقتى جەكە مالىمەتتەردى جيناۋعا تىيىم سالىنعان.