قازاقستاندا بلوكچەين سالاسى بويىنشا الەمدەگى ەڭ اۋقىمدى پيلوتتىق ءبىلىم بەرۋ باعدارلاماسى ىسكە قوسىلادى، دەپ حابارلايدى Almaty-akshamy.kz Inform.kz-كە سىلتەمە جاساپ.
بۇل ارقىلى قازاقستان جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىندا بلوكچەين تەحنولوگيالارى سالاسى بويىنشا 40 مىڭنان استام مامان دايىنداماق. وسى ماقساتتا بۇگىن ەلوردادا ەكى مينيسترلىك، ۇلتتىق بانك جانە «Binance Kazakhstan» ۇيىمدارى ءوزارا ىنتىماقتاستىقتا جۇمىس ىستەۋگە كەلىسىپ، مەموراندۋمعا قول قويدى.
«Binance Academy-مەن مەموراندۋمعا قول قويۋ ءراسىمى – «Binance» باس ديرەكتورى چانپەن چجاونىڭ مامىرداعى ساپارى اياسىندا باستالعان سەرىكتەستىكتىڭ جەمىستى جالعاسى. وسى كەلىسىم شەڭبەرىندە كادرلاردى دايىنداۋ الەمدىك كريپتويندۋستريادا قازاقستاندىق تەحنولوگيالار ۇلەسىن ۇلعايتۋعا جانە قازاقستاندا ايماقتىق حابتى دامىتۋ ماقساتىنا جەتۋگە مۇمكىندىك بەرەدى»، - دەدى سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين.
باعدارلامانى ەنگىزۋ ءتورت كەزەڭ بويىنشا جۇرەدى. العاشىندا جوو-نىڭ وقىتۋشىلارى ءۇشىن ارنايى باعدارلاما ازىرلەنەدى. كەيىن ۋنيۆەرسيتەتتەردىڭ وقىتۋشىلىق قۇرامى ارنايى كۋرستاردان وتەدى. سودان سوڭ، ۇستازدار مەن جوو-نىڭ باسشىلىعى بىرلەسىپ، اكادەميالىق باعدارلاما ازىرلەيدى. باعدارلاما 4-5 پاننەن تۇرادى. سوڭعى كەزەڭدە ستۋدەنتتەرگە وسى سالا بويىنشا ءبىلىم بەرۋ باستالادى. جوو وقىتۋشىلارىن وقىتۋ جانە ترەنينگ وتكىزۋ 2023 جىلى اقپان ايىندا باستالىپ، مامىرعا دەيىن جالعاسادى. ال، باستى كونتينگەنت – ستۋدەنتتەردى وقىتۋ 2023 جىلدىڭ قىركۇيەگىنەن باستالادى.
«ءبىزدىڭ ەكونوميكامىز ءۇشىن باسەكەگە قابىلەتتى مامانداردى دايارلاۋعا مۇددەلى بولا وتىرىپ، IT سالاسىنىڭ وكىلدەرىمەن بىرلەسىپ، بۇل باعىت بويىنشا ءبىلىم بەرۋ جوبالارىن ودان ءارى دامىتۋدىڭ بەرىك ىرگەتاسىن قالاماقپىز. ءبىزدىڭ جەمىستى ىنتىماقتاستىعىمىزدىڭ ارقاسىندا قازاقستاندىق جوعارى ءبىلىم بەرۋ جۇيەسى ەل ەكونوميكاسىنىڭ مۇقتاجدىعى ءۇشىن عانا ەمەس، جاھاندىق ەڭبەك نارىعى ءۇشىن دە بلوكچەين يندۋسترياسى سالاسىنداعى مامانداردى جەتكىزۋشى بولاتىنىنا سەنىمدىمىن»، - دەدى عىلىم جانە جوعارى ءبىلىم ءمينيسترى ساياسات نۇربەك.
بلوكچەين تەحنولوگيالارى سالاسىنداعى العاشقى قازاقستاندىق ماماندار 2024 جىلى شىعارىلادى.