وقۋ-اعارتۋ مينيسترلىگى ايتىس اقىندارى مەن جىرشى-تەرمەشىلەردىڭ حالىقارالىق وداعىمەن بىرلەسىپ «ەگەمەندىگىم - ەلدىگىم» تاقىرىبىندا رەسپۋبليكالىق «قولا دومبىرا» وقۋشىلار ايتىسىن ۇيىمداستىردى.
وعان ەلىمىزدىڭ 20 وڭىرىنەن 12-18 جاس ارالىعىنداعى 22 جاس اقىن قاتىستى، دەپ حابارلايدى aqshamnews.kz وقۋ-اعارتۋ مينيسترلىگىنە سىلتەمە جاساپ.
وقۋ-اعارتۋ ءمينيسترى عاني بەيسەمبايەۆ ايتىس ۇلتتىق قۇندىلىقتارىمىزدى اقىندىق ونەر ارقىلى جاس ۇرپاققا ناسيحاتتاۋ عانا ەمەس، سونداي-اق وقۋشىلاردى ادال، سانالى، جاسامپاز ازامات رەتىندە تاربيەلەۋدىڭ رۋحاني قۇرالى دەپ اتاپ ءوتتى.
«مەملەكەت باسشىسىنىڭ ۇلتتىق قۇرىلتايدىڭ «ادىلەتتى قازاقستان – ادال ازامات» اتتى ەكىنشى وتىرىسىندا ايتقان ماڭىزدى ماقساتتارىنىڭ بىرىنە قول جەتكىزۋ ءۇشىن مينيسترلىك جالپىادامزاتتىق جانە ۇلتتىق قۇندىلىقتار، پاتريوتيزم مەن ەڭبەكقورلىق قاعيداتتارىنا نەگىزدەلگەن «ءبىرتۇتاس تاربيە» باعدارلاماسى اياسىندا ءبىرقاتار شارالاردى جۇزەگە اسىرۋدا. كەز كەلگەن ەلدىڭ بىرلىگى مەن وركەندەۋى ۇلتتىق تاربيە مەن رۋحاني قۇندىلىقتاردى دارىپتەۋگە بايلانىستى. ايتىس – ونەر سايىسى عانا ەمەس، جاستارىمىزدىڭ شىعارماشىلىق، رۋحاني-مادەني الەۋەتىن دامىتاتىن، ەستەتيكالىق تاربيە جۇيەسىن جەتىلدىرەتىن ماڭىزدى الاڭ»، - دەدى عاني بەيسەمبايەۆ.
ايتا كەتۋ كەرەك، ايتىس «ءبىرتۇتاس تاربيە» باعدارلاماسى اياسىندا بەكىتىلگەن «ءتورت توقسان – ءتورت ونەر» ۇلتتىق مادەني-اعارتۋشىلىق جوباسىنىڭ العاشقى توقسانىن قورىتىندىلايدى.
ايتىستىڭ جەڭىمپازدارى مەن جۇلدەگەرلەرى:
باس جۇلدە جانە «قولا دومبىرا» يەگەرى – يسلام ءالي ءبىرجان ۇلى (شىمكەنت قالاسى)؛
I ورىندى بەيبىت بايجىگىت (ماڭعىستاۋ وبلىسى) يەلەندى؛
II ورىندى اراي نۇرادين (اقتوبە وبلىسى)، ايعانىم ماقسۇتحانوۆا (استانا قالاسى) ءبولىستى؛
III ورىن – راۋان نۇرشابەكوۆ (الماتى وبلىسى)، نۇريسلام روگاتوۆ (قوستاناي وبلىسى)، ەراسىل سەيىتجان ۇلى (الماتى قالاسى).
بارلىق قاتىسۋشىلارعا العىس حاتتار مەن قارجىلاي سىياقىلار تابىس ەتىلىپ، جاس اقىنداردىڭ تالىمگەر-ۇستازدارىنا ق ر وقۋ-اعارتۋ ءمينيسترىنىڭ العىس حاتى بەرىلدى. سونداي-اق جاس اقىندار ارنايى جۇلدەلەرمەن دە ماراپاتتالدى. «قولا دومبىرا» وقۋشىلار ايتىسىنىڭ جىل سايىنعى جەڭىمپازىنا ل.گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ ءبىلىم گرانتى بەرىلەدى.