جول كارتالارىندا ودان ءارى گازداندىرۋ، قوعامدىق كولىكتى گاز وتىنىنا كوشىرۋ، قالالاردى كوگالداندىرۋ جانە ت. ب. شارالار قاراستىرىلعان.
وڭىرلەردەگى ەكولوگيالىق جاعدايدى جاقسارتۋ ماقساتىندا 17 جول كارتاسى بەكىتىلدى، دەپ حابارلايدى Almaty-akshamy.kz ق ر ەكولوگيا، گەولوگيا جانە تابيعي رەسۋرستار مينيسترلىگىنىڭ باسپا ءسوز قىزمەتىنە سىلتەمە جاساي وتىرىپ.
بۇل تۋرالى ق ر ەكولوگيا، گەولوگيا جانە تابيعي رەسۋرستار ماعزۇم مىرزاعالييەۆ حالىققا ەسەپ بەرۋ كەزدەسۋىندە ايتتى.
«ولاردى ىسكە اسىرۋ قالدىقتاردى وڭدەۋ دەڭگەيىن قازىرگى 18%-دان 30%-عا دەيىن جەتكىزۋگە، قاتتى تۇرمىستىق قالدىقتارعا ارنالعان 24 جاڭا پوليگوندار سالۋعا، تاريحي لاستانعان جەرلەردى قالپىنا كەلتىرۋگە جانە جويۋعا، 7 جاڭا قۇرىلىس سالۋعا جانە 12 كاناليزاسيالىق تازارتۋ كەشەندەرىن قايتا قۇرۋعا جانە ت.ب. مۇمكىندىك بەرەدى. جالپى العاندا، ەلدە 485 شارانىڭ جۇزەگە اسىرىلۋى قاراستىرىلعان. ءبىرىنشى توقساننىڭ سوڭىندا ءبىز جول كارتالارىن ىسكە اسىرۋ بارىسى تۋرالى حالىقپەن كەزدەسۋلەر وتكىزدىك. تالداۋ كورسەتكەندەي، بيىلعى جىلدىڭ ءبىرىنشى توقسانىندا 70 شارا قاراستىرىلعان، ونىڭ 42ء-سى اياقتالدى»، - دەدى ماعزۇم مىرزاعالييەۆ.
ەكولوگيالىق مونيتورينگ قورىتىندىسى بويىنشا تەمىرتاۋ، نۇر-سۇلتان، الماتى، اقتوبە، اتىراۋ، وسكەمەن، قاراعاندى، بالقاش، جەزقازعان، شىمكەنت قالالارىندا اتموسفەرالىق اۋانىڭ لاستانۋ دەڭگەيى جوعارى. لاستاۋشى زاتتار شىعارىندىلارى مەن توگىندىلەرىنىڭ 2020 جىلعى كورسەتكىشى 2019 جىلعى كورسەتكىشكە ۇقساس، ياعني كولەمى 2،5 ملن.توننانى، توگىندىلەر 1،1 ملن. توننانى قۇرادى.
«قالالارداعى اۋانىڭ لاستانۋى ماسەلەلەرىن شەشۋ ءۇشىن ءبىزدىڭ قاتىسۋىمىزدىڭ ارقاسىندا ءبىرقاتار كومپانيالاردىڭ لاستاۋشى زاتتار شىعارىندىلارىن ازايتۋ تۋرالى كەلىسىمدەر جاسالدى. وسىلايشا، الماتىدا 2 جانە 3-جەو جاڭارتۋ تۋرالى شەشىم قابىلداندى. قاراعاندى وبلىسىندا قول قويىلعان مەموراندۋمعا سايكەس، «ارسەلورميتتال تەمىرتاۋ» اق 2025 جىلعا دەيىن اتموسفەراعا شىعارىندىلاردى 30% تومەندەتۋگە مىندەتتەنەدى جانە تەمىرتاۋ قالاسىنىڭ اينالاسىندا 500 مىڭ اعاش وتىرعىزىلادى» - دەدى مينيستر.