الماتى قالاسىنىڭ تەرروريزمگە قارسى كوميسسياسى تۇراقتى تۇردە حالىق اراسىندا اقپاراتتىق ءتۇسىندىرۋ جۇمىستارىن جۇرگىزىپ وتىرادى.
جاقىندا الماتى قالاسى ءدىن ىستەرى جونىندەگى باسقارماسىنىڭ ۇيىمداستىرۋىمەن «تولە بي»، «مۋزامميل»، «الي-مۇحاممەد» جانە «ۆايناح» مەشىتتەرىنىڭ جاماعاتىمەن «ءدىني ساۋاتتىلىق – اداسپاۋدىڭ ايعاعى» تاقىرىبىنا ءدارىس وتكىزىلدى.
ساباق ماقساتى – قالالىق ءدىني قاۋىمداستىقتارىڭ جۇمىسىمەن تانىستىرۋ جانە دىنگە جاڭا بەت بۇرعان جاستار اراسىندا راديكالدىق كوزقاراستار مەن سەنىمدەردىڭ تارالۋىنا جول بەرمەۋ.
سپيكەرلەر رەتىندە الماتى قالاسى «كەڭەس بەرۋ جانە وڭالتۋ ورتالىعى تەولوگى»، ءدىنتانۋ ماگيسترى – ايبار قويشىبايەۆ پەن «نۇر-مۇباراك» ۋنيۆەرسيتەتنىڭ اعا وقىتۋشىسى، ماگيستر يسلامتانۋشى – نۇرجان ستامباكييەۆ ءدارىس وقىدى.
كەزدەسۋ بارىسىندا، مەشىت قاۋىمىنا قازاقستان رەسپۋبليكاسىنىڭ زايىرلى مەملەكەت ەكەنى، ءداستۇرلى دىنگە جاتپايتىن تۇسىنىكتەر مەن كوزقاراستاردى ناسيحاتتاۋعا بولمايتىنى تۋرالى ايتىلدى. سونىمەن قاتار، جات اعىم ۇستانۋشىسىنىڭ ءداستۇرلى يسلام وكىلىنەن قانداي بەلگىلەرى ارقىلى اجىراتۋعا بولاتىنىنا مىسال كەلتىرىلدى.
ءدىنتانۋشىلاردىڭ ايتۋىنشا، پسيحيكالىق تۇرعىدان ءالسىز، قاتتى كۇيزەلىسكە ۇشىراعان، تىم اڭعال جانە ءدىن سالاسىنداعى ءبىلىمى وتە تومەن بولا تۇرا، ءدىني ماسەلەلەر قاراستىرىلاتىن ءدىني قوعامدار مەن قاۋىمداستىقتارعا باراتىن ادامدار ءداستۇرلى ەمەس ءدىني اعىم وكىلدەرىنىڭ ارباۋىنا ءجيى تۇسەدى. سونىمەن قاتار، شەت ەلدە رۋحاني ءبىلىم الۋ كەزىندە راديكالدى يدەولوگيانىڭ ىقپال ەتۋ مۇمكىندىگى زور.
ساباق سوڭىندا تىڭداۋشىلارعا شەتەلدىك كۇماندى تەولوگيالىق وقۋ ورىندارى ايتىلدى.
وتكىزىلگەن ءىس-شارا تىڭداۋشىلاردىڭ ءدىني ساۋاتتىلىعىن ارتتىرۋعا جانە راديكالدى يدەولوگيالارعا يممۋنيتەتتى قالىپتاستىرۋعا ۇلەسىن قوستى.