دەنساۋلىق مىقتى بولسا، ادامي كاپيتال ساپاسى دا ارتادى
الماتى قالاسىنىڭ اكىمى باقىتجان ساعىنتايەۆتىڭ 25 ماۋسىمداعى تىكەلەي ەفيردە وتكەن بريفينگىنە قالا تۇرعىندارى پىكىر ءبىلدىرىپ جاتىر. سولاردىڭ ءبىرى «الماتى ستۋدەنتتەر اليانسى» قف باسشىسى جاسۇلان بوستاندىق ۇلى، دەپ حابارلادى Almaty-akshamy.kz.
«كەشە عانا الماتى قالاسىنىڭ اكىمى باقىتجان ءابدىر ۇلىنىڭ تىكەلەي ەفيردە حالىق الدىنا شىعىپ، وزىندىك ەسەپ بەرۋى، سونىمەن قاتار حالىق كوكەيىندەگى كوپتەگەن سۇراقتارعا جاۋاپ بەرۋ بريفينگىن كوردىك. بۇل نەگىزىنەن پرەزيدەنتىمىز قاسىم-جومارت كەمەل ۇلىنىڭ "حالىق ۇنىنە قۇلاق اساتىن مەملەكەت" تۇجىرىمداماسى نەگىزىندە جۇزەگە اسىرىلدى. كەشە ءبىر اشىق ديالوگ الاڭى بولدى. ەلدىڭ كوكەيىندە جۇرگەن سۇراقتاردىڭ ءبىرشاماسى قويىلدى. بۇل بريفينگتى تىكەلەي ەفيردە الەۋمەتتىك جەلىدە باقىلادىم. ايتىلعانداردىڭ ىشىندە، الماتى قالاسى اكىمدىگى تاراپىنان كورسەتىلىپ جاتقان الەۋمەتتىك كومەككە توقتالعىم كەپ تۇر. بىزدە قالادا جاسالىپ جاتقان الەۋمەتتىك كومەكتىڭ بارلىعى تىكەلەي حالىقتىڭ سۇرانىسىنا، مۇڭ-مۇقتاجىنا باعىتتالعان. ونىڭ ىشىندە، اتاپ وتەتىن بولساق، تۇرعىندارعا «ءۇي سەرتيفيكاتتارىن» تابىستاۋ «باقىتتى وتباسى» باعدارلاماسى نەگىزىندە حالىقتىڭ وسال توپتارىنا، اتاپ ايتار بولساق، كوپ بالالى وتباسى، مۇگەدەك جاندار، جەتىم بالالارعا قايتارىمسىز نەگىزدە 1 ملن. تەڭگە جارنا بەرۋى – بۇل ۇلكەن كەزەك كۇتتىرمەس ماسەلە. سەبەبى، بۇگىندە باسپانا كەز كەلگەن قازاقستان ازاماتىنىڭ وزەكتى ماسەلەسىنىڭ ءبىرى. وعان باستاپقى جارنا قۇيۋ، اقشا جيناۋ دەگەن سىندى دۇنيەلەردىڭ بارلىعى قيىندىق تۋدىرادى. ال وسى تۇستى اكىمدىك تاراپىنان بەرىلىپ وتىرعان 1 ملن. تەڭگە حالىققا ءوز كەزەگىندە ۇلكەن مۇمكىندىك بەرىپ وتىر. بريفينگتە قاراستىرىلعان تاعى ءبىر ماسەلە – جەدەل جاردەم قىزمەتكەرلەرىن قولداۋ. ءقازىر الەمدىك احۋال – پاندەميا جاعدايى ءبىزدىڭ دارىگەرلەردىڭ قانشالىقتى ماڭىزدى ادام ەكەنىن كورسەتتى. بۇل ۋاقىتقا دەيىن دە دارىگەرلەرگە باسا كوڭىل ءبولىنىپ كەلدى، ال مىنا پاندەميا جاعدايىندا ءبىز دارىگەرلەردى ودان سايىن قۇرمەتتەي تۇستىك. بۇل كىسىلەرگە ءارتۇرلى ۇستەماقى مەن ماراپاتتاۋ دەگەن سىندى دۇنيەلەردىڭ بارلىعى – بۇل دارىگەرلەر ءۇشىن قۋانتارلىق جاعداي. سەبەبى، وزدەرىنىڭ ماڭىزدى تۇلعا ەكەنىن سەزىنۋ ارقىلى ءوز جۇمىستارىن ودان ءارى قۇلشىنا ىستەيدى. كورسەتىلىپ جاتقان كومەكتەر دارىگەر ستاتۋسىنىڭ كوتەرىلۋىنە سەپتىگىن تيگىزەدى. بىزدە ادامي كاپيتال ساپاسىنىڭ نەگىزگى كورسەتكىشتەرىنىڭ ءبىرى – بۇل دەنساۋلىق ساقتاۋ سالاسى بولىپ تابىلادى. ياعني ادامي كاپيتال ساپاسى ادامنىڭ دەنساۋلىعى جاقسى بولعان جاعدايدا وسەدى. وسى تۇرعىدا اكىمدىك تاراپىنان كورسەتىلىپ جاتقان كومەكتەر دارىگەرلەردى ىنتالاندىرادى دەپ ويلايمىن»، - دەدى جاسۇلان بوستاندىق ۇلى.