الماتى اكىمى "تازا قازاقستان" باستاماسىن جۇزەگە اسىرۋعا جاستاردى كوپتەپ تارتۋدى تاپسىردى، - دەپ حابارلايدى aqshamnews.kz ءتىلشىسى.
الماتىدا قالا اكىمى دارحان ساتىبالدىنىڭ توراعالىعىمەن "تازا قازاقستان" جالپىرەسپۋبليكالىق ەكولوگيالىق ناۋقانىن جۇزەگە اسىرۋ ماسەلەسى بويىنشا كەڭەيتىلگەن كەڭەس ءوتتى. جيىندا اتقارىلعان جۇمىستاردىڭ ناتيجەلەرى، ۆەدومستۆوارالىق ءوزارا ءىس-قيمىلدىڭ تيىمدىلىگى جانە الداعى ۋاقىتتاعى باسىم باعىتتار، سونىڭ ىشىندە تۇرعىنداردى ەكولوگيالىق اكسيالارعا تارتۋ ماسەلەلەرى تالقىلاندى.
جاستاردىڭ ەكولوگيالىق باستامالارعا كوپتەپ قاتىسۋىنا ەرەكشە نازار اۋدارىلدى. قالا باسشىسى اتاپ وتكەندەي، ءدال وسى بۋىن قالاداعى قورشاعان ورتاعا جاۋاپكەرشىلىكپەن قاراۋ مەن تۇراقتى تازالىق مادەنيەتىن قالىپتاستىرۋدا شەشۋشى ءرول اتقارادى.
ايتا كەتەيىك، الماتىدا جاستاردى تارتۋ ماقساتىندا ەڭبەك جاساقتارى، ەرىكتىلەر قوزعالىسى، "جاسىل ەل"، "ەكورەيندجەرلەر" جوبالارى، ستۋدەنتتىك قاۋىمداستىقتار مەن كوميۋنيتي-ورتالىقتار قالا اكىمدىگىنىڭ جوبالىق كەڭسەسىنىڭ قولداۋىمەن بەلسەندى جۇمىس ىستەپ جاتىر.
"جاسىل ەل" اياسىندا 2 مىڭنان استام جاس سەنبىلىكتەر مەن تانىمدىق ءىس-شارالارعا قاتىستى. 144 000 جاسىل جاسىل جەلەك تەكسەرىلىپ، 35 رۇقساتسىز قوقىس الاڭى انىقتالدى. كوميۋنيتي-ورتالىقتار شاعىن ەكوحابتار رەتىندە جۇمىس ىستەپ، تۇراقتى تۇتىنۋ مادەنيەتى مەن رەسۋرستاردى ۇقىپتى پايدالانۋ ادەتىن قالىپتاستىرىپ وتىر. بۇل باستامالارعا 15 مىڭنان استام الماتىلىق جاس قامتىلعان.
"تازا قازاقستان" اكسياسى باستالعالى الماتىدا 170-تەن استام ءىس-شارا ۇيىمداستىرىلىپ، 35 مىڭنان استام ادامدى قامتىدى. قالا تۇرعىندارى سەنبىلىكتەرگە، ەكولوگيالىق رەيدتەرگە جانە وزگە دە جوبالارعا بەلسەندى قاتىسىپ كەلەدى.
سونىمەن قاتار كەرى بايلانىس ءۇشىن سيفرلىق قۇرالدار ىسكە اسىرىلۋدا. بيىل شىلدەدە TazaQazBot پلاتفورماسى ارقىلى قالا تۇرعىندارىنان 305 ءوتىنىش ءتۇستى. ولاردىڭ باسىم بولىگى شەشىمىن تاپتى. ءقازىر سانيتارلىق تازالاۋ، قوقىس شىعارۋ، اعاشتاردى كەسۋ مەن بۇتاۋ، سۋارۋ جۇيەلەرىن قالپىنا كەلتىرۋ جۇمىستارى جۇرگىزىلىپ جاتىر. جاسىل قوردى باقىلاۋ جانە پروبلەمالىق اۋماقتاردى رەتكە كەلتىرۋ جۇمىستارى قاتار اتقارىلىپ وتىر.
دارحان ساتىبالدى "تازا قازاقستان" ءبىر رەتتىك اكسيا ەمەس، جاڭا قالا مادەنيەتىن قالىپتاستىرۋعا باعىتتالعان جۇيەلى جۇمىس ەكەنىن اتاپ ءوتتى. جيىن قورىتىندىسى بويىنشا الماتى اكىمى جاستاردىڭ اتسالىسۋىن كۇشەيتۋدى، كرەاتيۆتى فورماتتار مەن سيفرلىق باستامالاردى قولداۋدى، اۋماقتاردىڭ سانيتارلىق جاعدايىنا تۇراقتى مونيتورينگ جۇرگىزۋدى جانە حالىق اراسىندا TazaQazBot پلاتفورماسىنىڭ قولدانىس اياسىن كەڭەيتۋدى تاپسىردى.