الماتى اكىمى دارحان ساتىبالدى بوستاندىق اۋدانىنداعى نىسانداردى جاڭعىرتۋ جۇمىستارىن بەلگىلەنگەن مەرزىمدە اياقتاۋدى تاپسىردى، - دەپ حابارلايدى aqshamnews.kz.
الماتى اكىمى دارحان ساتىبالدى جۇمىس ساپارىمەن بوستاندىق اۋدانىنا باردى. ساپار رەسپۋبليكا الاڭىنداعى قالا اكىمدىگى عيماراتىنىڭ جانىنداعى سۋبۇرقاقتاردى ارالاۋدان باستالدى. ءقازىر مۇندا اكىمدىكتىڭ شىعىس جانە باتىس جاعىنداعى الاڭدا جانە مۇسىرەپوۆ تەاترى جانىنداعى ءتورت سۋبۇرقاق كەشەنىندە كۇردەلى جوندەۋ جۇرگىزىلىپ جاتىر. جوبا اياسىندا ينجەنەرلىك جۇيەلەر تولىق جاڭارتىلىپ، جاڭا سورعىلار مەن جارىقديودتى جۇيەلەر ورناتىلماق.
دارحان ساتىبالدى جوبانى بەلگىلەنگەن مەرزىمدە اياقتاۋ ءۇشىن مەردىگەردىڭ جۇمىس قارقىنىن كۇشەيتىپ، ساپانى باقىلاۋدى ارتتىرۋ قاجەتىن اتاپ ءوتتى. جوندەۋ 2025 جىلى قازان ايىندا اياقتالادى دەپ جوسپارلانىپ وتىر. شاھار باسشىسى جۇمىس دەمالىس كۇندەرى دە توقتاماي، مەجەلى مەرزىمنەن كەشىكپەۋ كەرەك دەپ ەسكەرتتى.
ساپار بارىسىندا اكىم ەرمەنساي شاعىناۋدانىنا دا ات باسىن بۇردى. مۇندا تابيعي اپاتتىڭ سالدارىن جويۋعا باعىتتالعان اۋقىمدى جوبا قولعا الىنعان. جوبا اياسىندا ۇزىندىعى 7 شاقىرىمدىق سۋ جانە كارىز جۇيەلەرىنىڭ قۇبىرى توسەلىپ، ەكى سۋ سورعى ستانسياسى سالىنادى، كوشەلەر كوركەيتىلەدى. اكىم بۇل جوبانىڭ تەك جوسپارعا ساي ءجۇرۋى جەتكىلىكسىز ەكەنىن، ونى جىل سوڭىنا دەيىن تولىق اياقتاپ، ىسكە قوسۋ قاجەتىن ايتتى. سەبەبى بۇل جۇمىس جەكە سەكتورلار مەن جاڭا تۇرعىن ءۇي كەشەندەرىندەگى بىرنەشە مىڭ تۇرعىندى تازا اۋىز سۋمەن قامتاماسىز ەتۋگە باعىتتالعان.
ال جاڭگىر حان كوشەسىندە اكىم جاۋىن-شاشىن كوپ تۇسكەندە جينالاتىن سۋ دەڭگەيى ءبىر مەترگە دەيىن جەتەتىن ۋچاسكەنى ارالادى. مۇندا شىلدە ايىندا سۋ سورعى ستانسياسى مەن سۋ بۇرۋعا ارنالعان ەكى قۇبىر جەلىسىنىڭ قۇرىلىسى باستالماق. دارحان ساتىبالدى بۇل جۇمىستى 2025 جىلى جەلتوقسانعا دەيىن اياقتاپ، اكىمدىكتىڭ ءتيىستى بولىمدەرىمەن كەلىسىم جۇمىستارىن دەر كەزىندە جۇرگىزۋدى تاپسىردى. بۇل بولاشاقتا تۇرعىن ۇيلەرگە بارۋ مەن كولىك قوزعالىسىندا قيىندىقتار تۋىنداماۋى ءۇشىن ماڭىزدى.
ساپار ودان ءارى كەرەڭقۇلاق وزەنىنىڭ جاعالاۋىندا جالعاستى. مۇندا قالا اكىمى جاعالاۋدى كوركەيتۋ جوباسىن قاراپ شىقتى.
"مۇندا قوقىس وتە كوپ، بارلىعىن تازارتۋ كەرەك"، – دەدى دارحان ساتىبالدى وزەن جاعاسىن ارالاۋ كەزىندە. سونىمەن قاتار ول كەرەڭقۇلاق وزەنىن كورىكتەندىرۋگە قاتىستى جوبالىق-سمەتالىق قۇجاتتامانى جەدەل ازىرلەۋدى تاپسىردى. "بارلىعى جۇمىستىڭ قالاي ۇيىمداستىرىلاتىنىنا بايلانىستى. ەگەر مىقتى مەردىگەر بولسا، جۇمىستى جىلدام بىتىرەدى"، – دەدى قالا اكىمى.
جوبا شامامەن 2 شاقىرىم وزەن جاعالاۋىن قامتيدى. وندا تەررەنكۋر، سپورت جانە بالالارعا ارنالعان ويىن الاڭدارى، فۋدكورت، دەمالىس ايماعى مەن مۇز ايدىنى سالىنباق. اكىمنىڭ باستى تالابى – قولدانىستاعى الما باقتارى مەن تابيعي لاندشافتتى ساقتاپ قالۋ. وسىعان بايلانىستى جوبا قايتا قارالىپ، وسى تالاپتار ەسكەرىلۋى ءتيىس.
نۇرتازين كوشەسىندەگى № 190 مەكتەپتە قىستاعى جەر سىلكىنىسىنەن كەيىن قابىرعالاردا، دالىزدەر مەن سپورت زالىندا جارىقتار پايدا بولعان. تەحنيكالىق ساراپتاما عيماراتتىڭ قازىرگى قاۋىپسىزدىك تالاپتارىنا ساي كەلمەيتىنىن انىقتادى. مۇندا 417 بالا وقىعان، الايدا مەكتەپتىڭ جوبالىق قۋاتى نەبارى 300 ورىن. كۇن سايىن 80-گە جۋىق وقۋشى المااراسان، كوكشوقى، كازاچكا جانە ت.ب. تاۋ بوكتەرىندەگى ەلدى مەكەندەردەن قاتىناپ وقيدى.
ساپار بارىسىندا اكىم وسى مەكتەپكە قاتىستى جاڭا قۇرىلىس جوباسىمەن تانىستى. جوبا اياسىندا ەسكى عيماراتتىڭ ورنىنا ءبىر اۋىسىمدا وقۋعا مۇمكىندىك بەرەتىن زاماناۋي مەكتەپ سالۋ جوسپارلانىپ وتىر. ول 600 وقۋشىعا ارنالماق.
ساپار سوڭىندا اكىم ۇلكەن الماتى وزەنىنىڭ ارناسىنداعى 5،7 شاقىرىمعا سوزىلعان اۋقىمدى قايتا جاڭعىرتۋ جوباسىن قاراپ شىقتى. جوبا اياسىندا ۆەلوجولاقتار، كوپىرلەر، بالالار الاڭدارىن سالۋ مەن جارىقتاندىرۋ، كوگالداندىرۋ جۇمىستارى قاراستىرىلعان. قالا باسشىسى قۇرىلىس مەرزىمىن قاتاڭ ساقتاۋ مەن كۇندەلىكتى جاعالاۋدا سەرۋەندەيتىن تۇرعىنداردىڭ قاۋىپسىزدىگىنە باسا نازار اۋدارۋدى تاپسىردى.
جۇمىس ساپارىنىڭ قورىتىندىسى بويىنشا، قالا اكىمى اكىمدىك باسقارمالارى مەن مەردىگەرلەرگە قۇرىلىس جۇمىستارىنىڭ ساپاسى مەن مەرزىمىن قاتاڭ ساقتاۋعا قاتىستى ناقتى تاپسىرمالار بەردى. ءاربىر نىسان شاھار باسشىسىنىڭ ءجىتى باقىلاۋىندا بولادى.