25 تامىزدا «تاتار-ينفورم» اقپارات اگەنتتىگىندە اباي اتىنداعى قازاق ۇلتتىق وپەرا جانە بالەت تەاترىنىڭ گاسترولدەرى مەن حاميت شانعالييەۆتىڭ «حان سۇلتان. التىن وردا» وپەراسىنىڭ پرەمەراسىنا ارنالعان باسپا ءسوز كونفەرەنسياسى ءوتتى.
26 تامىز كۇنى مۇسا جالەل اتىنداعى تاتار مەملەكەتتىك اكادەميالىق وپەرا جانە بالەت تەاترىنىڭ ساحناسىندا اباي اتىنداعى قازاق ۇلتتىق وپەرا جانە بالەت تەاترىنىڭ گاسترولدىك باعدارلاماسى اياسىندا حاميت شانعالييەۆتىڭ «حان سۇلتان. التىن وردا» وپەراسىنىڭ پرەمەراسى ۇسىنىلادى.
گاسترولدەر قازاقستان رەسپۋبليكاسى كونستيتۋسياسىنىڭ 30 جىلدىعىنا ورايلاستىرىلىپ، قازاقستان رەسپۋبليكاسىنىڭ مادەنيەت جانە اقپارات مينيسترلىگىنىڭ، تاتارستان رەسپۋبليكاسى مادەنيەت مينيسترلىگىنىڭ جانە قازاقستان رەسپۋبليكاسىنىڭ تاتارستانداعى باس كونسۋلدىعىنىڭ قولداۋىمەن وتۋدە.
وپەرانىڭ نەگىزگى وقيعاسى — التىن وردانىڭ قۇرىلۋ كەزەڭى. باستى كەيىپكەر — حان سۇلتان، جوشى حاننىڭ ءۇشىنشى جارى، ۇلى حان بەركەنىڭ اناسى. ول ءوزىنىڭ اقىل-پاراساتى، مىنەزى مەن ساياسي كورەگەندىگى ارقاسىندا التىن وردا تاريحىندا ماڭىزدى ورىن الىپ، ءوز ۇلدارىن جوشى ۇلىسىنىڭ ءىرى مەملەكەت قايراتكەرلەرىنە اينالدىردى.
التىن وردانىڭ تاريحي مۇراسى — تۇركى حالىقتارىن بىرىكتىرەتىن رۋحاني قازىنا. وسىعان بايلانىستى قويىلىمعا تۇركىتىلدەس ەلدەردىڭ عىلىمي ورتالىقتارى مەن عالىمدارى ۇلكەن ۇلەس قوستى. عىلىمي كەڭەسشىلەر قاتارىندا: التىن وردا جانە تاتار حاندارى زەرتتەۋ ورتالىعىنىڭ جەتەكشىسى يلنۋر ميرگالييەۆ، ىستامبۇلداعى مارمارا ۋنيۆەرسيتەتىنىڭ پروفەسسورى يلياس كەمالوعلۋ جانە تاريح عىلىمدارىنىڭ كانديداتى نۇرلان اتىعايەۆ بولدى.
جوبانىڭ اۆتورى — اينۇر كوپباساروۆا. «حان سۇلتان» وپەراسى دراماتۋرگ الماس ءنۇسىپتىڭ شىعارماسى نەگىزىندە جازىلىپ، مارالتاي ىبىرايەۆتىڭ ساحنالىق نۇسقاسىندا ۇسىنىلدى.
وپەرانىڭ رەجيسسەرى — داۆيدە ليۆەرمورە (يتاليا). ول Luciano Pavarotti، Plácido Domingo، José Carreras، Mirella Freni، Zubin Mehta سىندى الەمگە ايگىلى ورىنداۋشىلارمەن جانە Luca Ronconi، اندرەي تاركوۆسكيي، چجان يموۋ سەكىلدى رەجيسسەرلەرمەن جۇمىس ىستەگەن. ليۆەرمورە ميلانداعى La Scala، ريم وپەراسى، تۋريندەگى Teatro Regio، گەنۋياداعى Carlo Felice سياقتى ەۋروپانىڭ ەڭ بەدەلدى ساحنالارىندا سپەكتاكل قويعان.
قويۋشى-ديريجەر — قازاقستاننىڭ ەڭبەك سىڭىرگەن قايراتكەرى نۇرجان بايبۋسينوۆ، ول اباي اتىنداعى قازۇتوب-تىڭ باس ديريجەرى ءارى مۇسا جالەل اتىنداعى تاتار مەملەكەتتىك اكادەميالىق وپەرا جانە بالەت تەاترىنىڭ ديريجەرى بولىپ تابىلادى.
قويىلىم كلاسسيكالىق وپەرا بولا تۇرا، زاماناۋي تەحنولوگيالاردى كەڭىنەن قولدانادى. جىلدام دامىپ جاتقان زاماناۋي داۋىرگە ساي ۆيدەوكونتەنت تە ەرەكشە قولدانىلادى. ءومىر سيمۆولى سانالاتىن «توپول بۇتاعى» ساحنادا ەرەكشە شەشىممەن كورىنىس تاۋىپ، كورەرمەنگە تەرەڭ اسەر قالدىرادى.
اباي اتىنداعى قازاق ۇلتتىق وپەرا جانە بالەت تەاترى ءۇشىن بۇل — تاتارستانداعى العاشقى گاسترول. قىسقا ۋاقىتتىڭ ىشىندە بارلىق 999 بيلەت تولىقتاي ساتىلىپ، انشلاگ بولدى.