ۇلتتىق ەكونوميكا ءمينيسترى سەرىك ءجۇمانعاريننىڭ ايتۋىنشا، 7 ايدا استىق بالاماسىندا 8،9 ملن توننا استىق پەن ۇن جونەلتىلدى، دەپ حابارلايدى aqshamnews.kz
ايتۋىنشا، مەملەكەتتىك ساياسات شەڭبەرىندە سالانىڭ تۇراقتىلىعى مەن تيىمدىلىگىن ارتتىرۋعا باعىتتالعان اوك قولداۋ شارالارى ىسكە اسىرىلىپ جاتىر.
جىل سايىن ەگىس جانە ەگىن جيناۋ جۇمىستارىنا اينالىم قاراجاتى 5% جەڭىلدىكتى مولشەرلەمەمەن قارجىلاندىرىلادى. العاش رەت 2025 جىلعى دالا جۇمىستارىنا رەكوردتىق 700 ملرد تەڭگە جانە وتاندىق اۋىل شارۋاشىلىعى تەحنيكاسىنىڭ ليزينگىنە 250 ملرد تەڭگە ءبولىندى. ەگىستى قارجىلاندىرۋ وتكەن جىلعى قاراشادا باستالدى، - دەپ اتاپ ءوتتى ۆەدومستۆو باسشىسى.
سونىمەن قاتار ول ەگىستەردى ءارتاراپتاندىرۋعا توقتالدى.
مەملەكەت باسشىسىنىڭ تاپسىرماسى بويىنشا ەگىستەردى ءارتاراپتاندىرۋ جۇرگىزىلۋدە: بيداي القاپتارى 885 مىڭ گەكتارعا قىسقارتىلىپ، مايلى داقىل سياقتى جوعارى مارجينالدى داقىل ەگىستەرى 1 ملن گەكتارعا جانە ءداندى – بۇرشاقتى داقىل 278 مىڭ گەكتارعا ۇلعايتىلدى. اگروتەحنيكالىق ءىس-شارالاردى ۋاقتىلى قارجىلاندىرۋ سوڭعى جىلدارداعى ورتاشا جىلدىق كورسەتكىشتەر دەڭگەيىندە ءونىم جيناۋعا مۇمكىندىك بەرەدى، - دەدى سەرىك جۇمانعارين.
ايتۋىنشا، استىق ەكسپورتى رەكوردتىق دەڭگەيگە جەتكەن.
وسى جىلعى 7 ايدا استىق بالاماسىندا 8،9 ملن توننا استىق پەن ۇن جونەلتىلدى. ماركەتينگتىك جىلدىڭ قورىتىندىسى بويىنشا استىق ەكۆيۆالەنتىندە 13 ملن توننا ەكسپورت بولجانۋدا. استىق ەكسپورتى ورتالىق ازياعا، يرانعا، ءازىربايجانعا، رەسەي، بالتىق جاعالاۋى جانە قارا تەڭىزگە ايتارلىقتاي ءوستى. ماروككو، الجير جانە ۆەتنامعا جەتكىزىلىم باستالدى. وسىمدىك مايى ەكسپورتى 7 ايدا 384،6 مىڭ تونناعا جەتسە، ءبىر جىلعا بولجام 670 مىڭ تونناعا جۋىق، - دەيدى ۆيسە-پرەمەر.