قازاقستان بەس مەملەكەتكە قوسىمشا 4 ملرد دوللارعا دەيىن ەكسپورت جاساي الادى.
ساۋدا جانە ينتەگراسيا مينيسترلىگىنىڭ كەڭەيتىلگەن القا ماجىلىسىندە جۇڭگو، تۇركيا، ءباا، ءۇندىستان جانە يران ەلدەرىندە قازاقستاننىڭ ساۋدا وكىلدىكتەرىن قۇرۋ ماسەلەسى كوتەرىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«حالىقارالىق تاجىريبە ەكسپورتتى ساۋدا وكىلدەرى ارقىلى ىلگەرىلەتۋدىڭ ءتيىمدى ەكەنىن كورسەتىپ وتىر. قازاقستاننىڭ ازيا مەن ەۋروپا نارىعىنا جاسايتىن ەكسپورت كولەمىن ارتتىرۋعا مۇمكىندىگى مول. وسىعان بايلانىستى بىرىككەن اراب امىرلىكتەرى، جۇڭگو، تۇركيا، ءۇندىستان جانە يران سياقتى ەلدەرمەن جۇمىس ىستەيتىن ساۋدا كەڭەسشىلەرىن تاعايىنداۋ ماسەلەسى پىسىقتالىپ جاتىر»، - دەدى پرەمەر-مينيستر.
ونىڭ سوزىنشە، قازاقستان اتالعان بەس مەملەكەتكە قوسىمشا 4 ملرد دوللارعا دەيىن ەكسپورت جاساي الادى.
«ەكسپورتتى ودان ءارى قولداي ءتۇسۋ ءۇشىن، اتالعان ەلدەردەگى ساۋدا وكىلدىكتەرىن قۇرۋدى تاپسىرامىن»، - دەدى ءاليحان سمايىلوۆ القا وتىرىسىندا.