قازاقستان قۇراماسىنىڭ تۋ ۇستاۋشىلارى ابزال اجىعالييەۆ پەن ەكاتەرينا ايدوۆا
18 مامىر كۇنى لوزاننادا بەيجىڭ وليمپياداسىندا قازاقستان قۇراماسىنىڭ تۋ ۇستاۋشىلارى ابزال اجىعالييەۆ پەن ەكاتەرينا ايدوۆانىڭ اشىلۋ سالتاناتىنداعى فورمالارىن وليمپيادا مۇراجايىنا رەسمي تابىستاۋ ءراسىمى ءوتتى، دەپ حابارلايدى Almaty-akshamy.kz ۇلتتىق وليمپيادا كوميتەتىنە سىلتەمە جاساپ.
ەكسپوناتتاردى «حالىقارالىق وليمپيادا كوميتەتىنىڭ مادەني مۇراسى» جيناعىنا تاپسىرۋ تۋرالى حوك پرەزيدەنتى توماس باح قول قويعان ءتيىستى سەرتيفيكات قازاقستان ۇوك-نە تابىستالدى. بەيجىڭدە وتكەن قىسقى وليمپيادا ويىندارىنىڭ اشىلۋ سالتاناتىندا قازاقستاندىق شەبەرلەردىڭ تۋىندىسى كوپتىڭ نازارىنا بولەنىپ، ۇزدىكتەردىڭ ءبىرى دەپ تانىلدى. قازاقستاننىڭ تۋىن ۇستاپ شىققان شورت-ترەكشى ابزال اجىعالييەۆ پەن كونكيشى ەكاتەرينا ايدوۆانىڭ كيىمى حالىقارالىق وليمپيادا قاۋىمداستىعىن قاتتى تاڭ قالدىردى.
كوپتەگەن الەمدىك ب ا ق قازاقستاندىق ديزاينەرلەر جاساعان وبرازعا ءتانتى بولدى. بريتاندىق بەدەلدى The Guardian گازەتى ويىنداردىڭ اشىلۋ سالتاناتىنان كەيىن: «قازاقستان كوستيۋمدەر بايقاۋىندا جەڭىسكە جەتتى»، – دەپ جازدى. امەريكالىق The Insider باسىلىمى «ەكاتەرينا ايدوۆا كلاسسيكالىق التىن اشەكەيلەرمەن بەزەندىرىلگەن كيىمىمەن تاڭ قالدىردى» دەپ مويىندادى. سونىمەن قاتار ازيالىق ب ا ق، سونىڭ ىشىندە جاپونيانىڭ جەتەكشى ۇلتتىق گازەتى «ۋوميۋري» دە باسا نازار اۋدارىپ، «توكيوداعى وليمپيادادان كەيىن قازاقستاندىق تۋ ۇستاۋشىلاردىڭ ادەمى كيىمدەرى بەيجىڭدە ەڭ كوپ تالقىلانعان تاقىرىپقا اينالدى» دەپ اتاپ ءوتتى.
قازاقتىڭ حاس باتىرى وبرازىندا شىققان ابزال اجىعالييەۆ پەن ەكاتەرينا ايدوۆانىڭ كويلەگىندە بەينەلەنگەن ساق پاتشايىمى توميريس بەينەسىنە جوعارى باعا بەرىلگەنىن راستاي وتىرىپ، وليمپيادا مۇراجايى كوستيۋمدى «حالىقارالىق وليمپيادا كوميتەتىنىڭ مادەني مۇراسى» توپتاماسىنا ەنگىزۋدى جانە ونى تابىستاۋ بارىسىندا سالتاناتتى ءراسىم ۇيىمداستىرۋدى ۇسىندى. كوللەكسيادا سپورتشىلاردىڭ ەڭ جاقسى جابدىقتارى بار – ول وليمپيادا ويىندارىنىڭ تاريحىن جانە ولاردىڭ ەلدەردىڭ تاريحى مەن مادەنيەتىمەن تىعىز بايلانىسىن ايقىن كورسەتەدى. ەكسپوناتتاردىڭ كوپشىلىگىن سپورتشىلار وليمپيادا كەزىندە نەمەسە وليمپيادادان كەيىن سىيعا تارتقان. وسى ساتتەن باستاپ قازاقستاننىڭ تۋ ۇستاۋشىسىلارىنىڭ كيىمدەرى ۇيىمنىڭ شتاب-پاتەرى ورنالاسقان شۆەيساريالىق لوزانناداعى حوك باس مۇراجايى – الەمدىك وليمپيادالىق قوزعالىستىڭ «قازىنا قورلارىنا» كەلۋشىلەردىڭ نازارىنا ۇسىنىلادى. مۇراجاي جۇمىسىن 1915 جىلى باستاعان، 30 جىلعا جۋىق تاريحى بار. ءقازىر مۇراجايدا ويىن تاريحىنىڭ مىڭداعان قۇندى ەكسپوناتتارى ساقتالعان. جىل سايىن ولاردى كورۋگە الەمنىڭ تۇكپىر-تۇكپىرىنەن 500 مىڭنان استام ادام كەلەدى. حوك مادەني مۇرا دەپارتامەنتى وليمپيادا ويىندارىنىڭ تاريحى مەن ءداستۇرىن ساقتاي وتىرىپ، بۇكىل الەمنىڭ سپورتشىلارىن بىرىكتىرەدى. سپورتشىلاردىڭ سالتاناتتى اشىلۋ راسىمىندە كيگەن كيىمدەرى ۇلتتىق قۇندىلىقتى، مادەنيەتتى دارىپتەۋدى كوزدەي وتىرا دايىندالعان بولاتىن. التىن ورنەك كۇندى بەينەلەيدى، ال «قوشقار ءمۇيىز» دەكورى قورشاعان الەممەن ۇيلەسىمدىلىكتى، ومىرگە ۇمتىلىستى، قۇنارلىلىق پەن مولشىلىقتى بەينەلى تۇردە كورسەتەتىن گۇلدى ويۋمەن ۇيلەسەدى. ەرلەر كيىمىنىڭ نەگىزگى ەلەمەنتىنە اينالعان قالقان باتىلدىق پەن قايسارلىقتىڭ، كۇشتىڭ سيمۆولىن كورسەتەدى. ديزاينەرلەر توكيوداعى جازعى وليمپيادا ويىندارىنىڭ اشىلۋ سالتاناتىنىڭ قارساڭىنداعىداي ءابىلحان قاستەيەۆ اتىنداعى مەملەكەتتىك ونەر مۇراجايىمەن بىرگە ويۋ-ورنەك ەلەمەنتتەرىمەن دە جۇمىس ىستەدى.
Viled Group كومپانياسى كوستيۋمدەردى تىگۋ ءۇشىن يۆانوۆانىڭ دارىندى كومانداسىن ۇسىندى، ال ديزاينەر مەن ونىڭ شەبەرلەرى كەزەكتى رەت جاۋاپتى تاپسىرمانى تاماشا ورىنداپ شىقتى.
– سپورت پەن ءسان وداعى الدەقاشان الەمدىك پوديۋمداردى باعىندىردى. تيىسىنشە، وليمپيادا ويىندارىندا ءسان الەمىنە دە قاتىستى تۇساۋكەسەرلەر وتەدى. ءاربىر قاتىسۋشى ەل بىرەگەي توپتاما دايىندايدى. ءبىز جاي عانا ادەمى كوستيۋمدەردى تىگىپ قانا قويماي، ونى مۇمكىندىگىنشە ماعىنالى ەتۋدى كوزدەدىك. ءبىز قازاقستان حالقىنىڭ ءاردايىم جاندانعانىن، قۇلپىرعانىن كورگىمىز كەلەدى. سوندىقتان ويۋ-ورنەكتىڭ نەگىزى – ەڭ باستىسى ومىرلىك قۋات كوزى – كۇن جانە جەڭىمپازدار كيەتىن التىن ءتۇس تاڭدالدى. قارا ءتۇس – تەرەڭدىك پەن دانالىقتى بىلدىرەدى، سونىمەن قاتار ول «قارا شاڭىراق» – جۇزدەگەن جىلدار بويى ۇرپاقتان-ۇرپاققا جالعاسىپ كەلە جاتقان ۋاقىت وتكەن سايىن قارايعان شاڭىراققا دا قاتىستى. ءبىزدىڭ اتەلە ءۇشىن قازاقستاننىڭ وليمپيادا قۇراماسىمەن جۇمىس ىستەۋ زور مارتەبە جانە ەسىمىزدە ماڭگى قالاتىن بولادى، – دەپ ءبولىستى شەبەر ۆيولەتتا يۆانوۆا.
راسىمگە حوك وكىلدەرى وليۆە نيامكي جانە ەدۆارد كەنسينگتون، سونداي-اق قازاقستاندىق سىيلىقتى قابىلداعان وليمپيادا مۇراجايىنىڭ وكىلى پاتريسيا رەيموند قاتىستى. ەكسپوناتتاردى وليمپيادالىق سپورتشى ەكاتەرينا ايدوۆا مۋزەيگە سىيعا تارتتى.
– بەيجىڭدەگى قىسقى وليمپيادا ويىندارىنىڭ اشىلۋ سالتاناتىنا ابزال اجعالييەۆ ەكەۋمىز اياق باسقان ساتتەن باستاپ العاشقى مينۋتتاردان-اق بار نازاردىڭ كيىمدەرىمىزگە اۋدارىلعانىن تۇسىندىك. ارىپتەستەرىمىز بەن كورەرمەندەردىڭ بىزگە دەگەن كوزقاراسى ءبىزدىڭ كيىم وبرازىمىزدىڭ ەرەكشە ەكەنىن دالەلدەي تۇسكەنىن تۇسىندىك. ۋايىمدادىق، سونىمەن قاتار ماقتانىش پەن تاڭدانىس تا بولدى. شەبەرلەر ۇجىمى شەديەۆر جاسادى دەپ ەسەپتەيمىن. ءبىزدىڭ مادەنيەتىمىز بەن سالت-داستۇرلەرىمىز لايىقتى تۇردە ۇسىنىلعاندا، ءسىز ەرەكشە ماقتانىش پەن قولداۋ سەزىنەسىز. بۇگىن مەن تاعى دا تولقىپ وتىرمىن، ويتكەنى ەندى ءبىز كيگەن كەرەمەت كوستيۋمدەر الەمنىڭ تۇكپىر-تۇكپىرىندەگى ادامداردى قازاق حالقىنىڭ قايتالانباس سالت-داستۇرلەرىمەن جانە تاريحىمەن تانىستىرۋدى جالعاستىرادى، – دەپ، اسەرىمەن ءبولىستى ەكاتەرينا ايدوۆا.
لوزانناداعى كوستيۋمدەردى تاپسىرۋ راسىمىنەن كەيىن ەكاتەرينا ايدوۆا حوك مۇراعاتىنا ەنەتىن وليمپيادالىق مادەنيەت جانە مۇرا قورىنىڭ «Words of Olympians» ارنايى جوباسىنا سۇحبات بەردى.