2019 جىلى مۇنداي ناۋقاستاردىڭ سانى 10 مىڭ ادامدى قۇراسا، 2024 جىلدىڭ ورتاسىنا قاراي بۇل كورسەتكىش 29،2 مىڭ بولعان، دەپ حابارلايدى aqshamnews.kz
ولاردىڭ باسىم بولىگى – ايەلدەر، ەرلەر سانى – نەبارى 102 ادام. Finprom مالىمەتىنشە، جالپى العاندا، قازاقستان حالقى اراسىنداعى بەدەۋلىكتىڭ تارالۋى جاھاندىق كورسەتكىشتەرمەن شامالاس: بالا كوتەرۋ ماسەلەسى 16–17% جۇپتا كەزدەسەدى. سوڭعى 30 جىل ىشىندە قازاقستاندا 140 مىڭنان استام جۇپ ەكستراكورپورالدىق ۇرىقتاندىرۋ (ەكو) ادىستەرىمەن ەمدەلگەن. ناتيجەسىندە 39 مىڭ بالا دۇنيەگە كەلگەن.
پاسيەنتتەر سانىنىڭ ءوسۋى «اڭساعان ءسابي» مەملەكەتتىك باعدارلاماسىنىڭ جۇزەگە اسۋىمەن بايلانىستى. بۇل باعدارلاما ەكستراكورپورالدىق ۇرىقتاندىرۋ (ەكو) ءۇشىن شامامەن 7 مىڭ كۆوتا ۇسىنادى. زاڭعا سايكەس، وسى قىمبات پروسەدۋرانى بيۋدجەت ەسەبىنەن الۋ ءۇشىن ايەلدەر مەن ەرلەر بەدەۋلىك دياگنوزىن راستاپ، ەسەپكە تۇرۋى قاجەت.
حالىق سانى كوپ مەگاپوليستەر مەن وبلىستاردا دياگنوز قويىلىپ، ەسەپكە الىنعاندار سانى كوبىرەك. بۇل – سول وڭىرلەردە دياگنوستيكادان وتكەندەر سانىنىڭ دا جوعارى ەكەنىن كورسەتەدى. كوش باسىندا الماتى قالاسى تۇر: مۇندا وتكەن جىلدىڭ ورتاسىنا دەيىن «بەدەۋلىك» دياگنوزىمەن 4،2 مىڭ پاسيەنت تىركەلگەن. ەكىنشى ورىندا – استانا (2،6 مىڭ ادام)، ءۇشىنشى ورىندا – جامبىل وبلىسى، وندا وسىنداي رەپرودۋكتيۆتى ماسەلەلەرى بار 2،5 مىڭ قازاقستاندىق ەسەپتە تۇر.