ۇلتتىق اسكەري-پاتريوتتىق ورتالىقتا «باس رەداكتورلار كلۋبى» قوعامدىق بىرلەستىگى مەن قازاقستان رەسپۋبليكاسىنىڭ قورعانىس مينيسترلىگى اراسىندا ىنتىماقتاستىق تۋرالى مەموراندۋمعا قول قويۋ ءراسىمى ءوتتى. قۇجات مەديا قاۋىمداستىق پەن مەملەكەتتىك سەكتور اراسىنداعى ورنىقتى سەرىكتەستىكتى قالىپتاستىرۋعا، سونداي-اق اسكەري تاقىرىپتى كاسىبي ءارى جاۋاپتى تۇردە جاريالاۋدى دامىتۋعا باعىتتالعان.
مەموراندۋمعا باس رەداكتورلار كلۋبىنىڭ پرەزيدەنتى، قازاقستان رەسپۋبليكاسى پارلامەنتى سەناتىنىڭ دەپۋتاتى بيبىگۇل جەكسەنباي جانە قورعانىس ءمينيسترىنىڭ تاربيە جانە يدەولوگيالىق جۇمىس جونىندەگى ورىنباسارى، ۆيسە-ادميرال سەرىك بۋرامبايەۆ قول قويدى.
تالقىلاۋعا باس رەداكتورلار كلۋبىنىڭ مۇشەلەرى - جەتەكشى رەسپۋبليكالىق جانە وڭىرلىك بۇقارالىق اقپارات قۇرالدارىنىڭ باسشىلارى، سونداي-اق قورعانىس مينيسترلىگىنىڭ اقپارات جانە كوممۋنيكاسيالار، تاربيە جانە يدەولوگيالىق جۇمىس، ۇيىمداستىرۋ-موبيليزاسيالىق باعىت، اسكەري ءبىلىم جانە عىلىم سالالارىنا جاۋاپتى قۇرىلىمدىق بولىمشەلەرىنىڭ وكىلدەرى قاتىستى. ەل وڭىرلەرىندەگى باس رەداكتورلار كەزدەسۋگە ونلاين فورماتتا قوسىلدى.
كەزدەسۋ بارىسىندا بيبىگۇل جەكسەنباي مەموراندۋمعا قول قويۋ مەملەكەتتىك ورگان مەن مەديا قاۋىمداستىق اراسىنداعى سەنىمدى نىعايتۋعا باعىتتالعان سانالى قادام ەكەنىن اتاپ ءوتتى:
«پرەزيدەنت بىرنەشە رەت اتاپ وتكەندەي، بيلىكتىڭ اشىقتىعى مەن قوعاممەن ادال ديالوگ - ورنىقتى مەملەكەتتىڭ نەگىزى. وسى تۇرعىدا كاسىبي مەديا قاۋىمداستىقتىڭ ءرولى ايرىقشا. اقپاراتتىق كەڭىستىكتە جاۋاپكەرشىلىك، دالدىك پەن مازمۇن ستاندارتتارىن ايقىندايتىن - باس رەداكتورلار».
باس رەداكتورلار كلۋبىنىڭ پرەزيدەنتىنىڭ ايتۋىنشا، ءوزارا ءىس-قيمىلدىڭ جاڭا فورماتى جەكەلەگەن بايلانىستاردان جۇيەلى جۇمىسقا، ال كەيىنگى رەاكسيادان - الدىن الا ويلاستىرىلعان، مازمۇندى ديالوگقا كوشۋگە مۇمكىندىك بەرەدى.
ءوز كەزەگىندە ۆيسە-ادميرال سەرىك بۋرامبايەۆ قوعامدا قارۋلى كۇشتەرگە قاتىستى قالىپتاسقان كەيبىر ستەرەوتيپتەردىڭ ءالى دە ساقتالىپ وتىرعانىنا نازار اۋدارىپ، ارميا، اسكەري قىزمەتشىلەر جانە ولاردىڭ ەلگە قىزمەتى تۋرالى ساپالى ءارى سۇرانىسقا يە كونتەنت قالىپتاستىرۋدىڭ زور الەۋەتى بار ەكەنىن اتاپ ءوتتى:
«بۇگىندە ار-نامىس، بورىش، وتانسۇيگىشتىك سەكىلدى نەگىزگى قۇندىلىقتاردى قوعامدىق ديسكۋرسقا قايتا ەنگىزۋ اسا ماڭىزدى. بۇل مەملەكەت پەن مەديا قاۋىمداستىقتىڭ بىرلەسكەن كۇش-جىگەرىن، قارۋلى كۇشتەردىڭ قىزمەتىن فاكتىلەردى بۇرمالاماي، بەزەندىرمەي، ادال ءارى كاسىبي تۇردە جاريالاۋدى تالاپ ەتەدى» — دەدى ۆيسە-ادميرال.
قول قويىلعان مەموراندۋم قورعانىس مينيسترلىگىنىڭ قىزمەتكەرلەرىنە ارنالعان وقىتۋ باعدارلامالارىن ىسكە اسىرۋدى، سەمينارلار، شەبەرلىك ساباقتارى، تاعىلىمدامالار مەن باسپا ءسوز تۋرلارىن وتكىزۋدى كوزدەيدى. سونداي-اق اسكەري تاقىرىپتى باق-تا جاريالاۋدى جەتىلدىرۋ جونىندەگى ۇسىنىمداردى ازىرلەۋ، باس رەداكتورلار كلۋبىنىڭ ساراپتامالىق كەڭەسىن قالىپتاستىرۋ جانە ونىڭ سالالىق مەديا جوبالارعا، ونىڭ ىشىندە «اسكەر مەديا» كونكۋرسىنا قاتىسۋى جوسپارلانعان.
كەزدەسۋ بارىسىندا مەديا قاۋىمداستىق وكىلدەرى ىنتىماقتاستىقتى دامىتۋ جونىندەگى ۇسىنىستارىن ءبىلدىردى. ءوز باستامالارىن MNU ۋنيۆەرسيتەتىنىڭ حالىقارالىق جۋرناليستيكا مەكتەبىنىڭ اتىنان مەديامەنەدجەر باقىت شويىنبەك ۇسىندى.
«قازاق گازەتتەرى» ج ش س باس ديرەكتورىنىڭ ورىنباسارى قامبار احمەتوۆ: «ءبىزدىڭ باسىلىمدار قازاقستان رەسپۋبليكاسىنىڭ قارۋلى كۇشتەرىمەن ۇزاق جىلدار بويى تىعىز ىنتىماقتاستىقتا جۇمىس ىستەپ كەلەدى. مەموراندۋم جۇيەلى جۇمىستى جولعا قويۋعا جانە زاماناۋي اقپاراتتىق فورماتتاردى ەنگىزۋگە نەگىز قالايدى» - دەپ اتاپ ءوتتى.
«ليتەر» گازەتىنىڭ باس رەداكتورى جاننا ويشىبايەۆا:
«ءبىز ءۇشىن ارميا تۋرالى كاسىبي ءارى اۋديتورياعا تۇسىنىكتى تىلدە ايتۋ ماڭىزدى. مەموراندۋمعا قول قويۋ اشىق ديالوگقا جاڭا مۇمكىندىكتەر اشادى»- دەدى.
كەزدەسۋ قاتىسۋشىلارى «Egemen Qazaqstan»، «كازاحستانسكايا پراۆدا» جانە «ليتەر» باسىلىمدارى قازاقستان رەسپۋبليكاسىنىڭ قارۋلى كۇشتەرىمەن كوپ جىلدان بەرى ىنتىماقتاستىق ورناتىپ كەلە جاتقانىن اتاپ ءوتىپ، اقپاراتتىق ءوزارا ءىس-قيمىلدىڭ جاڭا فورماتتارىن دامىتۋعا دايىن ەكەندىكتەرىن ءبىلدىردى.
وڭىرلىك بۇقارالىق اقپارات قۇرالدارىنىڭ باس رەداكتورلارى دا مەموراندۋم اياسىندا بەلسەندى ءارى سىندارلى ىنتىماقتاستىققا دايىن ەكەنىن راستادى.