ناۋرىزباي قاجى تاعان ۇلى مال قۇنىن قولدان كوتەرمەي، حالىققا قولجەتىمدى باعاعا ساتۋعا شاقىردى، دەپ حابارلايدى aqshamnews.kz قمدب باسپا ءسوز قىزمەتىنە سىلتەمە جاساپ.
"قوجا احمەت ياساۋي بابامىز: "حاققا قىزمەت – حالىققا قىزمەت" دەگەن. بۇل – حالىقتىڭ رازىلىعى اللانىڭ رازىلىعىنا جەتكىزەدى دەگەن ءسوز. وسىعان وراي، شارۋا قوجالىقتارىنىڭ يەلەرىن مال باعاسىن شارىقتاتپاي، ادىلەتتى باعا ۇسىنۋعا ۇندەيمىن. ەڭبەكتىڭ اقتالۋى ماڭىزدى، دەگەنمەن "پايدا ويلاما، ار ويلا" دەگەن دانا ءسوز بار. اللا تاعالا قۇراندا: "جاساعان قايىر-ساداقالارىڭ وزدەرىڭە تولىق قايتارىلادى" دەپ ۋادە ەتكەن" ("باقارا" سۇرەسى، 272-ايات)، دەدى باس ءمۇفتي.
سونداي-اق، كاسىپكەرلەردى الەۋمەتتىك ماڭىزى بار ازىق-تۇلىك باعاسىنا جەڭىلدىك جاساۋعا دا شاقىردى.
"قۇربان ايتتا حالىققا جاقسىلىق جاساپ، كوپشىلىكتىڭ العىسىن الايىق. بۇل – ساۋاپتى ءارى ساعىنىشپەن كەلەتىن مەيرام"، دەدى ناۋرىزباي قاجى تاعان ۇلى.
ايتا كەتەيىك، بيىل قۇربان ايت مەرەكەسى 6 ماۋسىمدا باستالادى. بۇل كۇن حيجري كۇنتىزبەگە سايكەس بەلگىلەنىپ، قمدب ءوز شەشىمىن حالىقارالىق عۇلامالارمەن جانە ءپاتۋا شىعارۋ ورتالىقتارىمەن كەڭەسە وتىرىپ قابىلداعان.