الماتىداعى №2 قالالىق بالالار كلينيكالىق اۋرۋحاناسىندا اياق-قولدىڭ ءتۋابىتتى جانە جۇرە پايدا بولعان كەمىستىكتەرىنىڭ زاردابىن تارتىپ كەلە جاتقان بالالارعا رەكونسترۋكتيۆتىك وتالار جاسالدى.
«ميلوسەرديە» ەرىكتىلەر قوعامى» جانە «Samruk-Kazyna Trust» الەۋمەتتىك جوبالاردى دامىتۋ قورلارىنىڭ قولداۋىمەن ۇيىمداستىرىلعان حالىقارالىق شەبەرلىك كلاسىنا ەلىمىزدىڭ تۇپكىر-تۇپكىرىندەگى كلينيكالاردا ورتوپەديا-تراۆماتولوگيا، ميكروحيرۋرگيا سالالارىندا ەڭبەك ەتەتىن دارىگەرلەر قاتىستى، دەپ حابارلايدى اۋرۋحانانىڭ باسپا ءسوز قىزمەتى.
«رف-نىڭ سانكت-پەتەربۋرگ قالاسىنان شاقىرىلعان حيرۋرگ سەرگەي گولياننىڭ جەتەكشىلىگىمەن وتكەن شەبەرلىك كلاسى بارىسىندا قازاقستاندىق بالالارعا 8 كۇردەلى وتا جاسالدى. رەسەيدىڭ اتاقتى پلاستيكالىق حيرۋرگى تاعى 20 كىشكەنتاي پاسيەنتكە كونسۋلتاسيا بەرىپ، وتاندىق ارىپتەستەرىمىزگە ميكروحيرۋرگيا سالاسىنداعى وزىق ادىستەمەلەر جونىندە لەكسيالار وقىدى. بۇل شارانىڭ قازاقستانداعى بالالار ميكروحيرۋرگياسىن دامىتۋعا قوسار ۇلەسى زور»، - دەپ اتاپ ءوتتى №2 قبكا ديرەكتورى مارات راباندياروۆ.
كۇردەلى وپەراسيالاردىڭ ءبارى ءمامس قاراجاتى ەسەبىنەن جاسالدى.
پاسيەنتتەردىڭ ەڭ كىشىسى 1 جاستا. بالا اناسىنان 8 ساۋساقپەن تۋعان. پوليفالانگيا دەپ اتالاتىن كەمىستىك سالدارىنان ءوسىپ كەلە جاتقان بالانىڭ قولىنداعى ارتىق ساۋساقتار ويىنشىقتاردى ۇستاپ، الاقانىن اشىپ-جۇمۋعا كەدەرگى كەلتىرىپ كەلەدى. بۇگىنگى شارا بارىسىندا دارىگەرلەر وتانى زەرگەرلىك شەبەرلىكپەن ورىنداپ، سابيگە تولىققاندى ءومىر سۇرۋگە مۇمكىندىك سىيلادى.
«ءبىز ءۇشىن بۇل كەرەمەت جاڭالىق بولدى. وسىنداي وتانى الماتىدا، تەگىن جاساتامىز دەگەن وي ءۇش ۇيىقتاساق تۇسىمىزگە كىرمەگەن ەدى»، - دەيدى اناسى.
«شەبەرلىك كلاسىن ءجاي عانا تاجىريبە الماسۋ دەپ قاراستىرۋعا بولمايدى. سەبەبى ءبىز قازاقستاندىق ارىپتەستەرمەن بىرگە بالالاردىڭ بولاشاقتا ەمىن-ەركىن قيمىلداپ، قالىپتى ءومىر سۇرۋىنە جاعداي جاسادىق»، - دەپ اتاپ ءوتتى حيرۋرگ سەرگەي گوليانا.